”ஊழியர்கள் மூன்று நாட்கள் ஸ்டிரைக்” : நிதிச் சேவைகள் முடங்கும் அபாயம் : வரும் ஞாயிறன்று வங்கிகள் இயங்கும், அரசு உறுதி!

வங்கி ஊழியர்கள் ஸ்டிரைக்

bank strike September online banking services ATM services during strike

ஐந்து நாள் வேலை வாரக் கோரிக்கையை வலியுறுத்தி, ஐக்கிய வங்கி ஊழியர்களின் சங்கம் (UFBU) அறிவித்துள்ள மூன்று நாள் நாடு தழுவிய வேலைநிறுத்தப் போராட்டம் திட்டமிட்டபடி நடைபெறும் என்று அறிவிக்கப்பட்டுள்ளது.

ஊழியர்களுக்கு அறிவுறுத்தல்

வாடிக்கையாளர்களுக்கு தடையற்ற வங்கிச் சேவைகளை உறுதி செய்யுமாறு பஞ்சாப் நேஷனல் வங்கி (PNB), யூனியன் பேங்க் ஆஃப் இந்தியா, பேங்க் ஆஃப் இந்தியா மற்றும் இந்தியன் வங்கி உள்ளிட்ட பல பொதுத்துறை வங்கிகள் தங்கள் ஊழியர்களுக்கு புதிய அறிவுறுத்தல்களை வழங்கியுள்ளன.

பேச்சுவார்த்தை தோல்வி

இந்திய வங்கிகள் சங்கம் (IBA), நிதிச்சேவைகள் துறை (DFS) மற்றும் வங்கி நிர்வாகங்களுடன் 22ம் தேதி நடைபெற்ற சமரசக் கூட்டம் தோல்வியடைந்ததைத் தொடர்ந்து, இந்த வேலைநிறுத்தப் போராட்டத்தில் ஈடுபடுவதாக யூனியன் கூட்டமைப்பு உறுதியாகத் தெரிவித்தது.

திட்டமிட்டபடி வேலைநிறுத்தம்

ஐந்து நாள் வங்கி வாரக் கோரிக்கையை நிறைவேற்றுவது குறித்து உறுதியான மற்றும் நேர்மறையான முன்னேற்றம் ஏற்படும் வரை போராட்டம் தொடரும் என்று யூனியன் கூட்டமைப்பு தெளிவுபடுத்தியுள்ளது.

வங்கி நிர்வாகங்கள் கோரிக்கை

இதற்கிடையில், பஞ்சாப் நேஷனல் வங்கி (PNB), யூனியன் பேங்க் ஆஃப் இந்தியா, பேங்க் ஆஃப் இந்தியா மற்றும் இந்தியன் வங்கி உள்ளிட்ட பொதுத்துறை வங்கிகளின் நிர்வாகங்கள் தங்கள் ஊழியர்களுக்கு அடுத்தடுத்து அவசரக் கடிதங்களை அனுப்பத் தொடங்கின.

"ஊழியர்களின் நலனுக்காக ஊதிய உயர்வு, படிகள் மற்றும் பல்வேறு நலத்திட்டங்களை நாங்கள் மேம்படுத்தியுள்ளோம். எனவே, ஊழியர்கள் வேலைநிறுத்தத்தைத் தவிர்த்து, வாடிக்கையாளர்களுக்கு தடையற்ற சேவையை வழங்க வேண்டும்" என்பதே அந்த வங்கிகளின் ஒட்டுமொத்த வேண்டுகோளாக இருந்தது

மத்திய அரசு விளக்கம்

நிதியமைச்சகம் வெளியிட்ட அறிக்கையில், பொதுத்துறை மற்றும் கிராம வங்கி ஊழியர்கள் வேலைநிறுத்தத்தில் பங்கேற்பதைத் தவிர்க்குமாறு கேட்டுக் கொண்டது. ஐந்து நாள் வங்கி வாரக் கோரிக்கை பரிசீலனையில் இருப்பதாகவும் கூறப்பட்டது.

அரசு மற்றும் வங்கி நிர்வாகங்களின் வேண்டுகோள்களை மீறி, செப்டம்பர் 28, 29 மற்றும் 30 ஆகிய தேதிகளில் வேலைநிறுத்தம் தொடரும் என்று ஐக்கிய வங்கி ஊழியர்களின் சங்கம் (UFBU) அறிவித்துள்ளது.

வாடிக்கையாளர்கள் கவனத்திற்கு

ஊழியர்கள் வேலைநிறுத்தத்தில் பங்கேற்றால், செப்டம்பர் 28 முதல் 30 வரை கிளைகளில் நடைபெறும் வங்கிச் சேவைகள் பாதிக்கப்படலாம். செப்டம்பர் 26 நான்காவது சனிக்கிழமை மற்றும் செப்டம்பர் 27 ஞாயிற்றுக்கிழமை என்பதால், இந்த வேலை நிறுத்தத்தால் வாடிக்கையாளர்கள் தொடர்ச்சியாக ஐந்து நாட்களுக்கு நேரில் சென்று வங்கிச் சேவைகளைப் பெறுவதில் சிரமங்களைச் சந்திக்க நேரிடலாம்.

ஞாயிறன்று வங்கிகள் செயல்படும்

இந்தநிலையில், வரும் ஞாயிற்றுக்கிழமை வங்கிகள் செயல்படும் என்று நிதியமைச்சகம் தெரிவித்துள்ளது. அந்த நாளில் பொதுமக்கள் தங்களுக்கான சேவைகளுக்கு வங்கிகளுக்கு செல்லலாம்.

=================