அரேபிய திரையுலகில் முதன்முறையாக களமிறங்கும் இசைப்புயல் ஏ.ஆர். ரஹ்மான்!

'Musical Storm' A.R. Rahman makes his debut in the Arab film industry!

இசைப்புயல் ஏ.ஆர். ரஹ்மான்

இந்தியத் திரையுலகைக் கடந்து உலக அளவில் தனது அசாத்திய இசையால் ரசிகர்களைக் கட்டிப்போட்டவர் இசைப்புயல் ஏ.ஆர். ரஹ்மான்.

உலக அரங்கில் இந்தியாவை பெருமைபடுத்தியவர்

தமிழ், மலையாளம், இந்தி ஆகிய மொழிகளில் காலத்தால் அழியாத பாடல்களைத் தந்த இவர், ஹாலிவுட் மற்றும் பாரசீக மொழித் திரைப்படங்களுக்கும் இசையமைத்து உலக அரங்கில் இந்தியாவின் பெருமையை நிலைநாட்டியுள்ளார்.

ஸ்லம்டாக் மில்லியனர்: 2 ஆஸ்கர் விருதுகள்

அதிலும் குறிப்பாக, ‘ஸ்லம்டாக் மில்லியனர்’ என்ற ஹாலிவுட் திரைப்படத்திற்காக இரண்டு ஆஸ்கார் விருதுகளை வென்று உலகையே வியப்பில் ஆழ்த்தியவர் என்பது குறிப்பிடத்தக்கது.

இசைப்புயல் தற்போது, தனது இசைப் பயணத்தில் மற்றுமொரு முத்திரையாக அரேபியத் திரையுலகில் முதன்முறையாக கால்பதித்துள்ளார்.

அரேபியத் திரையுலகில் ஏ.ஆர். ரஹ்மான்

ஐக்கிய அரபு அமீரகத்தைச் சேர்ந்த பிரபல பெண் இயக்குநரான நய்லா அல் காஜா இயக்கத்தில் உருவாகியுள்ள "பாப்" (Baab) என்ற அரேபிய மொழித் திரைப்படத்திற்கு ஏ.ஆர். ரஹ்மான் இசையமைத்துள்ளார்.

பின்னணி இசை இன்று வெளியீடு

இப்படத்தின் மீதான எதிர்பார்ப்பு ரசிகர்களிடையே உலகளவில் அதிகரித்துள்ள நிலையில், இப்படத்தின் பின்னணி இசை இன்று (ஜூன் 19) அதிகாரப்பூர்வமாக வெளியிடப்பட்டுள்ளது.

ரசிகர்களுக்கு இசை விருந்து

இதன் மூலம் அரேபியத் திரையுலகிலும் தனது புதிய இசை அத்தியாயத்தை ஏ.ஆர். ரஹ்மான் வெற்றிகரமாகத் தொடங்கியுள்ளார். சர்வதேச அளவில் உருவாகும் இந்த திரைப்படம் அவரது ரசிகர்களுக்கு ஒரு புதிய இசை விருந்தாக அமையும் என்பதில் சந்தேகமில்லை.

====