பிரதமர் நரேந்திர மோடியின் 76-வது பிறந்தநாளை முன்னிட்டு நடைபெற்று வரும் "சேவா சங்கல்ப் அபியான்" திட்டத்தின் ஒரு பகுதியாக, குஜராத்தின் வத்நகரில் இருந்து வாரணாசி நோக்கிச் செல்லும் சேவா யாத்ரா மோட்டார் சைக்கிள் பேரணியில் பங்கேற்றவர்களுடன் பிரதமர் மோடி காணொலி வாயிலாக உரையாடினார்.
அப்போது பேசிய பிரதமர் மோடி, கடந்த 12 ஆண்டுகளில் நாட்டின் நகர்ப்புற மற்றும் கிராமப்புற பகுதிகளுக்கு இடையேயான வளர்ச்சி இடைவெளி கணிசமாகக் குறைந்துள்ளதாக தெரிவித்தார்.
தற்போது கிராமங்களில் சாலை, மின்சாரம், குடிநீர் உள்ளிட்ட அடிப்படை உள்கட்டமைப்பு வசதிகள் பெருமளவில் மேம்பட்டுள்ளதாக அவர் கூறினார்.
மத்திய அரசின் பல்வேறு திட்டங்கள் மூலம் கிராமப்புறங்களில் சாலைகள் அமைத்தல், வீடுகள் கட்டுதல், மின்சார வசதி விரிவாக்கம் மற்றும் குடிநீர் திட்டங்கள் செயல்படுத்தப்பட்டதாக பிரதமர் குறிப்பிட்டார்.
இதன் மூலம் கிராமப்புற மக்களின் வாழ்க்கைத் தரம் உயர்ந்துள்ளதாகவும் அவர் தெரிவித்தார்.
2014-ஆம் ஆண்டு தனது அரசு பதவியேற்ற பிறகு நாட்டில் பெண்களின் சுயசார்பு மற்றும் தொழில்முனைவு திறன் அதிகரித்துள்ளதாக பிரதமர் மோடி கூறினார்.
பெண்கள் பொருளாதார ரீதியாக வலுப்பெற பல்வேறு திட்டங்கள் செயல்படுத்தப்பட்டுள்ளதாகவும் அவர் சுட்டிக்காட்டினார்.
வெறும் வாக்கு வங்கி அரசியலுக்காக மட்டுமல்லாமல், சமூகத்தில் தொடர்ச்சியான சீர்திருத்தங்களையும் நேர்மறையான மாற்றங்களையும் உருவாக்க அரசியல்வாதிகளும் பொதுமக்களும் இணைந்து செயல்பட வேண்டும் என்று பிரதமர் வலியுறுத்தினார்.
மோடியின் பிறந்த ஊரான குஜராத்தின் வத்நகரில் இருந்து, அவரது மக்களவைத் தொகுதியான உத்தரப் பிரதேசத்தின் வாரணாசி வரை நடைபெறும் இந்த சேவா யாத்ரா பேரணி, செப்டம்பர் 17 அன்று தொடங்கப்பட்டு அக்டோபர் 7 அன்று நிறைவடைகிறது.
சேவை, சமூக நலன், இளைஞர் பங்கேற்பு மற்றும் கலாசார ஒருங்கிணைப்பை மக்களிடம் கொண்டு செல்லும் நோக்கத்துடன் இந்தப் பேரணி நடத்தப்பட்டு வருகிறது.
தனது வாழ்க்கையை வடிவமைத்த மதிப்புகளையும், சமூக சேவையின் முக்கியத்துவத்தையும் இந்த யாத்ரா எடுத்துக்காட்டுவதாக பிரதமர் மோடி தெரிவித்தார்.
நாட்டின் பல பகுதிகளை இணைக்கும் இந்தப் பேரணி, சேவை மனப்பான்மையை மக்களிடம் கொண்டு செல்லும் முயற்சியாக அமைந்துள்ளதாகவும் அவர் கூறினார்.
======================