ஒரே சீரான புதிய நடைமுறை
கிராமப்புற சமையல் எரிவாயு நுகர்வோருக்கு சாதகமாக, எல்பிஜி சிலிண்டர் முன்பதிவு செய்வதற்கான கால இடைவெளியை மத்திய அரசு கணிசமாகக் குறைத்துள்ளது.
நகர்ப்புறம் vs கிராமம்- இடைவெளிக் குறைப்பு
இதுவரை 45 நாட்களாக இருந்த இந்த முன்பதிவு வரம்பு, தற்போது 25 நாட்களாக மாற்றப்பட்டுள்ளது. இதன் மூலம் நகர்ப்புறம் மற்றும் கிராமப்புறப் பகுதிகளுக்கு இடையே நிலவி வந்த நடைமுறை வேறுபாடுகள் களையப்பட்டு, நாடு முழுவதும் அனைத்துப் பகுதி மக்களுக்கும் ஒரே சீரான விநியோக விதிமுறைகள் அமலுக்கு வந்துள்ளன.
கட்டுப்பாடுகள் நீக்கம் குறித்து அமைச்சர் விளக்கம்
சமையல் எரிவாயு விநியோகச் சங்கிலி தற்போது முழுமையாக சீரடைந்துள்ளதாகவும், நிலுவையில் இருந்த முன்பதிவுகள் அனைத்தும் விநியோகிக்கப்பட்டு இயல்புநிலை திரும்பியுள்ளதாகவும் மத்திய பெட்ரோலியம் மற்றும் இயற்கை எரிவாயு துறை இணை அமைச்சர் சுரேஷ் கோபி தெரிவித்துள்ளார்.
மத்திய அமைச்சரின் முக்கிய அறிவிப்பு
இது குறித்து அவர் வெளியிட்ட தகவலில், நாடு முழுவதும் உள்ள அனைத்து வீட்டு உபயோக எல்பிஜி பயனாளர்களும் இனி 25 நாட்களுக்கு ஒருமுறை தங்களது அடுத்த சிலிண்டரை முன்பதிவு செய்ய முடியும் எனக் குறிப்பிட்டுள்ளார்.
மேலும், இந்த புதிய விதியை உடனடியாக நடைமுறைப்படுத்துமாறு எண்ணெய் நிறுவனங்களுக்கு அனுப்பப்பட்ட அதிகாரப்பூர்வ கடிதத்தையும் அவர் பகிர்ந்துள்ளார்.
கட்டுப்பாடுகளுக்கான பின்னணி
முன்னதாக, அமெரிக்கா - ஈரான் இடையேயான போர்ச் சூழல் காரணமாக ஹார்முஸ் நீரிணை வழியிலான கடல் வழிப் போக்குவரத்து பாதிக்கப்பட்டதில், இந்தியாவிற்கான எல்பிஜி இறக்குமதியில் தட்டுப்பாடு ஏற்பட்டது.
ஜூன் மாதம் முழுமையாக திரும்பப் பெறப்பட்ட கட்டுப்பாடுகள்
இந்த நெருக்கடியைச் சமாளிக்கவே நகர்ப்புறங்களுக்கு 25 நாட்கள் மற்றும் கிராமப்புறங்களுக்கு 45 நாட்கள் எனச் சிலிண்டர் முன்பதிவில் தற்காலிகக் கட்டுப்பாடுகள் விதிக்கப்பட்டன. பின்னர் நிலைமை சீரடைந்ததைத் தொடர்ந்து, வணிகப் பயன்பாட்டுக்கான எல்பிஜி விநியோகக் கட்டுப்பாடுகள் கடந்த ஜூன் மாதமே முழுமையாகத் திரும்பப் பெறப்பட்டன.
விலை நிலவரம் மற்றும் தற்போதைய நிலை
சர்வதேசச் சூழலால் ஏற்பட்ட விநியோக நெருக்கடியால் உள்நாட்டில் எரிவாயு விலையும் உயர்வைக் கண்டது. கடந்த மார்ச் மாதத்தில் ரூ.60 மற்றும் ஜூன் மாதத்தில் ரூ.29 என இருமுறை விலை உயர்த்தப்பட்டதைத் தொடர்ந்து, சென்னையில் 14.2 கிலோ எடை கொண்ட வீட்டு உபயோகச் சிலிண்டரின் விற்பனை விலை ரூ.957.50 ஆக நிலவுகிறது.
விலை உயர்வு சுமை ஒருபுறம் இருந்தாலும், தற்போது முன்பதிவுக் கட்டுப்பாடுகள் தளர்த்தப்பட்டிருப்பது கிராமப்புற நுகர்வோருக்குப் பெரும் ஆறுதலை அளித்துள்ளது.
======
