ஈரான் அமெரிக்கா போர் :
அமெரிக்கா - ஈரான் இடையேயான மோதல் கடந்த 7 மாதங்களாக மத்திய கிழக்கு அரசியலில் பெரும் தாக்கத்தை ஏற்படுத்தி வருகிறது.
இந்த பதற்றம் காரணமாக உலகளாவிய கச்சா எண்ணெய் விலை ஒரு கட்டத்தில் பேரலுக்கு 100 டாலரை தாண்டியது.
ஹோர்முஸ் கடல்சந்தி, செங்கடல் கப்பல் போக்குவரத்து மற்றும் பிராந்திய பாதுகாப்பு ஆகியவை மீண்டும் சர்வதேச கவனத்தை ஈர்த்துள்ளன.
இந்த சூழலில், அமெரிக்காவுடன் மீண்டும் பேச்சுவார்த்தை நடத்த தயாராக இருப்பதாக தெரிவித்துள்ள ஈரான், அதற்கு முன் தாங்கள் முன்வைத்த 7 நிபந்தனைகளை வாஷிங்டன் ஏற்க வேண்டும் என வலியுறுத்தியுள்ளது.
கத்தார் வழியாக அமெரிக்காவுக்கு 7 நிபந்தனைகள் அனுப்பப்பட்டுள்ளதாக ஈரானின் உயர்மட்ட பாதுகாப்பு அமைப்பு தெரிவித்துள்ளது.
இதில் அனைத்து போர் நடவடிக்கைகளையும் நிறுத்துவது, ஈரான் மீது விதிக்கப்பட்டுள்ள கடல் முற்றுகையை முடிவுக்கு கொண்டுவருவது, வெளிநாடுகளில் முடக்கப்பட்டுள்ள ஈரான் நிதியை விடுவிப்பது.
அதேபோல பொருளாதார தடைகளை தளர்த்துவது மற்றும் எதிர்கால தாக்குதல்கள் நடைபெறாது என்ற பாதுகாப்பு உத்தரவாதங்களை வழங்குவது போன்ற அம்சங்கள் இடம்பெற்றுள்ளதாக தகவல்கள் தெரிவிக்கின்றன.
அமெரிக்காவின் மிரட்டல்கள் அல்லது பொருளாதார அழுத்தங்கள் மூலம் ஈரானை பேச்சுவார்த்தை மேசைக்கு கொண்டு வர முடியாது என தெஹ்ரான் தெரிவித்துள்ளது.
தங்களது நிபந்தனைகளுக்கு சாதகமான பதில் கிடைத்தால் மட்டுமே அடுத்தகட்ட பேச்சுவார்த்தை நடைபெறும் என்றும், இல்லையெனில் மோதலை எதிர்கொள்ளவும் தயாராக இருப்பதாக ஈரான் தரப்பில் எச்சரிக்கை விடுக்கப்பட்டுள்ளது.
இதற்கிடையில் அமெரிக்க அதிபர் டொனால்ட் டிரம்ப், ஈரான் தொடர்பாக "முக்கிய முடிவு எடுக்க வேண்டிய நேரம் வந்துவிட்டது" என்று தெரிவித்துள்ளார்.
அதே நேரத்தில், ஐ.நா. பொதுச் சபை கூட்டத்தை முன்னிட்டு நியூயார்க்கில் ஈரான் அதிபர் மசூத் பெசேஷ்கியனை சந்திக்கவும் தயாராக இருப்பதாக அவர் கூறியுள்ளார்.
மறுபுறம், ஒப்பந்தம் எட்டப்படாவிட்டால் ஈரான் கடுமையான பொருளாதார விளைவுகளை சந்திக்க நேரிடும் என்றும் டிரம்ப் எச்சரித்துள்ளார்.
தற்போது அமெரிக்காவின் பதிலை ஈரான் எதிர்பார்த்து காத்திருக்கிறது.
இரு நாடுகளும் தங்களது நிலைப்பாட்டில் உறுதியாக இருக்கும் நிலையில், பேச்சுவார்த்தை மீண்டும் தொடங்குமா அல்லது மோதல் மேலும் தீவிரமடையுமா என்பது கேள்விக்குறியாக உள்ளது.
குறிப்பாக ஹோர்முஸ் கடல்சந்தி மீண்டும் திறக்கப்படுமா என்பது உலக எரிசக்தி சந்தையின் முக்கிய கவலையாக மாறியுள்ளது.
===================