சேயோன் திரைப்படத்தில் இணையும் சீமான்
இயக்குநர் சிவகுமார் முருகேசன் இயக்கத்தில் நடிகர் சிவகார்த்திகேயன் நடிக்கும் 'சேயோன்' திரைப்படத்தின் படப்பிடிப்பு மதுரையில் விறுவிறுப்பாக நடைபெற்று வருகிறது. முதல்கட்டப் படப்பிடிப்பு நிறைவடைந்த நிலையில், அடுத்தகட்டப் படப்பிடிப்புக்கான பணிகள் தீவிரமடைந்து வருகின்றன.
மதுரையின் வாழ்வியலை மையமாகக் கொண்டு உருவாகும் இத்திரைப்படத்திற்கு இசையமைப்பாளர் சந்தோஷ் நாராயணன் இசையமைக்கிறார். மேலும், இப்படத்தில் கதாநாயகியாக பாக்யஸ்ரீ போர்ஸாம் மற்றும் முக்கியக் கதாபாத்திரத்தில் பாலா சரவணன் உள்ளிட்டோர் நடிக்கின்றனர்.
வெளியீட்டுத் தேதியில் மாற்றம்
இத்திரைப்படத்தை இந்த ஆண்டு தீபாவளி பண்டிகையை முன்னிட்டு வெளியிடத் தயாரிப்பு நிறுவனம் திட்டமிட்டிருந்தது.
இருப்பினும், நடிகர் ரஜினிகாந்தின் 'ஜெயிலர் - 2' திரைப்படம் தீபாவளி வெளியீட்டைக் குறி வைத்துள்ளதால், 'சேயோன்' திரைப்படத்தை அடுத்த ஆண்டு பொங்கல் பண்டிகைக்கு திரைக்குக் கொண்டு வரத் தயாரிப்பு நிறுவனமான ராஜ்கமால் ஃபிலிம்ஸ் இன்டர்நேஷனல் முடிவு செய்துள்ளதாகக் கூறப்படுகிறது.
சீமானின் புதிய கதாபாத்திரம்
இந்நிலையில், 'சேயோன்' திரைப்படத்தில் நாம் தமிழர் கட்சியின் தலைமை ஒருங்கிணைப்பாளர் சீமான் இணைந்துள்ளதாகத் தயாரிப்பு நிறுவனம் அதிகாரப்பூர்வமாக வீடியோ வெளியிட்டு அறிவித்துள்ளது.
இப்படத்தில் சிவகார்த்திகேயனுக்கு தந்தையாக அவர் நடிக்கலாம் என்று திரையுலக வட்டாரங்களில் பேசப்படுகிறது.
சீமானின் முந்தைய திரைப்பயணம்
முன்னதாக, நடிகர் பிரதீப் ரங்கநாதனுக்கு தந்தையாக 'எல்ஜேகே' திரைப்படத்தில் சீமான் நடித்திருந்தார். அப்படம் கலவையான விமர்சனங்களைப் பெற்றபோதிலும், அதில் சீமானின் நடிப்பு மற்றும் கதாபாத்திரம் பெருமளவில் பேசப்பட்டது குறிப்பிடத்தக்கது.
இதையும் படிங்க: மறைந்த இயக்குநர் பாரதிராஜாவின் கடைசி திரைப்படம்: 'புலவர்' திரைப்படத்தின் ரிலீஸ் தேதி அறிவிப்பு!
=====