UPI பரிவர்த்தனைகளுக்கு கட்டணம் விதிக்கப்படுமா என்ற விவாதம் கடந்த சில வாரங்களாக நீடித்து வந்த நிலையில், அதற்கு முற்றுப்புள்ளி வைக்கும் வகையில் மத்திய அரசு புதிய அறிவிப்பை வெளியிட்டுள்ளது.
அதன்படி, ரூ.2,000 வரையிலான UPI பரிவர்த்தனைகள் மற்றும் RuPay டெபிட் கார்டு பரிவர்த்தனைகளுக்கு வங்கிகள் அல்லது கட்டண சேவை வழங்குநர்கள் எந்தவித கட்டணமும் வசூலிக்க முடியாது என தெரிவிக்கப்பட்டுள்ளது.
செப்டம்பர் 14 அன்று வெளியிடப்பட்ட அரசிதழ் அறிவிப்பில், ரூ.2,000 வரை மேற்கொள்ளப்படும் UPI பரிவர்த்தனைகள் மற்றும் RuPay டெபிட் கார்டு கட்டணங்கள் குறிப்பிட்ட மின்னணு கட்டண முறைகளாக அறிவிக்கப்பட்டுள்ளன.
இந்த பரிவர்த்தனைகளில் பணம் செலுத்துபவர் அல்லது பெறுபவர் மீது நேரடியாகவோ மறைமுகமாகவோ கட்டணம் விதிக்கக் கூடாது என்று குறிப்பிடப்பட்டுள்ளது.
சமீபத்தில் Payment and Settlement Systems Act-ல் செய்யப்பட்ட திருத்தங்களுக்குப் பிறகு, UPI-க்கு கட்டணம் வரலாம் என்ற தகவல்கள் பரவின.
இதனால் பொதுமக்கள் மத்தியில் குழப்பம் ஏற்பட்டது. இதையடுத்து, சிறிய அளவிலான டிஜிட்டல் பரிவர்த்தனைகள் தொடர்ந்து இலவசமாக இருக்கும் என அரசு மீண்டும் உறுதி செய்துள்ளது.
ரூ.2,000-க்கு மேற்பட்ட சில வணிக (Merchant) பரிவர்த்தனைகளுக்கு எதிர்காலத்தில் MDR (Merchant Discount Rate) போன்ற கட்டணங்கள் விதிக்கப்பட வாய்ப்பு இருப்பதாக தகவல்கள் வெளியாகியுள்ளன.
ஆனால் அதன் அளவு, விதிமுறைகள் மற்றும் அமல்படுத்தும் முறை குறித்து இறுதி முடிவு இன்னும் அறிவிக்கப்படவில்லை.
சாதாரண பயனாளர்களுக்கான UPI சேவை இலவசமாகவே தொடரும் என அரசு கூறியுள்ளது.
இந்த நடவடிக்கை மூலம் சிறு வணிகர்கள், கடைக்காரர்கள் மற்றும் பொதுமக்கள் அதிக அளவில் டிஜிட்டல் பரிவர்த்தனைகளை பயன்படுத்த ஊக்கம் பெறுவார்கள் என்று எதிர்பார்க்கப்படுகிறது.
இந்தியாவின் டிஜிட்டல் கட்டண கட்டமைப்பை மேலும் வலுப்படுத்தவும், UPI பயன்பாட்டை அதிகரிக்கவும் இந்த முடிவு உதவும் என நிபுணர்கள் கருதுகின்றனர்.
2016-ல் அறிமுகமான UPI, இன்று உலகின் மிகப்பெரிய நிகழ்நேர (Real-Time) டிஜிட்டல் கட்டண அமைப்பாக வளர்ந்துள்ளது.
கோடிக்கணக்கான மக்கள் தினசரி UPI-ஐ பயன்படுத்தி வரும் நிலையில், பொதுமக்களுக்கு கட்டணமின்றி சேவையை தொடர்ந்து வழங்க அரசு உறுதி அளித்துள்ளது.
=================
