வீரமணி வழக்கில் நடவடிக்கை எடுப்பதில் தாமதம் ஏற்பட்டதாக எழுந்த குற்றச்சாட்டுகளை தொடர்ந்து, இந்த விவகாரத்தில் அலட்சியம் காட்டியவர்கள் மீது கடும் நடவடிக்கை எடுக்க வேண்டும் என முதல்வர் ஜோசப் விஜய் காவல்துறைக்கு உத்தரவிட்டுள்ளார்.
வழக்கை மறைக்கவோ, தாமதப்படுத்தவோ முயன்றவர்கள் இருந்தால் அவர்கள் மீதும் நடவடிக்கை எடுக்கப்படும் என கூறப்பட்டுள்ளது.
இந்நிலையில் செய்தியாளர்களை சந்தித்த அமைச்சர் ராஜ்மோகன், “குழந்தைகளுக்கு எதிரான குற்றங்களில் அரசு எந்த சமரசமும் செய்யாது.
சட்டத்தின் முன் அனைவரும் சமம். இந்த வழக்கில் தொடர்புடையவர்கள் யாராக இருந்தாலும் சட்டப்படி நடவடிக்கை எடுக்கப்படும். யாரும் தப்ப முடியாது” என்று தெரிவித்துள்ளார்.
மேலும், பாதிக்கப்பட்டவர்களுக்கு நீதி கிடைப்பதை உறுதி செய்வதே அரசின் முதன்மை நோக்கம் என்றும் அவர் கூறியதாக தகவல்கள் வெளியாகியுள்ளன.
ஜெம் வீரமணி வழக்கு குறித்து செய்தியாளர்களின் கேள்விக்கு பதிலளித்த அமைச்சர் ராஜ்மோகன், கடந்த ஆட்சிக் காலத்தில் இந்த விவகாரத்தில் உரிய நடவடிக்கை எடுக்கப்படவில்லை என்று குற்றம்சாட்டினார்.
சிறுமிகள் தொடர்பான குற்றச்சாட்டுகள் மற்றும் கிடைத்த ஆதாரங்கள் மீது உடனடி நடவடிக்கை எடுத்திருந்தால், பாதிக்கப்பட்டவர்களுக்கு விரைவாக நீதி கிடைத்திருக்கும் என்றும் அவர் கூறியதாக தகவல்கள் வெளியாகியுள்ளன.
இந்த வழக்கில் தாமதம் ஏற்பட்டதற்கான பொறுப்பை கடந்த ஆட்சியில் இருந்த தி.மு.க தலைவர்கள் விளக்க வேண்டும் என்றும், உண்மையை மறைக்க முயன்றவர்கள் யாராக இருந்தாலும் சட்டத்தின் முன் நிறுத்தப்பட வேண்டும் என்றும் ராஜ்மோகன் வலியுறுத்தினார்
வீரமணி வழக்கில் ஏற்கனவே பல முக்கிய முன்னேற்றங்கள் ஏற்பட்டுள்ளன. மேலும் சில சிறுமிகள் சாட்சியம் அளித்திருப்பதாகவும், நீதிமன்றத்தின் தலையீட்டுக்குப் பிறகே விசாரணை தீவிரமடைந்ததாகவும் தகவல்கள் வெளியாகியுள்ளன. இதனால் இந்த வழக்கு தமிழகம் முழுவதும் பெரும் கவனத்தை ஈர்த்துள்ளது.
வீரமணி வழக்கு சட்டரீதியான விசாரணையை தாண்டி அரசியல் விவாதமாகவும் மாறியுள்ளது.
அரசின் நடவடிக்கையை எதிர்க்கட்சிகள் கேள்வி எழுப்பி வரும் நிலையில், குழந்தைகளுக்கு எதிரான குற்றங்களில் எந்தவித அரசியல் தலையீடும் இருக்கக் கூடாது என்றும், உண்மை வெளிவர வேண்டும் என்றும் பல தரப்பினர் வலியுறுத்தி வருகின்றனர்.
===============