UP Youth Aman Long Walk to Chennai to Meet CM Vijay TVK
தமிழக முதலமைச்சர் விஜய்யின் மக்கள் நலன் சார்ந்த ஆட்சியைப் பாராட்டியும், அவருக்கு நேரில் வாழ்த்துத் தெரிவிப்பதற்காகவும் உத்தரப் பிரதேச மாநிலத்தை சேர்ந்த 24 வயது இளைஞர் ஒருவர் அலிகரில் இருந்து தமிழ்நாடு நோக்கி நெடிய நடைபயணத்தைத் தொடங்கியுள்ளார்.
2 வாரங்களில் தெலுங்கானா வருகை – இளைஞரின் லட்சியம்
உத்தரப் பிரதேச மாநிலம் அலிகரை சேர்ந்த அமன் என்ற அந்த 24 வயது இளைஞர், கடந்த ஜூலை 3-ம் தேதி தனது லட்சிய நடைபயணத்தை அலிகரில் இருந்து தொடங்கினார். தொடர்ந்து சுமார் இரண்டு வாரங்களாக இடைவிடாது பயணித்த அமன், நேற்று முன்தினம் (16-7-2026) தெலுங்கானா மாநிலத்தின் ஆதிலாபாத் மாவட்டத்தை வந்தடைந்தார்.
தெலங்கானாவில் செய்தியாளர்களை சந்தித்த அமன் தனது பயணத்தின் நோக்கம் குறித்துப் பகிர்ந்து கொண்டார்.
அப்போது அவர் கூறியதாவது...
தமிழ்நாட்டின் வளர்ச்சி மற்றும் மக்கள் நலன் சார்ந்த சிறப்பான ஆட்சிக்காக முதலமைச்சர் விஜய்க்கு நேரில் வாழ்த்து தெரிவிக்க விரும்புகிறேன். இது போன்ற வளர்ச்சி சார்ந்த தொலைநோக்குப் பார்வை மற்றும் அணுகுமுறையைக் கொண்ட தலைவர்கள் நம் நாட்டில் அதிகம் உருவானால் ஒட்டுமொத்த இந்தியாவும் பெரும் பயன்பெறும்.
அதுமட்டுமல்லாமல், தமிழக முதலமைச்சர் விஜய் அவர்கள் விரைவில் தேசிய அரசியலிலும் பங்கற்ற வேண்டும் என்று அவரிடம் நேரில் வலியுறுத்த விரும்புகிறேன்.
ஆங்காங்கே குவியும் மக்களின் ஆதரவு
தனது இந்த நீண்ட தூர நடைபயணத்தின் போது, கடந்து வந்த பல நகரங்கள் மற்றும் கிராமங்களில் உள்ள பொதுமக்கள் தனக்கு உணவு, குடிநீர் மற்றும் தற்காலிகமாகத் தங்குமிடம் வழங்கிப் பெருமளவில் உதவியதாக அமன் நெகிழ்ச்சியுடன் குறிப்பிட்டார்.
மேலும், வழியில் பலரும் தன்னை ஊக்கப்படுத்தி, தனது பயணத்தின் நோக்கம் குறித்து கேட்டறிந்ததாகவும் அவர் தெரிவித்துள்ளார்.
ஏற்கனவே ஓவைசிக்காக நடந்தவர்
இளைஞர் அமன் இது போன்ற ஒரு நெடிய விழிப்புணர்வு நடைபயணத்தை மேற்கொள்வது இது முதன்முறையல்ல.
இதற்கு முன்னதாக, கடந்த 2025 ஆம் ஆண்டில் ஏஐஎம்ஐஎம் (AIMIM) கட்சித் தலைவரும், ஹைதராபாத் நாடாளுமன்ற உறுப்பினருமான அசாதுதீன் ஓவைசியைச் சந்திப்பதற்காகவும் இதேபோல் அலிகரில் இருந்து ஹைதராபாத் வரை வெற்றிகரமாக நடைபயணம் மேற்கொண்டார் என்பது குறிப்பிடத்தக்கது.
தற்போது தமிழக முதல்வர் விஜய்யைச் சந்திக்க உ.பி-யிலிருந்து கிளம்பியுள்ள இந்த வடமாநில இளைஞரின் நடைபயணத் தகவல்கள் சமூக வலைதளங்களில் விஜய் ரசிகர்களால் வைரலாக்கப்பட்டு வருகின்றன.
====