இந்திய வம்சாவளி வீரர் :
அமெரிக்க கிரிக்கெட் அணிக்காக விளையாடி வரும் இந்திய வம்சாவளியைச் சேர்ந்த மிலிந்த் குமார், புதிய வரலாற்றுச் சாதனை படைத்து ரசிகர்களின் கவனத்தை ஈர்த்துள்ளார்.
ஐசிசி ஆண்கள் கிரிக்கெட் உலகக் கோப்பை லீக்-2 தொடரில் ஐக்கிய அரபு அமீரகத்திற்கு எதிராக நடைபெற்ற போட்டியில் மிலிந்த் குமார் அபாரமாக விளையாடினார்.
84 பந்துகளை சந்தித்த அவர், ஆட்டமிழக்காமல் 116 ரன்கள் குவித்து அணியின் வெற்றிக்கு முக்கிய காரணமாக இருந்தார்.
இந்த சத இன்னிங்ஸில் மிலிந்த் குமார் 5 சிக்ஸர்களை விளாசினார்.
இதன் மூலம் அமெரிக்க ஆடவர் ஒருநாள் கிரிக்கெட் வரலாற்றில் அதிக சிக்ஸர்கள் அடித்த வீரர் என்ற பெருமையை பெற்றுள்ளார்.
இதற்கு முன்பு அமெரிக்க அணியின் முன்னாள் கேப்டன் மோனாங்க் பட்டேல் 34 சிக்ஸர்களுடன் முதலிடத்தில் இருந்தார்.
தற்போது 38 சிக்ஸர்களுடன் அந்த சாதனையை மிலிந்த் குமார் முறியடித்துள்ளார்.
இந்த போட்டியில் முதலில் பேட்டிங் செய்த ஐக்கிய அரபு அமீரகம் 331 ரன்கள் குவித்தது.
இதையடுத்து 332 ரன்கள் என்ற கடின இலக்குடன் களமிறங்கிய அமெரிக்க அணி, 4 விக்கெட்டுகள் இழப்புக்கு வெற்றியைப் பதிவு செய்தது.
ஒருநாள் கிரிக்கெட்டில் அமெரிக்க அணி வெற்றிகரமாக சேஸ் செய்த மிகப்பெரிய இலக்கு இதுவாகும்.
இந்த வரலாற்று வெற்றியில் மிலிந்த் குமாரின் பங்கு மிகவும் முக்கியமானதாக அமைந்தது.
டெல்லியைச் சேர்ந்த மிலிந்த் குமார், இந்திய உள்நாட்டு கிரிக்கெட்டில் டெல்லி மற்றும் சிக்கிம் அணிகளுக்காக விளையாடியுள்ளார்.
பின்னர் அமெரிக்காவுக்கு குடிபெயர்ந்து அந்நாட்டு தேசிய அணியில் இடம்பிடித்தார்.
தற்போது அமெரிக்க கிரிக்கெட்டின் முக்கிய வீரர்களில் ஒருவராக உருவெடுத்துள்ள மிலிந்த் குமார், தனது அதிரடி ஆட்டத்தின் மூலம் புதிய மைல்கல்லை எட்டியுள்ளார்.
உலகக் கோப்பை தகுதிச் சுற்றை முன்னிட்டு அமெரிக்க அணி தொடர்ந்து சிறப்பான ஆட்டத்தை வெளிப்படுத்தி வருகிறது.
அந்த அணியின் வெற்றிப் பயணத்தில் மிலிந்த் குமாரின் இந்த சாதனை முக்கிய திருப்புமுனையாக பார்க்கப்படுகிறது.
அமெரிக்க கிரிக்கெட்டின் புதிய "சிக்ஸர் மன்னன்" ஆக உருவெடுத்துள்ள மிலிந்த் குமார், வரும் போட்டிகளிலும் தனது அதிரடியை தொடர்வாரா என்ற எதிர்பார்ப்பு ரசிகர்களிடையே அதிகரித்துள்ளது.
==================