தங்கத்திற்கு நிகரான மங்களப் பொருட்கள்
அட்சய திருதியை என்றாலே பலரும் தங்கம் வாங்குவதை மட்டுமே பிரதானமாகக் கருதுகின்றனர். ஆனால், சாஸ்திரங்களின்படி இந்த நன்னாளில் நாம் வாங்கும் எந்த ஒரு பொருளும் 'அட்சயம்' எனப்படும் குறையாத பலனைத் தரும்.
தங்கத்திற்கு இணையான பொருட்கள்
குறிப்பாக, மகாலட்சுமியின் அம்சம் பொருந்திய சில எளிய பொருட்கள் தங்கத்திற்கு இணையான சுபிட்சத்தை வீட்டிற்குக் கொண்டு வரும்.
1. கல் உப்பு
மகாலட்சுமி பாற்கடலில் தோன்றியவர் என்பதால், கடலில் இருந்து கிடைக்கும் கல் உப்பு மகாலட்சுமியின் நேரடி அம்சமாகக் கருதப்படுகிறது.
அட்சய திருதியை அன்று புதிதாகக் கல் உப்பு வாங்கி, அதை உங்கள் வீட்டு உப்பு ஜாடியில் நிரப்பி வைப்பது வறுமையை நீக்கி, செல்வச் செழிப்பை உண்டாக்கும்.
2. குண்டு மஞ்சள்
மஞ்சள் மங்களத்தின் குறியீடு. இந்த நாளில் புதிதாகக் குண்டு மஞ்சள் வாங்கி பூஜை அறையில் வைப்பது தீய சக்திகளை நீக்கி, வீட்டில் நேர்மறை ஆற்றலைஅதிகரிக்கும்.
இது தடைப்பட்ட சுப காரியங்களை வெற்றிகரமாக நடத்தித் தரும் வலிமை கொண்டது.
3. வெள்ளை மொச்சை அல்லது பருப்பு வகைகள்
தானியங்கள் செழிப்பைக் குறிப்பவை. அட்சய திருதியை அன்று வீட்டிற்குத் தேவையான அரிசி அல்லது பருப்பு வகைகளை வாங்குவது, அந்த ஆண்டு முழுவதும் உணவிற்குப் பற்றாக்குறை ஏற்படாமல் தடுக்கும் என்பது முன்னோர்களின் நம்பிக்கையாக உள்ளது.
4. அகல் விளக்கு மற்றும் பூஜை பொருட்கள்
புதிதாக மண் விளக்குகள் அல்லது பித்தளை விளக்குகள் வாங்குவது வீட்டிற்கு ஒளியையும் தெளிவையும் தரும்.
மேலும் குங்குமம், சந்தனம் போன்ற பூஜை பொருட்களை வாங்குவதும் விசேஷமானது.
5. துளசி அல்லது நெல்லிச் செடி
மகாலட்சுமிக்கு மிகவும் பிடித்தமான துளசி அல்லது நெல்லிச் செடியை இந்த நாளில் வாங்கி வீட்டில் வளர்க்கத் தொடங்குவது, வாஸ்து தோஷங்களை நீக்கி வீட்டில் எப்போதும் தெய்வீகத் தன்மை இருக்கச் செய்யும்.
மறக்கக்கூடாத தானம்
பொருட்களை வாங்குவதை விட, அட்சய திருதியை அன்று இல்லாதவர்களுக்கு உணவு மற்றும் நீர் வழங்குவது அன்னதானம் செய்வது கோடி புண்ணியத்தைத் தரும்.
தங்கம் வாங்க வசதி இல்லாதவர்கள், ஒரு ஏழைக்குத் தயிர் சாதம் அல்லது நீர்மோர் வழங்கினால் கூட அது மகாவிஷ்ணு மற்றும் மகாலட்சுமியின் அருளைப் பெற்றுத் தரும் என்பது ஐதீகமாக உள்ளது.
========
