வெளிநாடுகளை நம்பி இருக்கும் இந்தியா
20% DME-LPG Blend Can Cut Fuel Imports By 6.3 MT, Save Rs 34,200 Crore A Year : இந்தியாவின் கச்சா எண்ணெய் தேவையில் 85 சதவீதம் வெளிநாடுகளில் இருந்து இறக்குமதி செய்யப்படுகிறது. இதேபோல நாட்டின் எல்பிஜி சமையல் எரிவாயுவில் 60 சதவீதம் இறக்குமதி செய்யப்படுகிறது.
கடும் தட்டுப்பாடு
அமெரிக்கா, ஈரான் இடையிலான போர் காரணமாக உலகம் முழுவதும் கச்சா எண்ணெய், சமையல் எரிவாயுவுக்கு கடுமையான தட்டுப்பாடு ஏற்பட்டிருக்கிறது. சமையல் எரிவாயு தட்டுப்பாட்டுக்கு தீர்வு காண உள்நாட்டில் எல்பிஜி உற்பத்தி அதிகரிக்கப்பட்டு உள்ளது.
எத்தனால் கலப்பது கட்டாயம்
அமெரிக்கா, அங்கோலா உள்ளிட்ட நாடுகளில் இருந்து எல்பிஜி எரிவாயு இறக்குமதி செய்யப்பட்டு வருகிறது. ஏற்கெனவே நாடு முழுவதும் பெட்ரோலில் 20 சதவீதம் அளவுக்கு எத்தனால் கலப்பது கட்டாயமாக்கப்பட்டு உள்ளது.
இதன்மூலம் கச்சா எண்ணெய் இறக்குமதி கணிசமாக குறைந்து, பெட்ரோல் தட்டுப்பாடு பிரச்சினைக்கும் எளிய முறையில் தீர்வு காணப்பட்டு உள்ளது.
எல்பிஜியில் டிஎம்ஐ எரிவாயு
இதேபோல எல்பிஜி சமையல் காஸில் 20 சதவீதம் டிஎம்இ காஸை கலக்க மத்திய அரசு திட்டமிட்டு உள்ளது. இதன் மூலம் எல்பிஜி இறக்குமதியை கணிசமாக குறைக்க முடியும் என்று பெட்ரோலியத் துறை தெரிவித்துள்ளது.
செயற்கை எரிவாயு டிஎம்இ
டைமெத்தைல் ஈதர் (டிஎம்இ) என்பது ஒரு செயற்கை எரிவாயு. இயற்கை எரிவாயு, நிலக்கரி வாயுவாக்கம் ஆகியவற்றின் மூலம் டிஎம்இ காஸ் உற்பத்தி செய்யப்படுகிறது. இது தூய்மையான எரிவாயு ஆகும்.
காற்றுமாசு குறைவு
எல்பிஜி உடன் ஒப்பிடும்போது டிஎம்இ காஸ் எரியும்போது புகை, நைட்ரஜன் ஆக்ஸைடு, கந்தக ஆக்ஸைடு ஆகியவை மிகக் குறைவாக வெளியேறும்.
மும்பையை தலைமையிடமாகக் கொண்டு செயல்படும் நியூ ஏரா கிளீன்டெக் சொல்யூஷன் பிரைவேட் லிமிடெட் நிறுவனம் நிலக்கரி வாயுவாக்கம் மூலம் டிஎம்இ காஸை உற்பத்தி செய்து வருகிறது.
தொழில்நுட்பம் கண்டுபிடிப்பு
இதேபோல மகாராஷ்டிராவின் புனேவை சேர்ந்த மத்திய அரசின் சிஎஸ்ஐஆர்- என்சிஎல் நிறுவனம், மெத்தனாலில் இருந்து டிஎம்இ காஸை உற்பத்தி செய்யும் தொழில்நுட்பத்தை கண்டுபிடித்து உள்ளது.
தமிழர் தலைமையில் குழு
மகாராஷ்டிராவின் புனே நகரில் மத்திய அரசின் சிஎஸ்ஐஆர் - என்சிஎல் நிறுவனம் செயல்படுகிறது. அங்கு முதன்மை விஞ்ஞானியாக உள்ள தமிழகத்தின் பவானி பகுதியை சேர்ந்த ராஜா திருமலைச்சாமி தலைமையிலான குழு மெத்தனாலில் இருந்து டிஎம்இ காஸை தயாரிக்கும் தொழில் நுட்பத்தை கண்டறிந்து உள்ளது.
எரிவாயு தட்டுப்பாடு நீங்கும்
டிஎம்இ எரிவாயுவை எல்பிஜி எரிவாயுவுடன் 20 சதவீதம் கலந்து விற்பனை செய்வது பற்றி மத்திய அரசு தீவிரமாக பரிசீலித்து வருகிறது. இதன் மூலம், உள்நாட்டு தேவையை பெரிய அளவில் சமாளிக்க முடியும். தட்டுப்பாட்டையும் நீக்க முடியும் என்று கூறப்படுகிறது.
இறக்குமதி குறையும்
இவ்வாறு விற்பனை செய்வதன் மூலம் ஆண்டுக்கு 6.3 மெட்ரிக் டன் அளவுக்கு இறக்குமதி செய்யப்படுவது குறையும், 34,200 கோடி ரூபாய் மிச்சமாகும் என்று புள்ளி விவரங்கள் தெரிவிக்கின்றன.
=====================