சாதிவாரி கணக்கெடுப்பு : செயலி மூலம் சாதியை தேர்வு செய்யும் முறையை அமல்படுத்த வேண்டும் : அன்புமணி ராமதாஸ் வலியுறுத்தல்..!

சாதிவாரி மக்கள்தொகை கணக்கெடுப்பின் போது, சாதியின் பெயரை மக்களிடம் கேட்டுப் பதிவு செய்யும் நடைமுறையைக் கைவிட்டு, கணக்கெடுப்புக்கான செயலியில் OBC சாதிகளின் பட்டியலை இணைத்து, அதிலிருந்து சாதியின் பெயரையும் எண்ணையும் தேர்வு செய்யும் முறையை மத்திய அரசு பின்பற்ற வேண்டும் என பாமக தலைவர் அன்புமணி ராமதாஸ் வலியுறுத்தியுள்ளார்.

மத்திய அரசின் விளக்கமும் பாமகவின் எதிர்ப்பும்

தேசிய அளவில் நடத்தப்படும் சாதிவாரி மக்கள்தொகை கணக்கெடுப்பில், ஓபிசி பட்டியலில் இருப்பவை வகுப்புகள் தானே தவிர முழுமையான சாதிகள் அல்ல என்பதால், பட்டியலை செயலியில் இணைக்கும் முடிவு கைவிடப்பட்டதாக மத்திய அரசு அதிகாரிகள் தெரிவித்துள்ளனர்.

மத்திய அரசின் இந்த வாதம் பலவீனமானது என்றும், ஏற்றுக்கொள்ள முடியாதது என்றும் அன்புமணி ராமதாஸ் சுட்டிக்காட்டியுள்ளார்.

95 ஆண்டுகளுக்குப் பிறகு மீண்டும் சாதிவாரி மக்கள்தொகை கணக்கெடுப்பு நடத்தப்பட்டு வரும் நிலையில், சாதியின் பெயரை நேரடியாக கேட்டு எழுதுவது குழப்பத்திற்கே வழிவகுக்கும் என பாட்டாளி மக்கள் கட்சி தொடர்ந்து எதிர்ப்பு தெரிவித்து வருகிறது.

ஓபிசி பட்டியலின் வரலாற்றுப் பின்னணி

1955-ஆம் ஆண்டு காகா கலேல்கர் தலைமையிலான முதலாம் தேசிய பிற்படுத்தப்பட்டோர் ஆணையம் தயாரித்த பட்டியலில் 2,399 சாதிகள் இடம் பெற்றிருந்தன.

அதன்பின் 1980-ஆம் ஆண்டு மண்டல் ஆணையம் தாக்கல் செய்த அறிக்கையில், சாதியின் அடிப்படையில் மட்டுமின்றி சில தொழில் பிரிவினரையும், நாடோடிக் குழுக்களையும் அவர்களின் சமூக பொருளாதார நிலையைக் கருத்தில் கொண்டு ஓபிசி பட்டியலில் இணைத்தது.

தமிழ்நாட்டிலும் திருநங்கையர் என்பது சாதியின் பெயர் அல்ல என்ற போதிலும், அவர்களின் சமூக பொருளாதார நிலையைக் கருத்தில் கொண்டு மிகவும் பிற்படுத்தப்பட்ட வகுப்பில் சேர்க்கப்பட்டுள்ளதை அவர் உதாரணமாக சுட்டிக்காட்டியுள்ளார்.

நோக்கம் சிதையும் அபாயம்

சாதியின் பெயரை மக்களிடமே கேட்டு பதிவு செய்யும் முறை பின்பற்றப்பட்டால், இந்தியாவில் ஒட்டுமொத்தமாக 4,147 சாதிகள் மட்டுமே உள்ள நிலையில், 46.70 லட்சம் சாதிகள் இருப்பதாகத் தவறான கணக்கெடுப்பு முடிவுகள் வரக்கூடும்.

இது சாதிவாரி மக்கள்தொகை கணக்கெடுப்பின் முதன்மை நோக்கத்தையே சிதைத்து விடும் என அவர் எச்சரித்துள்ளார்.

மத்திய அரசுக்கு பாமகவின் கோரிக்கை

சாதிவாரி மக்கள்தொகை கணக்கெடுப்பில் செயலியில் ஓபிசி சாதிகளின் பட்டியலை இணைத்து சாதியின் பெயரையும் எண்ணையும் தேர்வு செய்யும் முறையை நடைமுறைப்படுத்த வேண்டும்.

இது தொடர்பாக கடந்த ஆகஸ்ட் 14-ஆம் தேதி அரசிதழில் வெளியிடப்பட்ட சட்டப்பூர்வ ஆணை S.O. 4505(E)-ஐ ரத்து செய்துவிட்டு, புதிய ஆணையை மத்திய அரசு உடனடியாகப் பிறப்பிக்க வேண்டும் என்று அன்புமணி ராமதாஸ் கோரிக்கை விடுத்துள்ளார்.

=====