ஓய்வுக்குப் பின்பும் தொடரும் சமூக சேவை: அரசு பள்ளி மாணவர்களுக்குப் பாடம் எடுக்கும் முன்னாள் டி.ஜி.பி சீமா அகர்வால்!

Social service continues even after retirement: Former DGP Seema Agarwal teaches school students!

தமிழ்நாடு தீயணைப்பு மற்றும் மீட்புப் பணிகள் துறையின் டி.ஜி.பி.யாகப் பணியாற்றி கடந்த ஜூன் மாதம் ஓய்வுபெற்ற ஐ.பி.எஸ். அதிகாரி சீமா அகர்வால், தற்போது சென்னை மாநகராட்சிப் பள்ளி மாணவர்களுக்கு தன்னார்வமாகப் பாடம் நடத்தி வரும் சம்பவம் பலரின் பாராட்டைப் பெற்றுள்ளது.

ஐ.பி.எஸ் முதல் ஆசிரியை வரை: சீமா அகர்வாலின் பயணம்

ராஜஸ்தான் மாநிலத்தைச் சேர்ந்த சீமா அகர்வால், ஐ.பி.எஸ் தேர்ச்சி பெற்று தமிழக ஐ.பி.எஸ் அதிகாரி ஏ.கே.விஸ்வநாதனை திருமணம் செய்த பின்னர், 1993 -ல் தமிழக காவல்துறையில் இணைந்தார்.

முக்கியப் பொறுப்புகள்

சிவில் சப்ளை சி.ஐ.டி டி.ஜி.பி, சீருடைப் பணியாளர் தேர்வு வாரியத்தின் கூடுதல் டி.ஜி.பி, காவல் தலைமையகக் கூடுதல் டி.ஜி.பி, சி.பி.ஐ, ஊழல் தடுப்புப் பிரிவு, மாநில குற்ற ஆவண காப்பகம் எனப் பல்வேறு முக்கியப் பிரிவுகளில் சிறப்பாகப் பணியாற்றியுள்ளார்.

அரசின் அங்கீகாரம்

இவரது தகைசால் மற்றும் சேவைகளுக்காக மத்திய அரசின் ஜனாதிபதி பதக்கம் உள்ளிட்ட பல உயரிய விருதுகளைப் பெற்றுள்ளார்.

காவல்துறையில் பணியில் இருந்தபோதே சென்னை ஆயிரம் விளக்கு பகுதியில் உள்ள மாநகராட்சிப் பள்ளியில் 6, 7, 8-ஆம் வகுப்பு மாணவர்களுக்கு ஆங்கிலம் மற்றும் கணிதப் பாடங்களை நடத்தி வந்தார்.

ஓய்விலும் தொடரும் உன்னதப் பணி

ஓய்வுபெற்ற பின்னரும் தனது சமூகப் பணிக்கு ஓய்வு கொடுக்காத சீமா அகர்வால், சென்னை தேனாம்பேட்டை எல்டாம்ஸ் சாலையில் உள்ள மாநகராட்சி உயர்நிலைப் பள்ளியில் 6 மற்றும் 7-ஆம் வகுப்புகளுக்கு ஆங்கிலம், கணிதம் நடத்த விருப்பம் தெரிவித்தார்.

மாநகராட்சியின் சிறப்பு அனுமதியைப் பெற்று, கடந்த 3 வாரங்களாக தினமும் காலையில் தலா 40 நிமிடங்கள் என 2 பாட வேளைகளை நடத்தி வருகிறார்.

=====