Association for Democratic Reforms (ADR) மற்றும் National Election Watch இணைந்து வெளியிட்டுள்ள ஆய்வறிக்கையில், கடந்த நான்கு ஆண்டுகளில் நாடாளுமன்றம் மற்றும் மாநில சட்டப்பேரவைகளில் தேர்ந்தெடுக்கப்பட்ட 111 மக்கள் பிரதிநிதிகள் கட்சி மாறியுள்ளதாக தெரிவிக்கப்பட்டுள்ளது.
தேர்தலில் ஒரு கட்சியின் சார்பில் வெற்றி பெற்ற பின்னர் வேறு கட்சிகளில் இணைந்த சம்பவங்கள் இந்த அறிக்கையில் பதிவு செய்யப்பட்டுள்ளன.
அறிக்கையின்படி, கட்சி மாறியவர்களில்:
26 மக்களவை எம்.பி.க்கள்
7 மாநிலங்களவை எம்.பி.க்கள்
78 எம்.எல்.ஏ.க்கள் அடங்குகின்றனர்.
மொத்தமாக 111 மக்கள் பிரதிநிதிகள் கடந்த நான்கு ஆண்டுகளில் கட்சி மாறியுள்ளனர்.
மாநில வாரியாகப் பார்த்தால், நாகாலாந்து மாநிலத்தில்தான் அதிக அளவில் கட்சித் தாவல் நடைபெற்றுள்ளது.
அங்கு மட்டும் 32 எம்.எல்.ஏ.க்கள் தங்களது கட்சிகளை மாற்றியுள்ளனர்.
இது நாடு முழுவதிலும் பதிவான மிக உயர்ந்த எண்ணிக்கையாகும்.
நாகாலாந்தைத் தொடர்ந்து கோவா உள்ளிட்ட சில மாநிலங்களிலும் கட்சித் தாவல் சம்பவங்கள் அதிகம் பதிவாகியுள்ளன.
குறிப்பாக கோவாவில் காங்கிரஸ் கட்சியில் இருந்து தேர்ந்தெடுக்கப்பட்ட பல எம்.எல்.ஏ.க்கள் பின்னர் பாஜகவில் இணைந்தது தேசிய அளவில் கவனம் பெற்ற சம்பவமாக அமைந்தது.
அறிக்கையில் இடம்பெற்றுள்ள தரவுகளின்படி, கட்சி மாறிய மக்கள் பிரதிநிதிகளில் கணிசமானோர் தேசிய ஜனநாயகக் கூட்டணி மற்றும் சில பிராந்திய கட்சிகளில் இணைந்துள்ளனர்.
இதன் மூலம் மாநில அரசியல் சமநிலையிலும் பல இடங்களில் மாற்றங்கள் ஏற்பட்டதாக கூறப்படுகிறது.
தேர்தலில் ஒரு கட்சியின் கொள்கை மற்றும் சின்னத்தை முன்வைத்து மக்களிடம் வாக்கு பெற்று வெற்றி பெறும் பிரதிநிதிகள் பின்னர் கட்சி மாறுவது, ஜனநாயகத்தின் அடிப்படை நோக்கத்திற்கு எதிரானதா என்ற கேள்வியை எழுப்புகிறது.
இதுபோன்ற சம்பவங்கள் மக்கள் மத்தியில் அரசியல் நம்பகத்தன்மை குறித்து விவாதங்களை ஏற்படுத்தியுள்ளன.
இந்தியாவில் கட்சித் தாவலை கட்டுப்படுத்துவதற்காக அரசியலமைப்பின் 10-வது அட்டவணையின் கீழ் கட்சித் தாவல் தடுப்பு சட்டம் அமலில் உள்ளது.
இருப்பினும், இணைப்பு, பிளவு, கூட்டணி மாற்றம் உள்ளிட்ட பல்வேறு காரணங்களால் கட்சித் தாவல் சம்பவங்கள் தொடர்ந்து நடைபெற்று வருவதாக அரசியல் ஆய்வாளர்கள் சுட்டிக்காட்டுகின்றனர்.
=====================