அர்ஜென்டினா - ஜோர்டான் மோதல்
மூன்று நாடுகளில் நடைபெற்று வரும் உலகக்கோப்பை கால்பந்து தொடர், நாளுக்குநாள் விறுவிறுப்படைந்து வருகிறது. அமெரிக்காவில் ஆர்லிங்டனில் நடைபெற்ற ஆட்டத்தில் ஜோர்டன் - அர்ஜென்டினா அணிகள் மோதின.
மாற்று ஆட்டக்காரர் மெஸ்ஸி
ஏற்கெனவே நாக்-அவுட் சுற்றுக்கு அர்ஜென்டினா முன்னேறி விட்டதால், அணியில் 9 மாற்றங்களை பயிற்சியாளர் செய்திருந்தார். நட்சத்திர வீரர் லயோனல் மெஸ்ஸி மாற்று ஆட்டக்காரராக களமிறக்கப்பட்டார்.
ஆக்ரோஷமாக விளையாடிய அர்ஜென்டீனா
அர்ஜென்டினா அணி ஆரம்பம் முதலே ஆக்ரோஷமாக விளையாடியது. 19-வது நிமிடத்தில் கியோவனி லோ செல்ஸோ ஒரு கோலடித்து அணிக்கு முன்னிலை பெற்று தந்தார்.
பாக்ஸ் பகுதியில் 20 அடி தூரத்தில் இருந்து அவர் அடித்த ஃபிரீ கிக்கை, ஜோர்டான் கோல்கீப்பர் யாசித் அபுலைலாவால் தடுக்க முடியவில்லை. கோல்கம்பத்தின் வலது பக்கத்தை அந்த பந்து துளைத்தது.
2-0 அர்ஜன்டினா முன்னிலை
அர்ஜென்டினா தொடர்ந்து பந்தை தங்கள் கட்டுப்பாட்டில் வைத்திருந்ததுடன், 31வது நிமிடத்தில் மேலும் ஒரு கோலை அடித்தது. இந்த கோலை அர்ஜெண்டினா வீரர் லவுடேரா மார்ட்டினஸ் செலுத்தி அணி வீரர்களை உற்சாகத்துக்கு உள்ளாக்கினார்.
இதனால் முதல் பாதி வரை 2-0 என்ற கணக்கில் அர்ஜெண்டினா முன்னிலையில் இருந்தது.
ஒரு கோல் அடித்த ஜோர்டான்
2-வது பாதியின்போது ஆக்ரோஷமாக விளையாடிய ஜோர்டான் 55வது நிமிடத்தில் ஒரு கோலடித்தது. அந்த அணியின் முசா அல்-தாமாரி இந்த கோலை அடித்தார்.
கோல் அடித்த மெஸ்ஸி
60வது நிமிடத்தில் ரசிகர்களின் ஏகோபித்த வரவேற்புக்கு இடையே லியோனல் மெஸ்ஸி களமிறக்கப்பட்டார். 80வது நிமிடத்தில் கிடைத்த ஃபிரீ கிக் மூலம் அற்புதமான கோலை அடித்து ரசிகர்களை மகிழ்ச்சிக்குள்ளாக்கினார் மெஸ்ஸி.
அர்ஜென்டினா ஹாட்ரிக் வெற்றி
இதனால் அர்ஜென்டினா 3-1 என்ற கணக்கில் முன்னிலை பெற்று, இறுதியில் வெற்றி பெற்றது. லீக் சுற்றில் ஹாட்ரிக் வெற்றியை சுவைத்ததுடன் ஜே பிரிவில் முதலிடம் பிடித்தது. வெற்றியே பெறாத ஜோர்டன் சுற்றிலிருந்து வெளியேறியது.
7 போட்டிகளில் கோல், மெஸ்ஸி சாதனை
உலகக் கோப்பை போட்டிகளில் தொடர்ந்து 7 ஆட்டங்களில் கோலடித்து சாதனை புரிந்துள்ளார் லியோனல் மெஸ்ஸி. ஜோர்டான் அணிக்கெதிரான போட்டியில் அவர் கோலடித்ததன் மூலம் இந்த சாதனையை அவர் எட்டினார்.
சாதனைகளை முறியடித்த மெஸ்ஸி
இதற்கு முன்பு பிரான்ஸின் ஜஸ்ட் ஃபோன்டைன் (1958), பிரேசிலின் ஜெய்ர்சின்ஹோ (1970) ஆகியோர் தொடர்ந்து 6 உலகக் கோப்பை போட்டிகளில் கோலடித்து சாதனை செய்திருந்தனர். அந்த சாதனையை தற்போது மெஸ்ஸி முறியடித்துள்ளார்.
உலகக்கோப்பையில் 19 கோல்கள்
உலகக்கோப்பை வரலாற்றில் அதிக கோல்கள் அடித்த வீரர்கள் வரிசையில் அவர் தொடர்ந்து முதலிடத்தில் இருக்கிறார். நேற்றைய போட்டியில் அடித்த கோலுடன் எண்ணிக்கை 19 ஆக உயர்ந்துள்ளது.
இன்னும் காலிறுதி, அரையிறுதி, இறுதி ஆட்டங்களும் இருப்பதால், மெஸ்ஸியின் கோல் மழை தொடரும் என்ற ஆர்வத்துடன் ரசிகர்கள் காத்துக் கிடக்கின்றனர்.
===========================