BJP Condemns on Rahul Gandhi speech on Chicago University over Indian Democracy  Google
இந்தியா

வெளிநாடுகளுக்கு சென்று தொடர்ந்து இந்தியா குறித்து அவதூறு பரப்புகிறார் ராகுல் : பிஜேபி கடும் கண்டனம்..!

அமெரிக்கா சென்றுள்ள மக்களவை எதிர்க்கட்சி தலைவர் ராகுல் காந்தி அங்குள்ள புகழ்பெற்ற சிகாகோ பல்கலைக்கழகத்தில் மாணவர்கள் முன் உரையாற்றி இவ்வாறு தெரிவித்தார் ...

NARENDRAN K

அமெரிக்க பயணத்தில் ராகுல் காந்தி :

மக்களவை எதிர்க்கட்சித் தலைவர் ராகுல் காந்தி இரண்டு நாள் பயணமாக அமெரிக்கா சென்றுள்ளார்.

அங்கு நியூயார்க்கில் உள்ள கொலம்பியா பல்கலைக்கழகம் மற்றும் சிகாகோ பல்கலைக்கழகத்தில் மாணவர்கள், பேராசிரியர்களுடன் கலந்துரையாடியுள்ளார்.

கொலம்பியா பல்கலைக்கழகத்தில் நடைபெற்ற நிகழ்ச்சியில் பேசிய ராகுல் காந்தி, இந்தியா மிகப்பெரிய பொருளாதார நெருக்கடியை எதிர்கொண்டுள்ளதாக தெரிவித்தார்.

இந்திய ஜனநாயகம் குறித்து ராகுல் காந்தி பேசியது என்ன?

இதனைத் தொடர்ந்து, சிகாகோ பல்கலைக்கழகத்தில் நடைபெற்ற கலந்துரையாடலில் இந்திய ஜனநாயகம் மற்றும் தேர்தல் நடைமுறைகள் குறித்து ராகுல் காந்தி பேசினார்.

இந்திய ஜனநாயகம் புனிதமானது என்றும், தேர்தல் முறையில் முறைகேடுகள் இருப்பதாகக் கூறி எதிர்க்கட்சிகள் தேர்தலை புறக்கணித்தால், அது ஜனநாயகத்தையே முடிவுக்கு கொண்டுவந்துவிடும் என்றும் அவர் தெரிவித்தார்.

மேலும், தேர்தல் முறையில் இருப்பதாக கூறப்படும் குறைபாடுகளை மக்களிடம் எடுத்துரைத்து, தேர்தல்களில் தொடர்ந்து பங்கேற்பதே எதிர்க்கட்சிகளின் அணுகுமுறை என்றும் குறிப்பிட்டார்.

பிரதீப் பண்டாரி கடும் விமர்சனம் :

ராகுல் காந்தியின் அமெரிக்கப் பயணத்தில் அவர் தெரிவித்த கருத்துகளுக்கு பாஜக செய்தி தொடர்பாளர் பிரதீப் பண்டாரி கடும் எதிர்ப்பு தெரிவித்துள்ளார்.

வெளிநாட்டு மண்ணில் இந்தியாவின் பொருளாதார வளர்ச்சி மற்றும் ஜனநாயக அமைப்புகள் குறித்து எதிர்மறையான கருத்துகளை ராகுல் காந்தி தெரிவிப்பதாக அவர் குற்றம்சாட்டியுள்ளார்.

மேலும், ராகுல் காந்தி குடும்ப அரசியலை விரும்புவதாகவும், ஜனநாயகத்தை மதிப்பதில்லை என்றும் விமர்சித்துள்ளார்.

'Sacred' என்ற வார்த்தையால் புதிய சர்ச்சை :

இதற்கிடையே, சிகாகோ பல்கலைக்கழகத்தில் ராகுல் காந்தி பேசியது தொடர்பாக மற்றொரு சர்ச்சையும் உருவாகியுள்ளது.

இந்திய ஜனநாயகம் 'Sick' (நோய்வாய்ப்பட்டது) என்று ராகுல் காந்தி கூறியதாக பாஜக தரப்பில் விமர்சிக்கப்பட்டது.

ஆனால், அவர் பேசிய காணொளியில் 'Sacred' (புனிதமானது) என்ற வார்த்தையைத்தான் பயன்படுத்தியதாகவும், அந்த கருத்து தவறாக புரிந்துகொள்ளப்பட்டுள்ளதாகவும் செய்திகள் வெளியாகியுள்ளன.

========================