TNSDMA Guidelines Media Weather Forecasts IMD source:thamizhalai
தமிழ்நாடு

தனிநபர்களின் வானிலை கணிப்புகளை அதிகாரப்பூர்வ செய்தியாக வெளியிடக் கூடாது: ஊடகங்களுக்கு பேரிடர் மேலாண்மை அறிவுறுத்தல்!

இந்திய வானிலை ஆய்வு மையத்தின் அறிவிப்புகளுக்கு மட்டுமே முன்னுரிமை அளிக்க வேண்டும் என்று பேரிடர் மேலாண்மை ஆணையம் ஊடகங்களுக்கு அறிவுறுத்தல்

Kavitha prasanna

TNSDMA Guidelines Media Weather Forecasts IMD

பொறுப்புடன் செயல்பட ஊடகங்களுக்கு அறிவுறுத்தல்

ஊடகங்கள் வானிலை தொடர்பான தகவல்களை வெளியிடுவதில் பொறுப்புடன் செயல்பட வேண்டும். இந்திய வானிலை ஆய்வு மையத்தின் அதிகாரப்பூர்வ தகவல்களை மட்டுமே பின்பற்ற வேண்டும் என்று தமிழ்நாடு மாநில பேரிடர் மேலாண்மை ஆணையம் (TNSDMA) அறிவுறுத்தியுள்ளது.

இது தொடர்பாக ஆணையம் வெளியிட்டுள்ள செய்திக் குறிப்பில், நாட்டின் வானிலை நிலவரங்களைக் கண்காணித்து புயல், மழைப்பொழிவு, இடியுடன் கூடிய மழை உள்ளிட்ட வானிலை நிகழ்வுகள் குறித்த அதிகாரப்பூர்வ முன்னறிவிப்புகள், எச்சரிக்கைகள் மற்றும் அறிவுரைகளை வெளியிடும் அங்கீகரிக்கப்பட்ட தேசிய அமைப்பு இந்திய வானிலை ஆய்வு மையம் மட்டுமே என்றும் தெளிவுபடுத்தப்பட்டுள்ளது.

தனிநபர் கணிப்புகளால் ஏற்படும் குழப்பம்

சில தனிநபர்கள் இந்திய வானிலை ஆய்வு மையத்தின் அதிகாரப்பூர்வ அறிவிப்புகளிலிருந்து மாறுபட்ட தங்களது சொந்தக் கணிப்புகள் மற்றும் மதிப்பீடுகளைச் சமூக ஊடகங்கள் வாயிலாகப் பரப்பி வருகின்றனர். இத்தகைய தகவல்கள் தொலைக்காட்சி சேனல்கள் மற்றும் செய்தி ஊடகங்களிலும் வெளியிடப்படுவதால் பொதுமக்களிடையே குழப்பம் ஏற்படுகிறது.

முரண்பட்ட அறிவிப்புகள் மக்களிடையே அச்சத்தை ஏற்படுத்தும்

குறிப்பாகப் புயல், கனமழை போன்ற தீவிர வானிலை நிகழ்வுகளின்போது ஒன்றுக்கொன்று முரண்பட்ட அறிவிப்புகள் மக்களிடையே தேவையற்ற அச்சத்தையும் பதற்றத்தையும் ஏற்படுத்துவதுடன், அரசின் முன்னெச்சரிக்கை மற்றும் பேரிடர் கால மீட்பு நடவடிக்கைகளிலும் பாதிப்புகளை ஏற்படுத்தக்கூடும் என சுட்டிக்காட்டப்பட்டுள்ளது.

ஊடகங்கள் மற்றும் சமூக ஊடகப் பயனர்களுக்கான 5 முக்கிய வழிகாட்டுதல்கள்

தொலைக்காட்சி, அச்சு, இணையதள ஊடகங்கள் மற்றும் சமூக ஊடகப் பயனர்கள் வானிலை தகவல்களை வெளியிடும்போது பின்வரும் வழிமுறைகளைப் பின்பற்றுமாறு கேட்டுக்கொள்ளப்பட்டுள்ளார்கள்.

அதிகாரப்பூர்வ அறிவிப்புகளுக்கு முன்னுரிமை

இந்திய வானிலை ஆய்வு மையம் வெளியிடும் அதிகாரப்பூர்வ வானிலை முன்னறிவிப்புகள், எச்சரிக்கைகள் மற்றும் அறிவுரைகளுக்கு மட்டுமே முன்னுரிமை அளிக்க வேண்டும்.

அங்கீகரிக்கப்படாத கணிப்புகளைத் தவிர்த்தல்

தனிநபர்கள் மற்றும் அங்கீகரிக்கப்படாத அமைப்புகள் வெளியிடும் வானிலை கணிப்புகளை அரசின் அதிகாரப்பூர்வ முன்னறிவிப்புகளாகக் கருதவோ, வெளியிடவோ கூடாது.

நம்பகத்தன்மையை சரிபார்த்தல்

இந்திய வானிலை ஆய்வு மையத்தின் அறிவிப்புகளிலிருந்து மாறுபட்ட தனிநபர்களின் கணிப்புகளை ஒளிபரப்புவதற்கு அல்லது வெளியிடுவதற்கு முன்பு, அவற்றின் நம்பகத்தன்மையை ஊடக நிறுவனங்கள் உரிய முறையில் சரிபார்க்க வேண்டும்.

ஆதாரத்தைத் தெளிவுபடுத்துதல்

சுயாதீனமான அறிவியல் மதிப்பீடுகள் வெளியிடப்படும்போது, அவற்றின் ஆதாரம் தெளிவாக குறிப்பிடப்படுவதுடன், அவை இந்திய வானிலை ஆய்வு மையத்தின் அதிகாரப்பூர்வ முன்னறிவிப்புகள் அல்ல என்பதையும் தெளிவுபடுத்த வேண்டும்.

வதந்திகள் மற்றும் பரபரப்பு செய்திகளைத் தவிர்த்தல்

புயல், கனமழை மற்றும் பேரிடர் காலங்களில் பொதுமக்களிடையே அச்சத்தையும் பதற்றத்தையும் ஏற்படுத்தக்கூடிய பரபரப்பான செய்திகள், ஆதாரமற்ற கணிப்புகள் மற்றும் சரிபார்க்கப்படாத தகவல்களை வெளியிடுவதைத் தவிர்க்க வேண்டும்.

பொதுமக்களுக்கு முக்கிய வேண்டுகோள்

வானிலை தொடர்பான தகவல்கள் பொதுமக்களின் பாதுகாப்பு மற்றும் இயல்பு வாழ்க்கையுடன் நேரடியாகத் தொடர்புடையவை.

எனவே, புயல், கனமழை உள்ளிட்ட வானிலை தொடர்பான அதிகாரப்பூர்வ முன்னறிவிப்புகள் மற்றும் எச்சரிக்கைகளுக்கு இந்திய வானிலை ஆய்வு மையம் மற்றும் அரசின் சம்பந்தப்பட்ட துறைகள் வெளியிடும் தகவல்களை மட்டுமே பொதுமக்கள் பின்பற்ற வேண்டும் எனத் தமிழ்நாடு மாநில பேரிடர் மேலாண்மை ஆணையம் அறிவுறுத்தியுள்ளது.

================