High honor for Major Mukund Varadarajan: Corporation approves naming the Velachery-Tambaram highway after him!
மறைந்த ராணுவ அதிகாரி மேஜர் முகுந்த் வரதராஜன்
இந்திய நாட்டின் பாதுகாப்பிற்காக தனது உயிரைத் தியாகம் செய்த சென்னையைச் சேர்ந்த மறைந்த ராணுவ அதிகாரி மேஜர் முகுந்த் வரதராஜனை கௌரவிக்கும் விதமாக, சென்னையில் உள்ள முக்கிய நெடுஞ்சாலை ஒன்றிற்கு அவரது பெயரைச் சூட்ட தாம்பரம் மாநகராட்சி அதிகாரப்பூர்வமாக ஒப்புதல் அளித்துள்ளது.
வீர மரணமடைந்தார் மேஜர் முகுந்த்
சென்னையில் பிறந்து வளர்ந்த மேஜர் முகுந்த் வரதராஜன், ராணுவப் பணியின் போது காஷ்மீரில் தீவிரவாதிகளுக்கு எதிரான தாக்குதலில் போரிட்டு வீர மரணமடைந்தார்.
அசோக சக்ரா விருதாளர்
இவரது அசாத்திய துணிச்சலையும் தியாகத்தையும் போற்றும் வகையில், இந்தியாவின் உயரிய அமைதிக்கான வீரதீர விருதான 'அசோக சக்ரா' விருது இவருக்கு மரணத்திற்குப் பின் வழங்கி கௌரவிக்கப்பட்டது.
16 கி.மீ நீள நெடுஞ்சாலைக்கு பெயர்
தற்போது, சென்னை மாநகரின் முக்கிய போக்குவரத்து இணைப்புகளில் ஒன்றாகத் திகழும் 16 கிலோமீட்டர் நீளமுள்ள வேளச்சேரி - தாம்பரம் நெடுஞ்சாலைக்கு, "மேஜர் முகுந்த் வரதராஜன் நெடுஞ்சாலை" எனப் பெயர் சூட்டுவதற்கு தாம்பரம் மாநகராட்சி தனது முழு ஒப்புதலை வழங்கியுள்ளது.
இராணுவ வீரரின் துணிச்சல், தியாகம் மற்றும் தேசப்பற்றை அடுத்த தலைமுறைக்கு கொண்டு சேர்க்கும் வகையிலும், அவருக்கு செய்யும் நிரந்தர அஞ்சலியாகவும் இந்த நடவடிக்கை அமைந்துள்ளதாக பாராட்டுகள் குவிந்து வருகின்றன.
அமரன் திரைப்படம்
கடந்த 2024 ஆம் ஆண்டு ராஜ்குமார் பெரியசாமி இயக்கத்தில் சிவகார்த்திகேயன், சாய் பல்லவி நடிப்பில் இவரது வாழ்க்கை வரலாற்றை மையமாக வைத்து வெளியான 'அமரன்' திரைப்படம் மக்கள் மத்தியில் பெரும் வரவேற்பைப் பெற்றிருந்த நிலையில் , மாநகராட்சியின் இந்த அறிவிப்பு பொதுமக்களிடையே நெகிழ்ச்சியை ஏற்படுத்தியுள்ளது.
=====