கடந்த சில வாரங்களாக சென்னை உள்ளிட்ட பல்வேறு பகுதிகளில் அடிக்கடி மின்வெட்டு ஏற்படுவதாக பொதுமக்கள் குற்றம்சாட்டி வருகின்றனர்.
குறிப்பாக இரவு நேர மின்வெட்டுகள் மற்றும் நீண்ட நேர மின் தடை குறித்து சமூக வலைதளங்களிலும் புகார்கள் அதிகரித்துள்ளன.
மின் உற்பத்தி, விநியோக கட்டமைப்பு மற்றும் புகார் மேலாண்மை அமைப்பு குறித்த கேள்விகளும் எழுந்துள்ளன.
இந்த சூழலில், சென்னை அண்ணா சாலையில் உள்ள அலுவலகத்தில் முதல்வர் விஜய், மின்துறை மற்றும் மின்வாரிய உயரதிகாரிகளுடன் ஆலோசனை மேற்கொண்டார்.
மாநிலம் முழுவதும் நிலவும் மின் விநியோக நிலவரம், அதிக புகார்கள் வரும் பகுதிகள் மற்றும் அவற்றை சரிசெய்ய எடுக்கப்பட்டுள்ள நடவடிக்கைகள் குறித்து அதிகாரிகளிடம் விரிவான அறிக்கை கேட்டதாக கூறப்படுகிறது.
முதல்வர் விஜய் மேற்கொண்ட இந்த ஆய்வின் போது, மின்துறை அமைச்சரும் திருப்பரங்குன்றம் தொகுதி எம்.எல்.ஏவுமான சி.டி.ஆர். நிர்மல் குமாரும் உடன் இருந்தார்.
மாநிலம் முழுவதும் நிலவும் மின்வெட்டு நிலவரம், அதிக புகார்கள் பதிவாகும் பகுதிகள் மற்றும் அவற்றை சரிசெய்ய எடுக்கப்பட்டு வரும் நடவடிக்கைகள் குறித்து அதிகாரிகளுடன் அவர் ஆலோசனை நடத்தியதாக கூறப்படுகிறது.
அண்மைக்காலமாக மின்வெட்டு தொடர்பாக பொதுமக்கள் தொடர்ந்து புகார்கள் தெரிவித்து வரும் நிலையில், இந்த ஆய்வுக் கூட்டம் முக்கியத்துவம் பெற்றுள்ளது.
பொதுமக்களின் அன்றாட வாழ்க்கையை பாதிக்கும் மின்வெட்டு பிரச்சனைகளுக்கு உடனடி தீர்வு காண வேண்டும் என்றும், புகார்கள் வரும் பகுதிகளில் சிறப்பு கவனம் செலுத்த வேண்டும் என்றும் அதிகாரிகளுக்கு முதல்வர் அறிவுறுத்தியதாக தகவல்கள் வெளியாகியுள்ளன.
மேலும், மின் விநியோக கட்டமைப்பை வலுப்படுத்தும் பணிகளை விரைவுபடுத்தவும் ஆலோசிக்கப்பட்டதாக கூறப்படுகிறது.
மின்வெட்டு பிரச்சனை தொடர்பாக அரசின் நடவடிக்கைகள் தீவிரமடைந்துள்ள நிலையில், நிலைமை விரைவில் சீராகும் என்ற எதிர்பார்ப்பு பொதுமக்களிடையே உருவாகியுள்ளது.
குறிப்பாக சென்னையில் தொடர்ச்சியாக எழுந்து வரும் புகார்களுக்கு நிரந்தர தீர்வு கிடைக்குமா என்ற கேள்விக்கு அடுத்தகட்ட நடவடிக்கைகளே பதில் அளிக்கும் என எதிர்பார்க்கப்படுகிறது.
====================
