சமூகநீதி நாளில் சமூக அநீதி- மாணவர் பாரதிதாசனின் கல்விக்கு இடையூறு செய்யக்கூடாது: எதிர்க்கட்சித் தலைவர் உதயநிதி ஸ்டாலின்!

Ambedkar Overseas Scholarship: Udhayanidhi Slams tvk Govt Over Student Bharathidasan

அம்பேத்கர் அயலக கல்வி உதவித்தொகைத் திட்டத்தின் கீழ் மலேசியாவில் ஆராய்ச்சி படிப்பு படித்து வரும் தமிழக மாணவர் பாரதிதாசன், தனக்குக் கல்வி உதவித்தொகை வழங்காமல் அரசு இழுத்தடிப்பதாகவும், தற்போது தனது கல்வியையே கேள்விக்குறியாக்கும் வகையில் நெருக்கடி தருவதாகவும் கண்ணீர் மல்க வீடியோ ஒன்றை வெளியிட்டிருந்தார்.

இந்த விவகாரம் குறித்து எதிர்க்கட்சித் தலைவர் உதயநிதி தனது எக்ஸ் தள பக்கத்தில் தவெக அரசை வன்மையாகக் கண்டித்து அறிக்கை வெளியிட்டுள்ளார்.

வீடியோவில் மாணவர் பாரதிதாசன் கூறியது

முன்னதாக கடந்த ஏப்ரல் மாதம் முதல் கல்வி உதவித்தொகை கோரி வரும் நிலையில், இதுவரை உதவித்தொகை வந்து சேரவில்லை எனத் தெரிவித்திருந்தார்.

ஆனால் அமைச்சர் வன்னி அரசு அனைத்தும் சரியாகத்தான் செயல்படுத்தப்பட்டு வருகிறது என மாணவரின் குற்றச்சாட்டுக்கு மறுப்பு தெரிவித்திருந்தார்.

இந்நிலையில் தற்போது மாணவர் பாரதிராஜன் மீண்டும் வீடியோ ஒன்றை வெளியிட்டு, அதில் உதவித்தொகை கிடைக்காததால் பல்கலைக்கழகத்தில் இருந்து வெளியேற்றப்படும் சூழல் உருவாகியுள்ளதாகக் வேதனை தெரிவித்துள்ளார்.

கேள்வி எழுப்பும் தவெக அரசு? மாணவர் வேதனை

மேலும் ஆராய்ச்சிக்குத் தேவையான உபகரணங்கள் வாங்கிய விவரங்கள் குறித்து அரசு தரப்பில் மின்னஞ்சல்கள் வருகின்றன. இவை அனைத்தும் ஆராய்ச்சிக்குத்தான் வாங்கப்பட்டதா என்று கேள்வி எழுப்புகிறார்கள்.

என்னை படிக்க வேண்டாம் என்று சொல்கிறீர்களா?" என கண்ணீருடன் மாணவர் பாரதிராஜன் கேள்வி எழுப்பியுள்ளார்.

உதயநிதி வெளியிட்ட அறிக்கை

இந்நிலையில் எதிர்க்கட்சித் தலைவர் உதயநிதி ஸ்டாலின் தனது சமூக வலைதளப் பக்கத்தில் அறிக்கை ஒன்றை வெளியிட்டுள்ளார்.

அந்த அறிக்கையில், சமூக நீதி நாளில் இப்படி ஒரு சமூக அநீதியை அரங்கேற்றி இருக்கும் அரசை வன்மையாகக் கண்டிப்பதாகக் குறிப்பிட்ட உதயநிதி ஸ்டாலின் , தன்னுடைய தவறை மறைக்க அடுத்தவர் மீது பழிபோடும் இந்த ஆட்சியாளர்கள், உதவித்தொகை வரவில்லை என்று சொன்ன மாணவரைக் குறிவைத்து நெருக்கடி தருவது கேவலத்தின் உச்சம் எனச் சாடியுள்ளார்.

ரோஹித் வெமுலா ஒப்பீடு

ரோஹித் வெமுலாவுக்கு நடந்த அதே கொடுமையை இந்த அரசு தனக்குச் செய்வதாக மனம் நொந்து பேசியிருக்கும் மாணவர் பாரதிதாசனின் கல்வியைப் பாழாக்கும் வேலையில் அரசு இறங்கக் கூடாது என வலியுறுத்தியுள்ளார்.

உடனடி உதவி தேவை

மேலும் மாணவருக்கு சேர வேண்டிய கல்வி உதவித்தொகை உடனடியாகக் கிடைக்கவும், அவரது ஆராய்ச்சி படிப்பு எவ்வித இடையூறுமின்றி தொடரவும் அரசு நடவடிக்கை எடுக்க வேண்டும் எனவும் எதிர்க்கட்சித் தலைவர் உதயநிதி ஸ்டாலின் கோரிக்கை விடுத்துள்ளார்.

======