Vetri Laptop Scheme GO Issued Allocation Rs 2000 Crore
வெற்றி மடிக்கணிணித் திட்டம்
இன்றைய டிஜிட்டல் யுகத்தில், உயர்கல்வி பயிலும் மாணாக்கர்களுக்கு மடிக்கணினி என்பது இன்றியமையாத கல்வி உபகரணமாக விளங்கி வருகிறது.
மாணாக்கர்கள் தங்களது தொழில்நுட்ப அறிவை மேம்படுத்தவும், திறன் மேம்பாட்டுப் பயிற்சிகளை மேற்கொள்ளவும், இணையவழி கல்வி மற்றும் எதிர்கால வேலைவாய்ப்புகளுக்கும் மடிக்கணினிகள் பெரிதும் உதவும்.
இதனைக் கருத்திற்கொண்டு, 2026-2027-ஆம் ஆண்டு நிதிநிலை அறிக்கையில் அறிவிக்கப்பட்டுள்ள ‘வெற்றி மடிக்கணிணித் திட்டத்தை’ 2,000 கோடி ரூபாய் நிதி ஒதுக்கீட்டில் செயல்படுத்துவதற்கு முதல்-அமைச்சர் விஜய் உத்தரவிட்டுள்ளார்.
அதனைத் தொடர்ந்து, இதற்கான விரிவான வழிகாட்டு நெறிமுறைகள் மற்றும் நிதி ஒதுக்கீட்டிற்கான நிர்வாக அனுமதி அளித்து அரசாணை வெளியிடப்பட்டுள்ளது.
பயனடையும் மாணவர்கள்
வெற்றி மடிக்கணிணித் திட்டத்தின் மூலம் 2026-2027 ஆம் கல்வியாண்டில் அரசு மற்றும் அரசு உதவிபெறும் கல்லூரிகளில் பயிலும் பின்வரும் பல்வேறு கல்விப் பிரிவுகளைச் சேர்ந்த மாணவர்கள் பயனடைவார்கள்.
கலை மற்றும் அறிவியல், பொறியியல், பாலிடெக்னிக், ஐ.டி.ஐ (ITI), மருத்துவம், கால்நடை மருத்துவம், மீன்வளம், வேளாண்மை மற்றும் சட்டம் உள்ளிட்ட பிரிவுகள்.
இளநிலை மற்றும் பட்டயப்படிப்பு மாணவர்கள்
மேற்சொன்ன படிப்புகளில் பயிலும் முதலாம் ஆண்டு மற்றும் இரண்டாம் ஆண்டு இளநிலைப் பட்டப்படிப்பு மற்றும் பட்டயப்படிப்பு மாணாக்கர்கள்.
முந்தைய ஆண்டு நிலுவைப் பயனாளிகள்
முந்தைய 2025-2026-ஆம் கல்வியாண்டில் மடிக்கணினித் திட்டத்தில் பயனடையாத அரசு மற்றும் அரசு உதவிபெறும் கல்லூரிகளில் பயிலும் மூன்றாம் மற்றும் நான்காம் ஆண்டு தொழில்முறைப் படிப்பு மாணாக்கர்களும் தற்போதைய இத்திட்டத்தின் மூலம் பயனடைவார்கள்.
உயர்தரத் தொழில்நுட்பத்துடன் மடிக்கணினிகள்
பொறியியல் மாணாக்கர்களின் தொழில்நுட்பக் கல்வித் தேவைகளைக் கருத்திற்கொண்டு, அவர்களுக்கு Intel Core i5 அல்லது அதற்கு இணையான உயர்தரத் தொழில்நுட்பத்துடன் கூடிய மடிக்கணினிகள் வழங்கப்படும்.
இத்திட்டத்தை மிகச் சீரிய முறையில் கண்காணித்து, தொய்வின்றிச் செயல்படுத்திடி முதல்-அமைச்சரின் தலைமையில் உயர்மட்ட வழிகாட்டுதல் குழு அமைக்கப்படவுள்ளது.
ELCOT மூலம் கொள்முதல்
தரக்கட்டுப்பாட்டுடன் கூடிய மடிக்கணினிகளைக் கொள்முதல் செய்வதை உறுதிசெய்ய தமிழ்நாடு மின்னணு நிறுவனத்திற்கு (ELCOT) நிர்வாக அனுமதி வழங்கப்படுகிறது.
இன்றைய அதிவேக டிஜிட்டல் யுகத்தில், நமது மாநிலத்தின் அடித்தட்டு மற்றும் நடுத்தரக் குடும்பங்களைச் சேர்ந்த மாணவச் செல்வங்கள் உலகளாவிய போட்டித் திறன்களில் சிறந்து விளங்கும், வேலைவாய்ப்புத் திறனை மேம்படுத்திக் கொள்ளவும் இந்த "வெற்றி மடிக்கணிணித் திட்டம்" ஒரு மாபெரும் மைல்கல்லாக அமையும் என்பது திண்ணம் என்று அரசாணையில் கூறப்பட்டுள்ளது.
========