தாம்பரம் - வேளச்சேரி சாலைக்கு ‘மேஜர் முகுந்த் வரதராஜன் சாலை’ எனப் பெயர் சூட்டிய அரசு : முதல்வர் விஜய் கையெழுத்திட்டார்!

“மேஜர் முகுந்த் வரதராஜன் சாலை”

இந்திய நாட்டின் பாதுகாப்பிற்காக தனது உயிரைத் தியாகம் செய்த மறைந்த ராணுவ அதிகாரி மேஜர் முகுந்த் வரதராஜனை போற்றும் வகையில், தாம்பரம் ரயில் நிலையத்திலிருந்து வேளச்சேரி வரையிலான சாலைக்கு “மேஜர் முகுந்த் வரதராஜன் சாலை” என பெயர் சூட்ட தமிழக முதல்வர் விஜய் உத்தரவிட்டுள்ளார். இதற்கான அதிகாரப்பூர்வ அரசாணை வெளியிடப்பட்டுள்ளது.

ராணுவ தளபதியின் கோரிக்கையும் உடனடி நடவடிக்கையும்

இந்திய ராணுவத்தின் தென்னிந்திய பகுதிகளுக்கான தளபதி லெப்டினண்ட் ஜெனரல் வி.ஸ்ரீஹரி, முதல்வர் விஜய்யை நேரில் சந்தித்து முக்கியக் கோரிக்கை ஒன்றை வைத்தார்.

அதில், பயங்கரவாதிகளுக்கு எதிரான நடவடிக்கையின்போது வீரமரணம் அடைந்து, நாட்டின் உயரிய 'அசோக் சக்ரா' விருது பெற்ற மேஜர் முகுந்த் வரதராஜனின் தியாகத்தைப் போற்றும் வகையில் தாம்பரம் - வேளச்சேரி சாலைக்கு அவரது பெயரை சூட்ட வேண்டும் எனக் கேட்டுக்கொண்டார்.

தமிழக அரசு அரசாணை வெளியீடு

இந்தக் கோரிக்கையை பரிசீலித்த முதலமைச்சர் விஜய் , உடனடியாக நடவடிக்கை எடுக்க உத்தரவிட்டார். அதன்படி, ஜூன் 23, 2026 அன்று இதற்கான அரசாணை வெளியிடப்பட்டது.

அதன்படி இந்த சாலைக்கு தமிழில் “மேஜர் முகுந்த் வரதராஜன் சாலை” எனவும், ஆங்கிலத்தில் “MAJOR MUKUND VARADARAJAN SALAI” எனவும் பெயர் சூட்டப்பட்டுள்ளது.

16 கி.மீ நீள நெடுஞ்சாலை

இதற்கு முன்னதாக கடந்த வாரம் நடைபெற்ற தாம்பரம் மாநகராட்சிக் கூட்டத்திலும் இதற்கான தீர்மானம் நிறைவேற்றப்பட்டிருந்தது குறிப்பிடத்தக்கது.

தாம்பரம் மாநகராட்சி ஒப்புதல்

சென்னை மாநகரின் முக்கிய போக்குவரத்து இணைப்புகளில் ஒன்றாகத் திகழும் 16 கிலோமீட்டர் நீளமுள்ள வேளச்சேரி - தாம்பரம் நெடுஞ்சாலைக்கு, "மேஜர் முகுந்த் வரதராஜன் நெடுஞ்சாலை" எனப் பெயர் சூட்டுவதற்கு தாம்பரம் மாநகராட்சி தனது முழு ஒப்புதலை வழங்கி இருந்தது.

தாம்பரம் மண்ணின் மைந்தர்

மேஜர் முகுந்த் வரதராஜன், தாம்பரம் மாநகராட்சிக்கு உட்பட்ட அனந்தபுரம் பகுதியைச் சேர்ந்தவர் ஆவார். தாம்பரத்தில் உள்ள சென்னை கிறித்துவக் கல்லூரியில் தனது பட்டப்படிப்பை நிறைவு செய்த அவர், பின்னர் ராணுவத்தில் இணைந்து திறம்படப் பணியாற்றினார்.

பணியின் போது வீர மரணம்

பணியின்போது நாட்டின் எல்லையில் வீர மரணம் அடைந்ததால், இவர் எப்போதும் “தாம்பரம் மண்ணின் மைந்தர்” என்று மக்களால் போற்றப்பட்டு வருகிறார்.

பெற்றோரை சந்தித்து ஆசி பெற்ற அமைச்சர்

தமிழக அரசு இத்தகைய வரலாற்றுச் சிறப்புமிக்க அரசாணையை வெளியிட்டதைத் தொடர்ந்து, அமைச்சர் சரத்குமார் மேஜர் முகுந்த் வரதராஜனின் பெற்றோரை அவர்களது இல்லத்தில் நேரில் சந்தித்துப் பேசினார்.

அரசின் இந்த நடவடிக்கைக்காக அவர்களுக்கு வாழ்த்துகளைத் தெரிவித்ததோடு, அவர்களின் ஆசியையும் பெற்றுக் கொண்டார்.

=====