மத்திய உள்துறை அமைச்சகத்தின் உத்தரவின் அடிப்படையில், போராட்டங்கள் நடத்துவதற்கான அதிகாரப்பூர்வ இடங்கள் பட்டியலில் இருந்து ஜந்தர் மந்தர் நீக்கப்பட்டுள்ளது.
இதற்குப் பதிலாக, ராம்லீலா மைதானம், புராரி மைதானம் மற்றும் கிழக்கு டெல்லியில் உள்ள CBD மைதானம் ஆகிய மூன்று இடங்கள் புதிய போராட்டத் தளங்களாக அறிவிக்கப்பட்டுள்ளன.
டெல்லியில் முக்கியமான பகுதிகளில் போராட்டங்கள் நடைபெறும்போது போக்குவரத்து பாதிப்பு, பொதுமக்களுக்கு ஏற்படும் சிரமங்கள் மற்றும் சட்டம் ஒழுங்கு பிரச்சினைகள் ஏற்படுவதாகக் கூறப்படுகிறது.
இதைக் கருத்தில் கொண்டே போராட்டங்களுக்கான இடங்களை மாற்றும் முடிவு எடுக்கப்பட்டுள்ளதாகத் தகவல்கள் தெரிவிக்கின்றன.
புதிய இடங்களில் போராட்டங்களை நடத்துவதற்கான வழிகாட்டுதல்களும் நடைமுறைகளும் வெளியிடப்பட உள்ளன.
தலைமைத் தேர்தல் ஆணையர் ஞானேஷ் குமார் பதவி விலக வேண்டும் என வலியுறுத்தி, CJP அமைப்பு அக்டோபர் 10-ம் தேதி ஜந்தர் மந்தரில் போராட்டம் நடத்தத் திட்டமிட்டிருந்தது.
ஆனால், குறுகிய கால அவகாசத்தில் அனுமதி கோரியது, முந்தைய போராட்டங்களில் விதிமுறைகள் மீறப்பட்டதாகக் கூறப்பட்டது, பாதுகாப்பு மற்றும் போக்குவரத்துப் பிரச்சினைகள் ஆகிய காரணங்களைக் குறிப்பிட்டு டெல்லி போலீஸ் அனுமதி மறுத்தது.
மாற்று மூன்று இடங்கள் தேர்வு :
ஜந்தர் மந்தருக்குப் பதிலாக, டெல்லியில் போராட்டங்கள் நடத்துவதற்காக ராம்லீலா மைதானம், புராரி மைதானம் மற்றும் கிழக்கு டெல்லியில் உள்ள CBD மைதானம் என மூன்று இடங்கள் தேர்வு செய்யப்பட்டுள்ளன.
இனி இந்த இடங்களில் போராட்டங்களை நடத்துவதற்கான அனுமதி மற்றும் விதிமுறைகளைப் பின்பற்ற வேண்டியிருக்கும்.
ஜந்தர் மந்தர் அதிகாரப்பூர்வ போராட்டத் தளமாக நீக்கப்பட்டிருப்பதால், டெல்லியில் எல்லா இடங்களிலும் போராட்டம் நடத்தத் தடை விதிக்கப்பட்டுள்ளது என்று அர்த்தமல்ல.
அதற்குப் பதிலாக மாற்று இடங்கள் அறிவிக்கப்பட்டுள்ளன. இருப்பினும், அங்கு போராட்டம் நடத்துவதற்கும் போலீஸ் அனுமதி மற்றும் விதிமுறைகளைப் பின்பற்ற வேண்டியிருக்கும்.
=================