”கட்டணமில்லா வெற்றிப் பயணம் திட்டம்” : தொலைதூர பேருந்துகளிலும் மகளிர் இலவச பயணம் : நாளை தொடங்கி வைக்கிறார் விஜய்.!

தமிழ்நாடு அரசு போக்குவரத்து கழகம்

தமிழ்நாட்டில் சென்னை, மதுரை, கோவை, சேலம் உள்ளிட்ட 8 அரசு போக்குவரத்து கழகங்கள் இயங்கி வருகின்றன.

தினமும் 1.76 கோடி பேர் பயணம்

இவற்றின் மூலம் தினசரி 20 ஆயிரத்துக்கும் அதிகமான பேருந்துகள் இயக்கப்பட்டு வருகின்றன. இந்த பேருந்துகள் வழியாக நாள்தோறும் சுமார் 1.76 கோடி மக்கள் பயணம் செய்து வருகிறார்கள்.

விடியல் பேருந்து திட்டம்

பள்ளி மாணவர்கள், பெண்கள், முதியவர்கள், மாற்றுத்திறனாளிகள் உள்ளிட்ட அனைத்து தரப்பினரும் அரசு பேருந்துகளை பெரிதும் நம்பி பயன்படுத்தி வருகின்றனர்.

இந்நிலையில், திமுக ஆட்சியில் விடியல் பேருந்து பயணம் திட்டம் மூலம் பெண்களுக்கு இலவச பயண திட்டம் அறிமுகப்படுத்தப்பட்டது.

தவெக ஆட்சி - திட்டம் விரிவாக்கம்

சட்டசபை தேர்தலில் வென்ற தவெக தலைவர் விஜய் இந்தத் திட்டம் விரிவுபடுத்தப்படும் என அறிவித்திருந்தார். இதற்கிடையே கடந்த சட்டசபை கூட்டத் தொடரில் 110 விதியின் கீழ் பேசிய முதலமைச்சர் விஜய், மகளிர் கட்டணமில்லா பேருந்து பயணத்திட்டம் வெற்றி பயணம் என்ற பெயரில் அக்டோபர் 2ஆம் தேதி முதல் விரிவுபடுத்தப்படும் என அறிவித்தார்.

7 அரசு போக்குவரத்துக் கழகங்களில் சாதாரண பேருந்துகள் மற்றும் 40 கிலோமீட்டர் வரையிலான மலைப்பகுதி சாதாரண பேருந்துகளில் மகளிர் கட்டணம் இன்றி பயணம் மேற்கொண்டு வருகின்றனர்.

ஏசியை தவிர்த்து மற்ற பேருந்துகளில் இலவசம்

வெற்றி பயணத் திட்டத்தின் மூலம் இந்த சேவை மாநகர் நகர் பகுதியில் இயங்கும் எக்ஸ்பிரஸ், எல்எஸ்எஸ், டீலக்ஸ் அரசு பேருந்துகள், புறநகர் சாதாரண பேருந்துகள் மற்றும் 40 கிலோ மீட்டருக்கு மேற்பட்ட மலைப்பகுதி சாதாரண பேருந்துகள் ஆகியவற்றுக்கு பொருந்தும்.

12,692 பேருந்துகளுக்கு விரிவாக்கம்

மொத்தம் 12,692 பேருந்துகள் இந்த திட்டத்தின் கீழ் கொண்டு வரப்படுகின்றன. இதன் மூலம் ஒரு நாளைக்கு 84 லட்சம் மகளிர் பயன்பெறுவார்கள்.

முதல்வர் விஜய் தொடங்கி வைக்கிறார்

மகாத்மா காந்தியடிகளின் பிறந்த நாளான நாளை (அக்டோபர் 2ம் தேதி), விரிவாக்கம் செய்யப்பட்ட வெற்றிப் பயணத் திட்டத்தை தொடங்கி வைக்கிறார் முதல்வர் விஜய்.

84 லட்சம் பேர் பயன் பெறுவர்

12,600 பேருந்துகள் இந்த திட்டத்தின் கீழ் இயக்கப்பட உள்ளன. இது அரசு போக்குவரத்து கழகத்தில் உள்ள பேருந்துகளின் எண்ணிக்கையில், கிட்டத்தட்ட 69% என்பது குறிப்பிடத்தக்கது.

ஒரு நாளைக்கு 1 லட்சத்து 94 ஆயிரம் நடைகள் இயக்கப்படும் நிலையில், 1,65,312 நடைகள் (85 விழுக்காடு) இந்த பயணத்தின் மூலம் இயக்கப்படுகிறது. இதனால் சுமார் 84 லட்சம் மகளிர் பயன்பெறுவார்கள்.

தமிழக மகளிருக்கு எளிதில் அணுகக்கூடிய பொது போக்குவரத்து வசதி பெருமளவில் இந்த திட்டத்தின் மூலம் கிடைக்கும் எனவும், மாணவிகள் தொலைதூரத்தில் உள்ள கல்லூரிகளுக்கு செல்லவும்...

மகளிர் தங்கள் பணியிடங்களுக்கு செல்லவும், மருத்துவம் மற்றும் அத்தியாவசிய சேவைகளுக்கு கட்டணம் இன்றி பேருந்துகளில் பயணிக்க முடியும் என்பது குறிப்பிடத்தக்கது.

======