”அரசு பள்ளிகள் வினாத்தாள் கட்டணம் வசூலிக்க தடை” : தவெக அரசு முக்கிய உத்தரவு : மாணவர்கள் குஷி, பெற்றோர் வரவேற்பு.!

மாணவர்கள், பெற்றோர்கள் நிம்மதி

தமிழகத்தில் அரசுப் பள்ளிகளில் படிக்கும் மாணவர்களுக்கும் அவர்களின் பெற்றோர்களுக்கும் நிம்மதி அளிக்கும் வகையில் பள்ளிக்கல்வித்துறை முக்கிய சுற்றறிக்கையை வெளியிட்டுள்ளது.

கட்டணங்கள் வசூலிக்கத் தடை

அரசு மற்றும் அரசு நிதியுதவி பெறும் உயர்நிலை, மேல்நிலைப் பள்ளிகளில் 6 முதல் 12ஆம் வகுப்பு வரை படிக்கும் மாணவர்களிடம் தேர்வுகளுக்கான வினாத்தாள் கட்டணம் மற்றும் முறையற்ற கட்டணங்கள் வசூலிக்கக் கூடாது என அறிவுறுத்தப்பட்டுள்ளது.

முதலமைச்சர் விஜய் தலைமையிலான தமிழக அரசின் ஆட்சியில் வெளியாகியுள்ள இந்தச் சுற்றறிக்கை, பள்ளிகளில் நடைபெறும் கட்டண வசூல் நடைமுறைக்கு எதிரான முக்கிய நடவடிக்கையாகப் பார்க்கப்படுகிறது.

வசூல் நடைமுறைக்கு முற்றுப்புள்ளி

குறிப்பாக காலாண்டுத் தேர்வு, அரையாண்டுத் தேர்வு உள்ளிட்ட தேர்வுகளுக்கான வினாத்தாள்களை அச்சிடுவதற்காக மாணவர்களிடம் பணம் கேட்கப்படுவது தொடர்பாகப் பெற்றோர்கள் மத்தியில் நீண்ட நாட்களாகக் கவலை இருந்து வந்தது.

இந்த நிலையில், பள்ளிக்கல்வி இயக்குநர் அனைத்து மாவட்ட முதன்மைக் கல்வி அலுவலர்களுக்கும் உத்தரவு அனுப்பியிருப்பது கவனம் பெற்றுள்ளது. இதன் மூலம் மாணவர்களிடம் அங்கீகரிக்கப்படாத கட்டணங்கள் வசூலிக்கப்படுவதைத் தடுக்க நடவடிக்கை எடுக்கப்பட்டுள்ளது.

அரசு பள்ளிகளில் கட்டணம் பிரச்சினை

அரசுப் பள்ளிகளில் காலாண்டு, அரையாண்டு மற்றும் பிற தேர்வுகளுக்கான வினாத்தாள்களை அச்சிடுவதற்காக மாணவர்களிடம் குறிப்பிட்ட தொகை வசூலிக்கப்படுவதாகப் புகார்கள் எழுந்தன.

இந்தத் தொகை மாவட்டத்துக்கு மாவட்டம் மற்றும் வகுப்புகளுக்கு ஏற்ப மாறுபட்டதாக இருந்தது. இதுதொடர்பாக ஆசிரியர் சங்கம் தகவல் அறியும் உரிமைச் சட்டத்தின் மூலம் பல்வேறு விவரங்களைப் பெற்றது.

நீதிமன்றத்தில் கட்டண வசூல் பிரச்சினை

அதன்படி, 2025-26 கல்வியாண்டில் நாமக்கல் மாவட்டத்தில் ரூ.1.27 கோடியும், கன்னியாகுமரி மாவட்டத்தில் ரூ.1.36 கோடியும், புதுக்கோட்டை மாவட்டத்தில் ரூ.1.30 கோடியும் வினாத்தாள் கட்டணமாக வசூலிக்கப்பட்டதாகத் தகவல்கள் வெளியாகின.

இந்தப் பணத்துக்கு முறையான கணக்குகள் பராமரிக்கப்பட்டனவா, அதற்கான ரசீதுகள் வழங்கப்பட்டனவா, வினாத்தாள் அச்சிடும் பணிகளுக்கு அந்தத் தொகை முறையாகப் பயன்படுத்தப்பட்டதா போன்ற கேள்விகள் எழுந்தன. இந்த விவகாரம் நீதிமன்றத்தின் கவனத்துக்குக் கொண்டு செல்லப்பட்டது.

உயர்நீதிமன்ற மதுரைக்கிளையில் தொடரப்பட்ட வழக்கில், அரசு உயர்நிலை மற்றும் மேல்நிலைப் பள்ளிகளில் 6 முதல் 12ஆம் வகுப்பு வரை படிக்கும் மாணவர்களிடம் அங்கீகரிக்கப்படாத வினாத்தாள் கட்டணம் மற்றும் பிற முறையற்ற கட்டணங்களை வசூலிப்பதைத் தடுக்க வேண்டும் என்று கோரிக்கை வைக்கப்பட்டது.

உயர்நீதிமன்றம் முக்கிய உத்தரவு

வழக்கை விசாரித்த நீதிபதிகள் ஜி.ஆர். சுவாமிநாதன் மற்றும் பி. முருகன் அடங்கிய அமர்வு, கடந்த அக்டோபர் 23ஆம் தேதி வினாத்தாள் கட்டணம் மற்றும் பிற முறையற்ற கட்டணங்களை வசூலிப்பதற்கு எதிராக இடைக்காலத் தடை விதித்தது.

இந்த விவகாரம் தொடர்பாக தமிழக அரசும் பள்ளிக்கல்வித்துறை செயலரும் பதிலளிக்க உத்தரவிடப்பட்டது.

நீதிமன்றத்தின் இந்த உத்தரவை தொடர்ந்து, பள்ளிக்கல்வித்துறையின் தற்போது, கட்டணங்கள் வசூலிக்க தடை விதித்து உத்தரவு பிறப்பித்து இருக்கிறது.

மாணவர்கள், பெற்றோர்கள் மகிழ்ச்சி

இதன்மூலம் அரசு மற்றும் அரசு நிதியுதவி பெறும் உயர்நிலை, மேல்நிலைப் பள்ளிகளில் 6 முதல் 12ஆம் வகுப்பு வரை படிக்கும் மாணவர்களிடம் வினாத்தாள் கட்டணம் மற்றும் முறையற்ற கட்டணங்கள் வசூலிக்கப்படுவதைத் தடுக்க முடியும்.

ஏற்கெனவே புத்தகங்கள், போக்குவரத்து, சீருடை உள்ளிட்ட கல்வி சார்ந்த தேவைகளுக்காகச் செலவு செய்யும் பெற்றோர்களுக்கு இது கூடுதல் நிம்மதியை அளிக்கும்.

பள்ளிகளில் தேர்வுகளுக்காக வினாத்தாள் அச்சிடும் செலவை மாணவர்களிடம் வசூலிப்பது தொடர்பாகக் கேள்விகள் எழுந்து வந்த நிலையில், தற்போது நீதிமன்றத்தின் இடைக்கால உத்தரவும் பள்ளிக்கல்வித்துறையின் சுற்றறிக்கையும் தெளிவான வழிகாட்டுதலை வழங்குகின்றன.

விஜய் தலைமையிலான அரசின் இந்த நிர்வாக நடவடிக்கையும் உயர்நீதிமன்றத்தின் தலையீடும் இணைந்து, அரசுப் பள்ளி மாணவர்களின் கல்விச் செலவைக் குறைக்கும் முக்கிய மாற்றமாக அமைந்துள்ளது.

==================