இடைத்தேர்தலில் மதுராந்தகம், தாராபுரத்தில் தவெக வெற்றி; சரிந்த அதிமுக வாக்கு வங்கி! காரணம் என்ன? புள்ளிவிவரங்களுடன்...!

TVK Wins Dharapuram and Madurantakam Bypolls Analysis

இடைத்தேர்தல் முடிவுகள் மற்றும் களம்

அதிமுக எம்.எல்.ஏ-க்கள் மரகதம் குமரவேல் மற்றும் சத்யபாமா ஆகியோர் தங்களது பதவியை ராஜினாமா செய்ததால் காலியான மதுராந்தகம் (தனி) மற்றும் தாராபுரம் (தனி) ஆகிய இரு சட்டமன்றத் தொகுதிகளுக்கும் நடைபெற்ற இடைத்தேர்தலில் இம்முறையும் அதே தொகுதிகளில் வேட்பாளர்களாக மரகதம் குமரவேல், சத்யபாமா வேட்பாளர்களாக நிறுத்தப்பட்டு ஆளுங்கட்சியான தமிழக வெற்றிக் கழகம் அபார வெற்றி பெற்றுள்ளது.

2026 பேரவைத் தேர்தலில் மும்முனைப் போட்டியில் இவ்விரு தொகுதிகளிலும் வெற்றி பெற்றிருந்த அதிமுக, இந்த இடைத்தேர்தலில் 3-ஆவது இடத்திற்குத் தள்ளப்பட்டுள்ளது.

அதேநேரத்தில், திமுக கடந்த முறை மதுராந்தகத்தில் 3-ஆவது இடத்தில் இருந்த நிலையில் தற்போது 2-ஆவது இடத்திற்கு முன்னேறியுள்ளதுடன், தாராபுரத்தில் 2-ஆவது இடத்தைத் தக்கவைத்துக் கொண்டுள்ளது.

வாக்கு சதவீத ஒப்பீடு: மதுராந்தகம் தொகுதி

2026 சட்டப்பேரவை பொதுத் தேர்தலுடன் இந்த இடைத்தேர்தலை ஒப்பிடும் போது மதுராந்தகம் தொகுதியில் கட்சிகள் பெற்ற வாக்கு சதவீதம் அனைவரின் கவனத்தையும் பெற்றுள்ளன.

1. தவெக: 31.32% இலிருந்து 40.24% ஆக அதிகரித்து, 9.92% கூடுதலான வாக்குகளைப் பெற்றுள்ளது.

2. திமுக: 30.18% இலிருந்து 29.02% ஆகக் குறைந்து, 1.16% வாக்குகளை இழந்துள்ளது.

3. அதிமுக: 34.95% இலிருந்து 25.82% ஆகக் குறைந்து, 9.13% வாக்குகளைப் பறிகொடுத்துள்ளது.

4. நாம் தமிழர் கட்சி: 2.50% இலிருந்து 1.28% ஆகச் சரிவடைந்துள்ளது (1.22% குறைவு).

5. மார்க்சிஸ்ட் கம்யூனிஸ்ட்: கடந்த முறை திமுக கூட்டணியில் இருந்த நிலையில், தற்போது தனித்துப் போட்டியிட்டு 1.28% வாக்குகளைப் பெற்றுள்ளது.

வாக்கு சதவீத ஒப்பீடு: தாராபுரம் தொகுதி

தாராபுரம் தொகுதியில் கட்சிகள் பெற்ற வாக்கு சதவீத நிலவரம்:

1. தவெக: 23.23% இலிருந்து 37.02% ஆக உயர்ந்து, 13.79% வாக்குகளை கூடுதலாகப் பெற்றுள்ளது.

2. திமுக: 32.20% இலிருந்து 31.78% ஆகக் குறைந்து, 0.42% சரிவை சந்தித்துள்ளது.

3. அதிமுக: 40.56% இலிருந்து 25.08% ஆகச் சரிந்து, 15.48% வாக்குகளை இழந்துள்ளது.

4. நாம் தமிழர் கட்சி: 3.01% இலிருந்து 2.92% ஆக குறைந்துள்ளது.

5. இந்திய கம்யூனிஸ்ட் கட்சி: தனித்துப் போட்டியிட்டு 0.64% வாக்குகளைப் பெற்றுள்ளது.

வாக்கு வங்கி மாற்றம் மற்றும் காரணங்கள்

புள்ளிவிவரங்களை ஆய்வு செய்கையில், இரு தொகுதிகளிலும் அதிமுக இழந்த பெரும்பான்மை வாக்குகள் அப்படியே தவெகவிற்கு பரிமாற்றம் ஆகியிருப்பது தெரியவருகிறது. அதேநேரத்தில் திமுக தனது வாக்கு வங்கியைப் பெரிதாக இழக்கவில்லை.

1. மதுராந்தகம் தொகுதி:

அதிமுக கூட்டணியில் இருந்து பாமக விலகியதாலும், தவெக-பாமக கூட்டணி உருவாகி சௌமியா அன்புமணிக்கு அமைச்சர் பதவி கிடைக்கக்கூடும் என்ற தகவல் வலுத்ததாலும் வன்னியர் சமுதாய வாக்குகள் தவெகவிற்கு மடைமாற்றமாகியுள்ளதாகக் கருதப்படுகிறது.

2016-இல் பாமக தனித்துப் போட்டியிட்டபோது இங்கு 9.12% வாக்குகளைப் பெற்றது. தற்போதைய இடைத்தேர்தலில் அதிமுக 9.13% வாக்குகளை இழந்துள்ள நிலையில், தவெக 9.92% வாக்குகளை உயர்த்தியிருப்பது இதனை உறுதிப்படுத்துகிறது.

2. தாராபுரம் தொகுதி

இங்கு அதிமுக இழந்த வாக்குகளை தவெக பெற்றுள்ளது. எடுத்துக்காட்டாக, குண்டடம் ஒன்றியத்தில் (முதல் 7 சுற்றுகள்) 2026 பேரவைத் தேர்தலில் 28,829 வாக்குகள் பெற்ற அதிமுக, தற்போது 15,244 வாக்குகளை மட்டுமே பெற்று 13,585 வாக்குகளை இழந்துள்ளது.

அதேவேளையில் தவெக 11,671 வாக்குகளில் இருந்து 18,690 ஆக உயர்த்தியுள்ளது. மூலனூர் ஒன்றியம் மற்றும் தாராபுரம் நகரப் பகுதிகளிலும் இதேபோன்று அருந்ததியர் வாக்குகள் தவெகவிற்கு சென்றுள்ளன. இருப்பினும், தாராபுரத்தில் திமுகவின் இஸ்லாமிய, கிறிஸ்தவ வாக்குகளை தவெகவால் பிரிக்க முடியவில்லை.

மு.க.ஸ்டாலினின் பேச்சும் சமூக வாக்குகளின் தாக்கமும்

தாராபுரத்தில் தவெக 6.7% வாக்கு வித்தியாசத்தில் திமுகவை வீழ்த்தியுள்ளது. இத்தொகுதியில் சுமார் 12% வாழும் தேவேந்திர குல வேளாளர் சமூகத்தை சேர்ந்தவர்களே தவெக, திமுக, அதிமுக ஆகிய 3 பிரதான கட்சிகளின் வேட்பாளர்களாகக் களம் கண்டனர்.

தவெக வேட்பாளர் சத்யபாமா மீது திமுக தலைவர் மு.க.ஸ்டாலின் வைத்த உருவகேலி விமர்சனம், அச்சமூக வாக்காளர்களிடையே, குறிப்பாகப் பெண் வாக்காளர்களிடம் ஏற்படுத்திய பாதிப்பும் இத்தோல்விக்கு முக்கியக் காரணமாக இருக்கலாம் என்றும் கூறப்படுகிறது.

=======