விளையாட்டு உள்கட்டமைப்பில் புதிய அத்தியாயம் :
தமிழக சட்டப்பேரவையில் 110-வது விதியின் கீழ் முதலமைச்சர் ச. ஜோசப் விஜய் பல முக்கிய அறிவிப்புகளை வெளியிட்டார்.
அதில் முக்கியமாக, சென்னையில் உலகத் தரத்திலான தமிழ்நாடு ஒலிம்பிக் நகரம் மற்றும் மாநிலத்தில் மோட்டார் ஸ்போர்ட்ஸ் நகரம் அமைக்கப்படும் என்று அறிவித்தார்.
சென்னையில் உலகத் தரத்திலான ஒலிம்பிக் நகரம் :
தமிழ்நாடு விளையாட்டு மேம்பாட்டு ஆணையம் (SDAT) மூலம் உருவாக்கப்பட உள்ள ஒலிம்பிக் நகரத்தில் உலகத் தரத்திலான விளையாட்டு அரங்கங்கள், அதிநவீன பயிற்சி வசதிகள், உயர்தர செயல்திறன் பயிற்சி மையம் (High Performance Training Centre), விளையாட்டு அறிவியல் மற்றும் விளையாட்டு மருத்துவ மையங்கள் அமைக்கப்பட உள்ளன.
வீரர்கள் மற்றும் பயிற்சியாளர்களுக்கான தங்குமிட வசதிகளும் இதில் இடம்பெறும்.
ஒலிம்பிக் பதக்க இலக்கை நோக்கி தமிழகம் :
தமிழக வீரர்கள் ஒலிம்பிக் மற்றும் பிற சர்வதேச போட்டிகளில் அதிக பதக்கங்களை வெல்லும் வகையில் ஒருங்கிணைந்த விளையாட்டு சூழலை உருவாக்குவதே இந்தத் திட்டத்தின் முக்கிய நோக்கமாகும்.
திறமையான இளம் வீரர்களை உலகத் தரத்திற்கு கொண்டு செல்ல இந்த நகரம் உதவும் என அரசு நம்பிக்கை தெரிவித்துள்ளது.
மோட்டார் ஸ்போர்ட்ஸ் நகரம் உருவாகிறது :
இளைஞர்களிடையே அதிகரித்து வரும் மோட்டார் ஸ்போர்ட்ஸ் ஆர்வத்தை ஊக்குவிக்கும் வகையில், புதிய மோட்டார் ஸ்போர்ட்ஸ் நகரம் அமைக்கப்படும் என்றும் முதல்வர் அறிவித்தார்.
இதில் சர்வதேச தரத்திலான பந்தயத் தடங்கள், பயிற்சி மையங்கள் மற்றும் நவீன உள்கட்டமைப்பு வசதிகள் உருவாக்கப்பட உள்ளன
ஃபார்முலா போட்டிகளுக்கான வசதி :
ஃபார்முலா 1, ஃபார்முலா 2, ஃபார்முலா 3 மற்றும் ஃபார்முலா 4 உள்ளிட்ட சர்வதேச மோட்டார் பந்தயங்களை நடத்தும் வகையில் இந்த நகரம் வடிவமைக்கப்படும்.
இதன் மூலம் விளையாட்டு சுற்றுலா, வேலைவாய்ப்பு மற்றும் பொருளாதார வளர்ச்சி ஆகியவை மேம்படும் என எதிர்பார்க்கப்படுகிறது
தமிழகத்தை சர்வதேச விளையாட்டு மையமாக மாற்றும் முயற்சி :
ஒலிம்பிக் நகரம் மற்றும் மோட்டார் ஸ்போர்ட்ஸ் நகரம் ஆகிய இரு திட்டங்களும் தமிழகத்தை இந்தியாவின் முன்னணி விளையாட்டு மாநிலமாக மட்டுமல்லாமல், சர்வதேச விளையாட்டு மையமாகவும் மாற்றும் நோக்கத்துடன் அறிவிக்கப்பட்டுள்ளன.
இந்த அறிவிப்பு விளையாட்டு வீரர்கள் மற்றும் இளைஞர்களிடையே பெரும் வரவேற்பைப் பெற்றுள்ளது.