Kamal and Rajini share the story of their journey of friendship at the "Dharman" movie event!
தமிழ் சினிமாவின் இரு பெரும் ஆளுமைகளான சூப்பர் ஸ்டார் ரஜினிகாந்தும், உலக நாயகன் கமல்ஹாசனும் இணையும் தலைவர் 173 திரைப்படத்தின் அதிகாரப்பூர்வ அறிவிப்பு வெளியாகியுள்ளது.
தலைவர் 173 ’தர்மன்’
கமல்ஹாசனின் 'ராஜ் கமல் பிலிம்ஸ் இன்டர்நேஷனல்' தயாரிப்பில், ரஜினிகாந்த் நடிக்கும் அவரது 173-வது திரைப்படத்திற்கு "தர்மன்" எனப் பெயரிடப்பட்டுள்ளது. இயக்குநர் அஷ்வத் மாரிமுத்து இயக்கும் இத்திரைப்படத்திற்கு அனிருத் இசையமைக்கிறார்.
தர்மன் நட்சத்திர பட்டாளம்
சிம்ரன், ராஷி கண்ணா மற்றும் ராகவா லாரன்ஸ் ஆகியோர் முக்கிய வேடங்களில் நடிக்கின்றனர்.
இப்படத்தின் தொடக்க விழாவில் கமல் மற்றும் ரஜினி இருவரும் தங்களின் 50 ஆண்டுக்கால நட்பு மற்றும் சினிமா பயணம் குறித்த சுவாரசியமான நினைவுகளைப் பகிர்ந்துகொண்டனர்.
40 ஆண்டுகளாகத் தொடர்ந்த கதை தேடல்: கமல்ஹாசன் உரை
விழாவில் பேசிய தயாரிப்பாளரும் நடிகருமான கமல்ஹாசன், தானும் ரஜினிகாந்தும் இணைந்து பணியாற்றுவதற்காகக் கடந்த 40 ஆண்டுகளாகக் கதை தேடி அலைந்ததாக தெரிவித்தார்.
50 ஆண்டுகால நட்பு
"50 ஆண்டுகளுக்கு முன்பு தொடங்கிய எங்கள் நட்பு, சில ஆண்டுகளிலேயே சமமான நிலையை எட்டியது. அவர் ஆரம்பத்தில் சிறிய கதாபாத்திரங்களில் நடித்தாலும், இரண்டு ஆண்டுகளில் இருவரும் ஒரே நிலைக்கு வந்துவிட்டோம்.
நாங்கள் இருவரும் பம்பாய்க்கு விமானத்தில் பயணம் செய்யும்போதுதான், ஒரு படம் இணைந்து செய்ய வேண்டும் என்ற முடிவை எடுத்தோம்.
இரண்டு படங்கள் செய்ய திட்டம்
அதற்காகக் கதை தேடும் பணி 40 ஆண்டுகள் தொடர்ந்தது. சமீபத்தில் இந்த அலுவலகத்தைத் திறக்கும்போதுதான் மீண்டும் அதைப் பற்றிப் பேசினோம். இப்போது கதை அமைந்ததும் இரண்டு படங்கள் செய்யத் திட்டமிட்டோம்." என்று கமல் குறிப்பிட்டார்.
திரையுலகிற்கு தலைவணங்குகிறேன்
மேலும், ஏவிஎம் வேப்ப மரத்தடியில் அமர்ந்திருந்த இரு இளைஞர்கள் இன்று இவ்வளவு பெரிய உயரத்தை எட்டியதற்கு ரசிகர்களின் அன்பே காரணம் என்றும், தங்களை மார்க்கெட்டில் நிலைநிறுத்திய திரையுலகிற்கு தலைவணங்குவதாகவும் அவர் நெகிழ்ச்சியுடன் கூறினார்.
கமல் கொடுத்த முழுப் பொறுப்பு: ரஜினிகாந்த் பேச்சு
இப்படத்தின் விழா மேடையில் பேசிய நடிகர் ரஜினிகாந்த், படத்தின் இயக்குநர் தேர்வு மற்றும் கமலுடனான தனது ஆரம்பக்கால நட்பு குறித்துப் பல விஷயங்களைப் பகிர்ந்துகொண்டார்:
4-வது இயக்குநராக ஒப்பந்தமான அஷ்வத் மாரிமுத்து
முதலில் கே.எஸ். ரவிகுமார், பின்னர் சுந்தர் சி, அதன் பிறகு சிபி சக்ரவர்த்தி என இயக்குநர்கள் மாறினர். சிபி சொன்ன அணு விஞ்ஞானி சம்பந்தப்பட்ட கதை மிகவும் உணர்வுபூர்வமானது என்பதால், அதற்கு அதிக காலம் தேவைப்படும் என தள்ளி வைக்கப்பட்டதாக ரஜினி விளக்கினார்.
அஷ்வத்தின் 'டிராகன்' படத்தில் ஒரு நல்ல மெசேஜ் இருந்ததால் அவர் மீது நம்பிக்கை வந்ததாகக் குறிப்பிட்டார்.
கமல் தந்த பொறுப்பு
"கதையை நான் கேட்கவில்லை, நீங்களே கேட்டு சொல்லுங்கள்" என்று படத்தின் முழுப் பொறுப்புகளையும் கமல் தன்னிடம் ஒப்படைத்ததாகவும், அது தனக்கு கொஞ்சம் பயத்தைத் தந்ததாகவும் ரஜினி கூறினார்.
நெகிழ்ச்சியான ஆரம்பக்கால நட்பு
1975-களில் கமல் பெரிய ஸ்டாராக இருந்தபோதுதான் தான் சினிமாவுக்கு வந்ததாகக் குறிப்பிட்ட ரஜினி, 'இளமை ஊஞ்சலாடுகிறது' படத்தில் முதலில் ஜெய்கணேஷ் நடிக்க வேண்டிய வேடத்தில், கமல் ஸ்ரீதரிடம் பேசி தனக்கு அந்த வாய்ப்பை பெற்றுத் தந்ததை நன்றியோடு நினைவு கூர்ந்தார்.
ஒட்டுமொத்தத் திரைத்துறையின் சூழல் சரியாக இருக்க, அனைத்துப் படங்களும் வெற்றி பெற வேண்டும் என்று கூறி படக்குழுவினர் தங்களது வாழ்த்துகளைப் பரிமாறிக்கொண்டனர்.
====
