குளிர்கால கூட்டத்தொடர்
Parliament Winter Session 2025 Schedule Dates in Tamil : நாடாளுமன்ற குளிர்கால கூட்டம் டிசம்பர் 1ம் தேதி ( நாளை ) முதல் 19ம் தேதி வரை நடைபெறவுள்ளது. பிகார் தேர்தலில் கிடைத்த அமோக வெற்றியால், உற்சாகத்துடன் உள்ள தேசிய ஜனநாயக கூட்டணி, இந்தக் கூட்டத் தொடரில் ஆர்வமுடன் பங்கேற்கிறது. பல்வேறு பிரச்சினைகளை எழுப்ப இந்தியா கூட்டணி திட்டமிட்டு இருக்கிறது.
வந்தே மாதரம் - 150வது ஆண்டு விழா
வந்தே மாதரம் பாடலின் 150வது ஆண்டு கொண்டாடப்படுவதால் அதன் வரலாறு குறித்த விவாதம் நாடாளுமன்றத்தில் நடைபெறும் என எதிர்பார்க்கப்படுகிறது. இந்தப் பாடலில் இருந்து முக்கிய வரிகள் கடந்த 1937ம் ஆண்டு நீக்கப்பட்டதே இந்தியாவின் பிரிவினைக்கு காரணம் என பிரதமர் நரேந்திர மோடி கூறி இருந்தார்.
வந்தே மாதரம்: வந்தே மாதரம் பாடலின் வரலாறு, சுதந்திர இயக்கத்தில் அதன் பங்கு குறித்து இளைஞர்களுக்கு நினைவூட்டுவதற்காக விவாதம் நடைபெறும் என அதிகாரிகள் கூறினர்.
10 மசோதாக்கள் தாக்கல்
அணு சக்தி, உயர் கல்வி, கார்ப்பரேட் சட்டம் மற்றும் பங்குச் சந்தை ஆகியவற்றில் மாற்றங்கள் கொண்டு வருவது தொடர்பாக 10 முக்கிய மசோதாக்களை குளிர்கால கூட்டத்தில் கொண்டு வரவும் மத்திய அரசு திட்டமிட்டள்ளது.
வரிந்து கட்டும் எதிர்க்கட்சிகள்
வாக்காளர் பட்டியல் சிறப்பு தீவிர திருத்தம், டெல்லி காற்று மாசு, வேலைவாய்ப்பின்மை தொடர்பான பிரச்சினைகள் குறித்து அவையில் விவாதிக்க எதிர்க்கட்சிகள் வலியுறுத்தும் என எதிர்பார்க்கப்படுகிறது.
ஆக்கப்பூர்வ விவாதம்
நாடாளுமன்ற குளிர்கால கூட்டத்தில் எந்த பிரச்சினை குறித்தும் விவாதிக்க தயார் என மத்திய அரசு தெரிவித்துள்ளது. ஒருமித்த கருத்துடன் அவையை சுமுகமாக நடத்துவதற்கு வேண்டுகோள் விடுக்க அனைத்து கட்சி கூட்டத்தை நாடாளுமன்ற விவகாரத்துறை அமைச்சர் கிரண் ரிஜிஜு நாளை கூட்டியுள்ளார்.
=====