மதுரை மாநில மாநாடு :
TVK Vijay 2nd Madurai Manadu Update : தமிழக வெற்றிக் கழகத்தின் 2வது மாநில மாநாடு மதுரையில் வரும் 21ம் தேதி நடைபெற இருக்கிறது. இதற்கான ஏற்பாடுகள் முழு வீச்சில் நடைபெற்று வருகின்றன. 14 குழுக்கள் அமைக்கப்பட்டு, அனைத்து பணிகளும் கண்காணிக்கப்பட்டு வருகின்றன.
நமது கனவாகும் விரைவில் நனவாகும் :
இந்தநிலையில், மாநாட்டிற்கு வரும் தொண்டர்களை உற்சாகப்படும் வகையில் கட்சியின் தலைவர் விஜய் அறிக்கை ஒன்றை வெளியிட்டு இருக்கிறார். ”தவெகவின் மதுரை மாநாடு குறித்த(TVK Madurai Manadu) இரண்டாவது கடிதம் இது. மக்களுடன் மக்களாக இணைந்து நிற்கும் மகத்தான மக்களரசியல் இயக்கமான த.வெ.க. மீதான தமிழக மக்களின் பேரன்பும் பேராதரவும் தேர்தல் அரசியல் களத்தில் விரைவில் நிரூபிக்கப்படப் போகிறது. நமது கனவு நனவாக, இலக்கை எட்ட, புரட்டிப் போடப் போகும் புரட்சி நிகழ, இன்னும் சில மாதங்களே உள்ளன.
2026 தேர்தலில் அதிசயம் நிகழும் :
1967 மற்றும் 1977 தேர்தல்களின் வெற்றி விளைவுகளை, 2026ம் ஆண்டு சட்டசபை தேர்தலில் மீண்டும் இந்த மண்ணில் காணப் போகிறோம். மாபெரும் மக்கள் சக்தியான நீங்கள். இந்தத் திருப்புமுனைத் தருணத்தை நிரூபிக்கப் போவது நிச்சயம். இதை 32 ஆண்டுகளுக்கும் மேலாக மக்கள் இயக்கமாக இருந்து, தினம் தினம் மக்கள் மனம் அறிந்து உணர்ந்து வரும் நாம் சொல்வதில் அடர்ந்த, ஆழ்ந்த உண்மை இருப்பதை அனைவரும் அறியத்தான் போகின்றனர்.
கர்ப்பிணிகள், சிறுவர்கள் வர வேண்டாம் :
தமிழக மக்களை உயிராகப் போற்றி மதிக்கும் இந்த விஜய் பற்றி உங்கள் அனைவருக்கும் நன்கு தெரியும். உங்கள் மீதான உள்ளன்பு மிக்க அக்கறையின் காரணமாக இப்போது ஒன்றைச் சொல்ல விரும்புகிறேன். கர்ப்பிணிப் பெண்கள், கைக்குழந்தையுடன் இருக்கும் சகோதரிகள், முதியவர்கள், உடல்நலம் குன்றியோர், பள்ளிச் சிறார்கள், மாற்றுத் திறனாளிகள் ஆகியோர், நம் கட்சி மாநாட்டை வீட்டில் இருந்தபடியே நேரலையில் கண்டு மகிழுமாறு உரிமை கலந்த அன்புடன் கேட்டுக்கொள்கிறேன்.
பாதுகாப்பாக வந்து செல்லுங்க :
மாநாட்டுக்கு வரும்போதும், மாநாடு(TVK Manadu) நிறைவடைந்து ஊருக்குத் திரும்பும்போதும் நம் கழகத் தோழர்கள் அனைவரும் ஒழுங்கையும் பாதுகாப்பையும் ராணுவக் கட்டுப்பாட்டுடன் கடைப்பிடிக்க வேண்டும். தமிழக வெற்றிக் கழகம், தகுதியும் பொறுப்பும் மிக்க ஓர் அரசியல் பேரியக்கம் என்பதை நமது ஒவ்வொரு செயலிலும் காட்ட வேண்டியது நமது தலையாய கடமை.
மேலும் படிக்க : TVK 2nd Manadu : மதுரை தவெக மாநாட்டு தேதி : ஆகஸ்டு 21க்கு மாற்றம்
தவெக.வின் வெற்றி நிச்சயம் :
மகத்தான தேர்தல் அரசியல் வரலாறு மீண்டும் நம் தமிழக மண்ணில், நம்மால் நிகழப் போவது நிஜம். எனவே, அத்தகைய மாபெரும் அரசியல் விளைவை நிச்சயமாக நிகழ்த்திக் காட்டும் பேரறிவிப்பாக நமது மாநில மாநாட்டை மாற்றிக் காட்டுவோம்.
உங்களுக்காக காத்திருக்கிறேன் :
உங்கள் ஒவ்வொருவருக்காகவும் உணர்வு ததும்பும் மதுரை மண்ணில், இதயம் திறந்து இரண்டு கைகளை விரித்துக் காத்திருப்பேன். உங்கள் விஜய், உரிமையுடன் அழைக்கிறேன். மதுரை பாரப்பத்தியில்(TVK 2nd Manadu Place) கூடுவோம். தேர்தல் அரசியல் போர் உத்தியில் வெல்வோம்.நல்லதே நடக்கும். வெற்றி நிச்சயம்” இவ்வாறு தனது அறிக்கையில் விஜய்(TVK Vijay) தெரிவித்துள்ளார்.
============