மருத்துவம் மற்றும் மக்கள் நல்வாழ்வுத்துறை
தமிழ்நாடு முழுவதும் நாளை மறுநாள் (ஞாயிற்றுக்கிழமை) ஐந்து வயதிற்குட்பட்ட குழந்தைகளுக்கான போலியோ சொட்டு மருந்து முகாம் நடைபெற உள்ளது. இதுதொடர்பாக மருத்துவம் மற்றும் மக்கள் நல்வாழ்வுத்துறை விரிவான அறிக்கை ஒன்றை வெளியிட்டுள்ளது.
43,051 மையங்களில் சொட்டு மருந்து விநியோகம்
தமிழகத்தில் உள்ள அனைத்து அரசு ஆரம்ப சுகாதார நிலையங்கள், அரசு மருத்துவமனைகள், அங்கன்வாடி மையங்கள், பள்ளிகள் மற்றும் மக்கள் அதிகம் கூடும் முக்கிய இடங்கள் என மாநிலம் முழுவதும் மொத்தம் 43,051 மையங்களில் போலியோ சொட்டு மருந்து வழங்கத் தேவையான அனைத்து ஏற்பாடுகளும் செய்யப்பட்டுள்ளன.
இந்த சிறப்பு முகாம்கள் மூலமாகத் தமிழ்நாட்டில் உள்ள 5 வயதிற்குட்பட்ட 52.91 லட்சம் குழந்தைகளுக்கு போலியோ சொட்டு மருந்து வழங்க இலக்கு நிர்ணயிக்கப்பட்டுள்ளது.
பெற்றோருக்கு அறிவுறுத்தல்
தங்களின் குழந்தைகளுக்கு ஏற்கனவே ஐந்து வயதில் போலியோ சொட்டு மருந்து வழங்கப்பட்டிருந்தாலும், இந்த முகாம் நடைபெறும் நாளில் மீண்டும் சொட்டு மருந்து வழங்கப்பட வேண்டும் என்று மருத்துவத்துறை அறிவுறுத்தியுள்ளது.
பொது இடங்களில் தற்காலிக ஏற்பாடு
பேருந்து, ரயில் நிலையங்கள் மற்றும் விமான நிலையங்களில் தற்காலிக மையங்கள்
பயணங்களில் இருக்கும் குழந்தைகளும் விடுபடாமல் சொட்டு மருந்து பெறுவதை உறுதி செய்யும் வகையில், முக்கியப் பேருந்து நிலையங்கள், ரயில் நிலையங்கள், சுங்கச் சாவடிகள், சோதனைச் சாவடிகள் மற்றும் விமான நிலையங்கள் ஆகிய இடங்களிலும் தற்காலிக சிறப்பு மையங்கள் அமைக்கப்பட்டு சொட்டு மருந்து வழங்க ஏற்பாடுகள் செய்யப்பட்டுள்ளன.
முகாம் செயல்படும் நேரங்கள்
போலியோ சொட்டு மருந்து வழங்கும் மையங்கள் அனைத்தும் காலை 7 மணி முதல் மாலை 5 மணி வரை தொடர்ந்து செயல்படும்.
முகாமின் முதல் நாளான ஞாயிற்றுக்கிழமை அன்று அனைத்து முதன்மை முகாம்களிலும் சொட்டு மருந்து வழங்கப்படும். அதனைத் தொடர்ந்து வரும் அடுத்த இரண்டு நாட்களுக்கு தற்காலிக மையங்களில் மட்டும் போலியோ சொட்டு மருந்து வழங்கப்படும் என்று அந்த அறிக்கையில் தெரிவிக்கப்பட்டுள்ளது.
எனவே, பொதுமக்கள் அனைவரும் தங்களின் 5 வயதிற்குட்பட்ட குழந்தைகளுக்கு தவறாமல் போலியோ சொட்டு மருந்து வழங்கிப் பயன்பெறுமாறு கேட்டுக்கொள்ளப்படுகிறார்கள்.
======