கொளத்தூர் தொகுதியில் EVM மறுசோதனை : என்னென்ன விதிமுறைகள்?, முழு விவரங்கள்!

சென்னை கொளத்தூர் சட்டமன்றத் தொகுதியில் உள்ள 14 வாக்குச்சாவடிகளில், மின்னணு வாக்குப்பதிவு இயந்திரங்களின் (EVM) மறுசோதனைப் பணிகள் தொடங்கியுள்ளன.

திமுக தலைவர் மு.க.ஸ்டாலின் தோல்வி

கடந்த சட்டமன்றத் தேர்தலில் கொளத்தூர் தொகுதியில் போட்டியிட்ட தி.மு.க தலைவர் மு.க.ஸ்டாலின், த.வெ.க வேட்பாளர் வி.எஸ்.பாபுவிடம் 8,795 வாக்குகள் வித்தியாசத்தில் தோல்வியடைந்தார்.

EVM-களை சரிபார்க்க தேர்தல் ஆணையம் உத்தரவு

வாக்கு எண்ணிக்கையில் குளறுபடி நடந்துள்ளதாக அளிக்கப்பட்ட புகாரின் பேரில், 14 வாக்குச்சாவடிகளின் EVM-களை மீண்டும் சரிபார்க்கத் தேர்தல் ஆணையம் உத்தரவிட்டது.

இதன்படி, சிந்தாதிரிப்பேட்டையில் உள்ள பாதுகாப்பு அறையில் முகவர்கள் முன்னிலையில் சீல் உடைக்கப்பட்டு, தினமும் 2 வாக்குச்சாவடிகள் வீதம் 7 நாட்களுக்கு இந்தச் சரிபார்ப்புப் பணி நடைபெறுகிறது.

இந்தியத் தேர்தல் ஆணையம் மற்றும் உச்ச நீதிமன்ற வழிகாட்டுதலின்படி, வாக்குப்பதிவு இயந்திரங்களை மறுசோதனை செய்வதற்கான விதிமுறைகள் மற்றும் நடைமுறைகள்....

கட்டணம் மற்றும் விண்ணப்பிக்கும் காலம்

தேர்தலில் 2-வது அல்லது 3-வது இடம் பிடித்த வேட்பாளர்கள், தேர்தல் முடிவுகள் வெளியான 7 நாட்களுக்குள் மறுசோதனைக்கு விண்ணப்பிக்கலாம்.

ஒரு EVM தொகுப்பிற்கு (Control Unit, Ballot Unit, VVPAT ஆகிய மூன்று அலகுகளும் சேர்த்து) 18% ஜி.எஸ்.டி-யுடன் ₹47,200 கட்டணமாகச் செலுத்த வேண்டும்.

யார் யார் முன்னிலையில் சோதனை நடைபெறும்?

• EVM சரிபார்ப்புப் பணிகள் முழுமையாக வெளிப்படைத்தன்மையுடன் பின்வரும் நபர்களின் முன்னிலையில் நடைபெறும்.

• தேர்தல் ஆணைய அதிகாரிகள் மற்றும் மாவட்டத் தேர்தல் அதிகாரிகள்.

• EVM இயந்திரங்களைத் தயாரித்த BEL அல்லது ECIL நிறுவனங்களின் அங்கீகரிக்கப்பட்ட பொறியாளர்கள்.

• மறுசோதனை கோரிய வேட்பாளர் அல்லது அவரது அதிகாரப்பூர்வ பிரதிநிதி.

• தேர்தலில் போட்டியிட்ட மற்ற வேட்பாளர்கள் அல்லது அவர்களின் அங்கீகரிக்கப்பட்ட பிரதிநிதிகள் (விரும்பினால் பங்கேற்கலாம்).

EVM மறுசோதனை எவ்வாறு மேற்கொள்ளப்படும்?

பாதுகாப்பு அறையிலிருந்து கொண்டுவரப்படும் EVM இயந்திரங்கள் அனைவரின் முன்னிலையிலும் சோதனைக் கட்டுப்பாட்டிற்குத் தயாராக்கப்படும்.

இயந்திரத்தில் குறைந்தபட்சம் 500 முதல் அதிகபட்சமாக 1,500 மாதிரி வாக்குகள் பதிவு செய்யப்படும்.

எந்தெந்த வேட்பாளருக்கு எத்தனை மாதிரி வாக்குகள் பதிவு செய்யப்பட வேண்டும் என்பதை மறுசோதனை கோரிய வேட்பாளரே அல்லது அவரது பிரதிநிதியோ தீர்மானிக்கலாம்.

சரிபார்ப்பு முறை

மாதிரி வாக்குகள் பதிவு செய்யப்படும்போது VVPAT இயந்திரத்தில் ஒவ்வொரு வாக்கிற்கும் உரிய சீட்டு வெளியாகும்.

பதிவு செய்யப்பட்ட வாக்குகளின் எண்ணிக்கை, EVM திரை காட்டும் முடிவுகள் மற்றும் VVPAT சீட்டுகளைக் கையால் எண்ணிய முடிவுகள் ஆகிய மூன்றும் 100% சரியாகப் பொருந்துகிறதா என ஒப்பிட்டுப் பார்க்கப்படும்.

இவை மூன்றும் துல்லியமாகப் பொருந்தினால், அந்த EVM இயந்திரம் சரியாக செயல்பட்டுள்ளது என அதிகாரப்பூர்வமாக உறுதி செய்யப்படும்.

=====