சென்னை மெட்ரோ ரயில் திட்டத்தின் இரண்டாம் கட்டத்தின் ஒரு பகுதியாக உருவாக்கப்பட்டுள்ள போரூர் வடபழனி வழித்தடம், நகரின் மேற்கு பகுதிகளை மைய சென்னை பகுதிகளுடன் இணைக்கும் முக்கிய பாதையாக கருதப்படுகிறது.
குறிப்பாக போரூர், ஆலப்பாக்கம், வளசரவாக்கம், சாலிகிராமம் உள்ளிட்ட பகுதிகளில் இருந்து பயணிப்போருக்கு இந்த சேவை பெரும் வசதியை ஏற்படுத்தும் என எதிர்பார்க்கப்படுகிறது.
இந்த வழித்தடத்தில் மெட்ரோ ரயில்களின் சோதனை ஓட்டம் வெற்றிகரமாக நடத்தப்பட்டதாகவும், பாதுகாப்பு ஆய்வுகளின் முக்கிய கட்டங்களும் நிறைவடைந்ததாகவும் தகவல்கள் வெளியாகியுள்ளன.
இருப்பினும், பயணிகள் சேவை தொடங்குவதற்கான அதிகாரப்பூர்வ தேதி இன்னும் அறிவிக்கப்படவில்லை.
இதனால் “அனைத்தும் தயாராக இருந்தும் சேவை ஏன் தொடங்கப்படவில்லை?” என்ற கேள்வி பொதுமக்கள் மத்தியில் எழுந்துள்ளது.
ஆரம்பத்தில் போரூர் வரை மட்டுமே சேவையை தொடங்கும் திட்டம் இருந்ததாக கூறப்படுகிறது.
ஆனால் தற்போதுள்ள மெட்ரோ வலையமைப்புடன் நேரடி இணைப்பை வழங்கும் வகையில் வடபழனி வரை பணிகளை நிறைவு செய்து ஒருங்கிணைந்த சேவையை வழங்குவதற்காக காத்திருக்கப்படுவதாக தகவல்கள் தெரிவிக்கின்றன.
இதன் மூலம் பயணிகள் எளிதாக பிற மெட்ரோ வழித்தடங்களுக்கு மாறிச் செல்ல முடியும்.
போரூர் மற்றும் அதனைச் சுற்றியுள்ள பகுதிகளில் கடுமையான போக்குவரத்து நெரிசல் நீண்டகால பிரச்சனையாக இருந்து வருகிறது.
மெட்ரோ சேவை தொடங்கப்பட்டால் சாலை போக்குவரத்து சுமை குறைவதுடன், அலுவலகம் மற்றும் கல்வி நிறுவனங்களுக்கு செல்வோரின் பயண நேரமும் கணிசமாக குறையும் என எதிர்பார்க்கப்படுகிறது.
மெட்ரோ சேவை தொடக்கம் தொடர்பாக அதிகாரப்பூர்வ அறிவிப்பை பயணிகள் ஆவலுடன் எதிர்நோக்கி வருகின்றனர்.
கட்டுமானம், சோதனை மற்றும் பாதுகாப்பு அனுமதிகள் உள்ளிட்ட முக்கிய கட்டங்கள் நிறைவடைந்த நிலையில், போரூர் - வடபழனி மெட்ரோ வழித்தடம் விரைவில் பொதுமக்கள் பயன்பாட்டுக்கு திறக்கப்படும் என்ற நம்பிக்கை நிலவி வருகிறது.
இந்த சேவை தொடங்கப்பட்டால், சென்னை நகரின் போக்குவரத்து கட்டமைப்பில் மேலும் ஒரு முக்கிய மைல்கல்லாக அமையும்.
===================