இந்தியாவில் கால்பதித்த “Apple Pay” : Axis Bank-ன் Visa,Mastercard அட்டைகளை பயன்படுத்தலாம் : முழுவிபரம்..!

இந்தியாவில் டிஜிட்டல் பரிவர்த்தனை

இந்தியாவில் டிஜிட்டல் பரிவர்த்தனை மாதம் தோறும் சாதனை படைத்து வருகிறது. பேடிஎம், ஜிபே மூலம் பணம் பரிமாற்றம் செய்யப்பட்டு வருகிறது. Apple Pay சேவையை அதை பயன்படுத்துவோர் நீண்ட நாட்களாக எதிர்பார்த்து காத்திருந்தார்கள். அதற்கு இப்போது பதில் கிடைத்து இருக்கிறது.

Apple Pay அறிமுகம்

தற்போதைய அறிமுகத்தில் Axis Bank வழங்கும் Visa மற்றும் Mastercard கடன் அட்டைகளுக்கு Apple Pay ஆதரவு வழங்கப்பட்டுள்ளது. மற்ற முன்னணி வங்கிகளின் அட்டைகள் இன்னும் இணைக்கப்படவில்லை.

எதிர்காலத்தில் கூடுதல் வங்கிகள்

அதனால் Apple சாதனம் வைத்திருப்பவர்கள் அனைவரும் உடனடியாக இந்த வசதியைப் பயன்படுத்த வாய்ப்பு இருக்காது,. அனால், எதிர்காலத்தில் கூடுதல் வங்கிகள் இதில் இணைக்கப்பட வாய்ப்பு உள்ளது.

பயன்படுத்துவது எப்படி?

Apple Pay-யை பயன்படுத்துவதற்கு முதலில் உங்கள் தகுதியான வங்கி அட்டையை iPhone-ல் உள்ள Wallet செயலியில் சேர்க்க வேண்டும். அதற்காக Wallet செயலியைத் திறந்து, புதிய அட்டையைச் சேர்க்கும் வசதியைத் தேர்வு செய்ய வேண்டும்.

அட்டையின் விவரங்களை கேமரா மூலம் பதிவு செய்யலாம் அல்லது தேவையான தகவல்களை நேரடியாக உள்ளிடலாம். அட்டை சேர்க்கப்பட்ட பிறகு வங்கி சார்பில் சரிபார்ப்பு நடைபெறும்.

Axis Bank மூலம் Apple Pay

சரிபார்ப்பு முடிந்ததும் அந்த அட்டையை Apple Pay மூலம் பயன்படுத்த முடியும். Axis Bank அட்டை வைத்திருப்பவர்கள், வங்கியின் செயலி வழியாகவும் தங்களது அட்டையை Apple Wallet-ல் சேர்க்கும் வசதியைப் பெறுகின்றனர்.

கடைகளில் எளிதாக பயன்படுத்தலாம்

கடையில் பொருட்கள் வாங்கும்போது Apple Pay பயன்படுத்துவது மிகவும் எளிது. பணம் செலுத்தும் இயந்திரத்தில் அலைவரிசை மூலம் பணம் பெறும் வசதி இருக்க வேண்டும்.

iPhone-ல் பக்கவாட்டு பொத்தானை இருமுறை அழுத்தி, முகத்தை அடையாளம் காணும் வசதி மூலம் உறுதி செய்த பிறகு, தொலைபேசியை பணம் பெறும் இயந்திரத்தின் அருகில் வைத்தால் பரிவர்த்தனை நடைபெறும்.

ஆப்பிள் வாட்ச் மூலமும் பணம் செலுத்தலாம்

Apple Watch பயன்படுத்துபவர்களும் இதே முறையில் பணம் செலுத்தலாம். கடையில் பணம் செலுத்தும்போது தொலைபேசியை வெளியே எடுக்க வேண்டிய அவசியம் இருக்காது. கடையின் பணம் பெறும் இயந்திரம் தேவையான வசதியை கொண்டிருந்தால், கடிகாரத்தின் மூலமே பரிவர்த்தனையை முடிக்கலாம்.

மிக எளிதில் பரிவர்த்தனை

Apple Pay-ஐ ஏற்றுக்கொள்ளும் இணையதளங்கள் மற்றும் செயலிகளிலும் இதைப் பயன்படுத்த முடியும். பொருட்களை வாங்கும்போது ஒவ்வொரு முறையும் நீண்ட அட்டை விவரங்களை உள்ளிடுவதற்குப் பதிலாக, Apple Pay மூலம் பணம் செலுத்தும் விருப்பத்தைத் தேர்வு செய்து சாதனத்தில் அடையாளத்தை உறுதி செய்தால் போதும்.

பயனர்களுக்கு பாதுகாப்பு

இதன் பாதுகாப்பு அம்சமும் முக்கியமானதாக பார்க்கப்படுகிறது. பணம் செலுத்தும் போது பயனரின் உண்மையான அட்டை எண்ணை விற்பனையாளருடன் நேரடியாகப் பகிராமல், சாதனத்துடன் இணைக்கப்பட்ட பாதுகாப்பு அடையாளம் பயன்படுத்தப்படுகிறது.

ஒவ்வொரு பரிவர்த்தனையையும் முக அடையாளம், கைரேகை அல்லது கடவுக்குறியீடு போன்ற முறைகளில் உறுதி செய்ய முடியும்.

Apple Pay-யின் தற்போதைய அறிமுகம் முக்கியமாக வங்கி கடன் அட்டைகளை சாதனத்தின் மூலம் பயன்படுத்தும் வசதியை மையமாகக் கொண்டுள்ளது.

UPI மூலம் வங்கிக் கணக்கிலிருந்து நேரடியாக பணம் செலுத்தும் முறையிலிருந்து இது வேறுபட்டது. மேலும், அனைத்து கடைகளிலும் Apple Pay வேலை செய்யும் என்று எதிர்பார்க்க முடியாது.

பணம் பெறும் இயந்திரத்தில் அலைவரிசை மூலம் பணம் செலுத்தும் வசதி இருக்க வேண்டும். அந்த வசதி இல்லாத இடங்களில் வழக்கமான அட்டை அல்லது வேறு பணப்பரிவர்த்தனை முறையை பயன்படுத்த வேண்டியிருக்கும்.

முதல் கட்டத்தில் Apple Pay பயன்படுத்தக்கூடிய இந்திய பயனர்களின் எண்ணிக்கை குறைவாகவே இருக்கும். இந்தியாவில் Apple Pay அறிமுகமாகியிருப்பது Apple நிறுவனத்துக்கு முக்கியமான விரிவாக்கமாக பார்க்கப்படுகிறது.

==================