சென்னையைச் சேர்ந்த கிரானைட் தொழிலதிபர் ஆர். வீரமணி மீதான பாலியல் குற்றச்சாட்டு மற்றும் போக்சோ வழக்கு தமிழ்நாடு மட்டுமின்றி தேசிய அளவிலும் கவனம் ஈர்த்துள்ளது.
பல சிறுமிகளை பாலியல் வன்கொடுமைக்கு உள்ளாக்கியதாக எழுந்த புகாரின் அடிப்படையில் விசாரணை தீவிரப்படுத்தப்பட்ட நிலையில், கடந்த ஆகஸ்ட் 29ஆம் தேதி வீரமணி, அவரது நெருங்கிய தொடர்புடைய மகேந்திர சிம்மன் மற்றும் சாந்தி ஆகியோர் கைது செய்யப்பட்டனர்.
வீரமணி தொடர்பான விசாரணை விரிவடைந்துள்ள நிலையில், அவரது நிறுவனத்தில் சுமார் 23 ஆண்டுகள் பணியாற்றியதாகக் கூறப்படும் கணேசன் என்பவரையும் காவல்துறை கைது செய்துள்ளது.
இதன் மூலம் வழக்கின் விசாரணை அடுத்த கட்டத்தை நோக்கி நகர்ந்துள்ளதாக கூறப்படுகிறது.
இதற்கிடையே, காங்கிரஸ் நிர்வாகி ரஞ்சன் குமார் வெளியிட்ட தகவல் புதிய பரபரப்பை ஏற்படுத்தியுள்ளது.
வீரமணி தொடர்பாக 2024-ஆம் ஆண்டிலேயே காவல்துறையில் புகார் அளித்திருந்த போதிலும், அதன் மீது எந்த நடவடிக்கையும் எடுக்கப்படவில்லை என்றும், தற்போது நடைபெறும் விசாரணையிலும் தாம் ஏற்கனவே அளித்த புகார் குறித்து எந்த குறிப்பும் இடம்பெறவில்லை என்றும் அவர் குற்றம்சாட்டியுள்ளார்.
ரஞ்சன் குமார் குறிப்பிட்ட காலகட்டத்தில் சென்னை காவல் ஆணையராக இருந்த அருண் ஐபிஎஸ் மற்றும் சென்னை மாநகர காவல்துறையில் முக்கிய பொறுப்பில் இருந்த கண்ணன் ஐபிஎஸ் ஆகியோரை தமிழக அரசு அண்மையில் காத்திருப்போர் பட்டியலுக்கு மாற்றியது.
இருப்பினும், இந்த மாற்றத்திற்கான காரணத்தை அரசு அதிகாரப்பூர்வமாக வெளியிடவில்லை.
இந்த சூழலில், தற்போது கோயம்பேடு காவல் உதவி ஆணையர் யாஸ்மினையும் காத்திருப்போர் பட்டியலுக்கு மாற்றி தமிழக அரசு உத்தரவிட்டுள்ளது.
ஏற்கனவே வீரமணி வழக்கு தொடர்பான விசாரணைக்கு ஆஜராகுமாறு அவருக்கு சம்மன் வழங்கப்பட்டிருந்த நிலையில், தற்போது இந்த நிர்வாக நடவடிக்கை எடுக்கப்பட்டுள்ளது.
வீரமணி வழக்கில் அடுத்தடுத்து கைது நடவடிக்கைகள், புதிய சாட்சிகள் மற்றும் காவல்துறை அதிகாரிகள் மீதான நிர்வாக நடவடிக்கைகள் மேற்கொள்ளப்பட்டு வருவதால், இந்த வழக்கின் விசாரணை மேலும் தீவிரமடையும் என எதிர்பார்க்கப்படுகிறது.
அதே நேரத்தில், அதிகாரிகள் மீதான இந்த நடவடிக்கைகளுக்கும் வழக்கிற்கும் நேரடி தொடர்பு உள்ளதா என்பது குறித்து அரசு தரப்பில் இதுவரை எந்த விளக்கமும் வெளியாகவில்லை.
==================