Railway Counter Ticket Travel Insurance Supreme Court Order
உச்ச நீதிமன்றம் உத்தரவு
இதுவரை ஆன்லைன் மூலம் ஐஆர்சிடிசி இணையதளத்தில் டிக்கெட் முன்பதிவு செய்யும் பயணிகளுக்கு மட்டுமே வழங்கப்பட்டு வந்த 'பயணக் காப்பீடு' (Travel Insurance) வசதி, இனி ரயில்வே ஸ்டேஷன் கவுண்டர்களில் நேரடியாக டிக்கெட் வாங்குவோருக்கும் கட்டாயமாக கிடைக்கவுள்ளது.
உச்ச நீதிமன்றம் பிறப்பித்துள்ள இந்த உத்தரவால், தினசரி ரயில்களில் பயணிக்கும் லட்சக்கணக்கான சாதாரண மற்றும் நடுத்தர மக்கள் பயனடைவர்.
வழக்கின் பின்னணியும் அவசியமும்
பாலசோர் ரயில் விபத்து : 2023-ஆம் ஆண்டு ஜூன் மாதம் ஒடிசா மாநிலம் பாலசோரில் நடைபெற்ற கோர ரயில் விபத்தைத் தொடர்ந்து, பயணிகளின் பாதுகாப்பு மற்றும் 'கவாச்' (Kavach) பாதுகாப்பு அமைப்பை அமல்படுத்துவது தொடர்பாக உச்ச நீதிமன்றத்தில் மனு தாக்கல் செய்யப்பட்டது.
உச்ச நீதிமன்றத்தின் கேள்வி
இந்த மனுவை விசாரித்த நீதிபதிகள் அஹ்சானுதீன் அமானுல்லா மற்றும் ஆர். மகாதேவன் அடங்கிய அமர்வு, "ஆன்லைனில் டிக்கெட் எடுப்பவர்களுக்கு மட்டுமே காப்பீடு வசதி வழங்கப்படுவதும், கவுண்டர்களில் நேரடியாக டிக்கெட் வாங்கும் ஏழை மக்களுக்கு இந்த நிதிப் பாதுகாப்பு மறுக்கப்படுவதும் ஏன்?" என்று கேள்வி எழுப்பியது.
ரயில்வே வாரியமே நேரடிப் பொறுப்பேற்க வேண்டும்
காப்பீட்டு நடைமுறைகளை உருவாக்க ஏற்கனவே அவகாசம் அளிக்கப்பட்டும் முன்னேற்றம் இல்லாததால், வரும் அக்டோபர் 27 முதல் அனைத்து ரயில் நிலைய கவுண்டர் டிக்கெட்டுகளுக்கும் காப்பீட்டுப் பாதுகாப்பை விரிவுபடுத்த வேண்டும் என்றும், தவறினால் ரயில்வே வாரியமே நேரடிப் பொறுப்பேற்க வேண்டும் என்றும் உச்ச நீதிமன்றம் கண்டிப்புடன் உத்தரவிட்டுள்ளது.
பயணக் காப்பீட்டின் மூலம் கிடைக்கும் இழப்பீட்டுத் தொகைகள்
தற்போது IRCTC ஆன்லைன் முன்பதிவில் வரிகள் உட்பட வெறும் 45 பைசா கட்டணத்தில் வழங்கப்படும் காப்பீட்டுப் பலன்கள்.
விபத்தில் உயிரிழப்பு ஏற்பட்டால் பாதிக்கப்பட்டவரின் குடும்பத்திற்கு ரூ. 10 லட்சம் நிதி உதவி.
விபத்தால் நிரந்தர முழு உடல் ஊனம் ஏற்பட்டால் ரூ. 10 லட்சம்.
நிரந்தர பகுதி உடல் ஊனம் (Permanent Partial Disability) ஏற்பட்டால் ரூ. 7,50,000.
காயமடைந்து சிகிச்சை பெறுவதற்கான மருத்துவச் செலவுக்கு ரூ. 2 லட்சம் வரை.
உயிரிழந்தவர்களின் உடலை சொந்த ஊருக்கு எடுத்துச் செல்ல ரூ. 10,000.
எழுந்துள்ள நடைமுறை சவால்கள்
இந்த உத்தரவை செயல்படுத்துவதில் சில முக்கிய சவால்கள் உள்ளதால் ரயில்வே வாரியம் சில விளக்கங்களை அளிக்க வேண்டியுள்ளது:
கட்டணம் வசூலிக்கும் முறை
ஆன்லைனில் விருப்பத் தேர்வாக (Opt-in) உள்ள இந்த 45 பைசா கட்டணம், கவுண்டர்களில் தனி விருப்பமாக சேர்க்கப்படுமா அல்லது டிக்கெட் கட்டணத்துடனேயே மொத்தமாக வசூலிக்கப்படுமா என்ற தெளிவு தேவைப்படுகிறது.
பயணிகள் விவரம் சேகரிப்பு
ஆன்லைனில் பயணி மற்றும் வாரிசுதாரர் (Nominee) விவரங்கள் எளிதில் பதிவாகிவிடும். ஆனால், கவுண்டர்களில் சாதாரண அன்ரிசர்வ்டு (Unreserved) டிக்கெட் வாங்குவோரின் விவரங்கள் பதியப்படுவதில்லை என்பதால், விபத்தின் போது காப்பீட்டுத் தொகையை வழங்க எளிய அடையாள நடைமுறையை உருவாக்க வேண்டியிருக்கும்.
ஆன்லைன் மற்றும் கவுன்ட்டர் பயணிகள் இடையே இருந்த பாகுபாட்டைக் களைந்து, அனைத்துப் பயணிகளின் நிதிப் பாதுகாப்பையும் உறுதிசெய்யும் உச்ச நீதிமன்றத்தின் இந்த நடவடிக்கை மிகப்பெரிய வரவேற்பைப் பெற்றுள்ளது.
================