தேர்தல் ஆணையருக்கு கூடுதல் பாதுகாப்பு :
இந்திய தலைமைத் தேர்தல் ஆணையர் ஞானேஷ் குமாருக்கு வழங்கப்பட்டு வந்த Z+ பாதுகாப்பு மேலும் பலப்படுத்தப்பட்டுள்ளதாக தகவல் வெளியாகியுள்ளது.
வாக்காளர் பட்டியல் சிறப்பு தீவிர திருத்தப் பணிகள் (SIR) தொடர்பாக எழுந்துள்ள சர்ச்சைகள் மற்றும் தொடர்ச்சியான போராட்டங்களைத் தொடர்ந்து இந்த நடவடிக்கை எடுக்கப்பட்டுள்ளதாக கூறப்படுகிறது.
கடந்த சில வாரங்களாக வாக்காளர் பட்டியல் திருத்த நடவடிக்கைகள் குறித்து எதிர்க்கட்சிகள் கடுமையான எதிர்ப்பை பதிவு செய்து வருகின்றன.
தலைமைத் தேர்தல் ஆணையர் ஞானேஷ் குமார் பதவி விலக வேண்டும் எனக் கோரி டெல்லியில் பல்வேறு போராட்டங்கள் நடைபெற்றன.
இந்த சூழலில் புதிய பாதுகாப்பு அச்சுறுத்தல் தகவல்கள் கிடைத்ததைத் தொடர்ந்து, அவரது பாதுகாப்பு வளையம் மேலும் வலுப்படுத்தப்பட்டுள்ளது.
டெல்லியில் உள்ள ஞானேஷ் குமாரின் இல்லம், தேர்தல் ஆணைய தலைமையகம் நிர்வாசன் சதன் (Nirvachan Sadan) மற்றும் அவரது தனிப்பட்ட பாதுகாப்பு அணியில் கூடுதல் பாதுகாப்பு பணியாளர்கள் நியமிக்கப்பட்டுள்ளதாக அதிகாரிகள் தெரிவித்துள்ளனர்.
அவரது வீட்டைச் சுற்றியும், தேர்தல் ஆணைய அலுவலகத்தைச் சுற்றியும் மத்திய பாதுகாப்புப் படையினர் மற்றும் டெல்லி போலீசார் அதிக அளவில் குவிக்கப்பட்டுள்ளனர்.
Z+ பாதுகாப்பு என்பது இந்தியாவில் பிரதமருக்கான SPG பாதுகாப்புக்கு அடுத்தபடியாக வழங்கப்படும் உயர்மட்ட பாதுகாப்பு பிரிவாகும்.
இந்த பாதுகாப்பின் கீழ் 50-க்கும் மேற்பட்ட பாதுகாப்பு அதிகாரிகள், ஆயுதப்படை வீரர்கள் மற்றும் தனிப்பட்ட பாதுகாப்பு அதிகாரிகள் 24 மணி நேரமும் பாதுகாப்பு வழங்குவார்கள்.
வாக்காளர் பட்டியல் திருத்தப் பணிகளில் முறைகேடு நடந்ததாக எதிர்க்கட்சிகள் குற்றஞ்சாட்டி வருகின்றன.
இதுதொடர்பாக டெல்லியில் நடைபெற்ற போராட்டங்களில் ராகுல் காந்தி உள்ளிட்ட எதிர்க்கட்சி தலைவர்கள் பங்கேற்றனர்.
ஆனால் தேர்தல் ஆணையம் மற்றும் மத்திய அரசு இந்த குற்றச்சாட்டுகளை மறுத்து வருகின்றன.
==================