தமிழக முதலமைச்சர் விஜய்யின் அரசியல் பிரிவு சிறப்புப் பணி அலுவலராக நியமிக்கப்பட்ட ரிக்கி ரத்தன் பண்டிட்டின் நியமன உத்தரவை, வெளியான 24 மணி நேரத்திற்குள்ளாகவே தமிழக அரசு அதிரடியாகத் திரும்பப் பெற்றுள்ளது..
யார் இந்த ரிக்கி ரத்தன் பண்டிட்?
திருப்பூர் மாவட்டம் ஊத்துக்குளியைச் சேர்ந்த இவர், ஆரம்பகாலத்தில் ஒரு கிரிக்கெட் வீரராக இருந்தவர். பின்னர் ஆன்மீகம், ஜோதிடம் மற்றும் எண்கணிதத் துறையில் கடந்த 40 ஆண்டுகளுக்கும் மேலாக ஈடுபட்டு வருகிறார்.
ஜெயலலிதாவின் நம்பிக்கைக்குரிய ஆலோசகர்
1989-ல் ஜெயலலிதா முதலமைச்சராவார் என்றும், 1996-ல் அவர் சிறை செல்ல நேரிடும் என்றும் இவர் கணித்ததாகக் கூறப்படுகிறது. இதன் காரணமாக மறைந்த முன்னாள் முதல்வர் ஜெயலலிதாவின் நம்பிக்கைக்குரிய ஆலோசகராக இவர் விளங்கியுள்ளார்.
விஜய்யுடனான நெருக்கம்
தமிழக வெற்றிக் கழகத்தின் பெயரில் 'V' என்ற எழுத்து இருக்க வேண்டும் என்றும், விக்கிரவாண்டியில் மாநாடு நடத்த வேண்டும் என்றும் ஆலோசனை வழங்கியது இவர்தான் என்றும் விஜய்யின் ஆன்மீகப் பயணங்களிலும் இவர் உடனிருந்துள்ளார் என்றும் தகவல்கள் தெரிவிக்கின்றன.
நியமன உத்தரவிற்கு எழுந்த கடும் எதிர்ப்புகள்
இந்நிலையில் ரிக்கி ரத்தன் பண்டிட்டின் நியமனம் குறித்த அரசாணை வெளியான உடனே, பல்வேறு முற்போக்கு அமைப்புகள் மற்றும் அரசியல் தலைவர்களிடமிருந்து கடும் கண்டனங்கள் எழுந்தன:
அரசியலமைப்புச் சட்டத்திற்கு எதிரானது:வன்னி அரசு
ஒரு ஜோதிடரை அரசுப் பதவியில் அமர்த்துவது மக்களாட்சி தத்துவத்திற்கும், அம்பேத்கரின் அரசியலமைப்புச் சட்டத்திற்கும் எதிரானது என விசிக துணைப் பொதுச்செயலாளர் வன்னி அரசு விமர்சித்தார்.
அறிவியல் பார்வை:சிபிஎம் சண்முகம்
அறிவியல் கண்ணோட்டத்தை வளர்க்க வேண்டிய அரசு, இது போன்ற நியமனங்கள் மூலம் மூடநம்பிக்கைகளை ஊக்குவிக்கக் கூடாது என சிபிஎம் சண்முகம் வலியுறுத்தினார்.
சட்டப் போராட்டம்: கிருஷ்ணமூர்த்தி
இந்த நியமனத்திற்கு எதிராகச் சென்னை உயர் நீதிமன்றத்தில் வழக்கறிஞர் கிருஷ்ணமூர்த்தி என்பவர் அவசர மனுத் தாக்கல் செய்தார்.
திருமாவளவன் கருத்து
விசிக தலைவர் திருமாவளவன் இவரைத் தவெக-வின் செய்தித் தொடர்பாளர் என்று குறிப்பிட்டு, "ஜோதிடத்தை நம்புவது தனிப்பட்ட விஷயம்; அது மதவாத அரசியல் கிடையாது" என சற்று மாறுபட்ட கருத்தைப் பதிவு செய்திருந்தார்.
அரசு எடுத்த அதிரடி முடிவு
சட்டப்பேரவையில் விசிக எம்.எல்.ஏ வன்னி அரசு மற்றும் தேமுதிக எம்.எல்.ஏ பிரேமலதா விஜயகாந்த் ஆகியோர் எழுப்பிய கண்டனங்களைத் தொடர்ந்து, உரிய நடவடிக்கை எடுக்கப்படும் என முதலமைச்சர் விஜய் உறுதியளித்திருந்தார்.
ஒரே நாளில் உத்தரவு ரத்து
அதன்படி, மக்கள் பிரதிநிதிகளின் உணர்வுகளுக்கு மதிப்பளிக்கும் வகையில், நியமனம் செய்யப்பட்ட ஒரே நாளில் cmஅந்த உத்தரவு ரத்து செய்யப்பட்டுள்ளது.
சட்டப்பேரவைக் கூட்டத்தொடர் முடிந்த கையோடு வெளியான இந்த அறிவிப்பு, தமிழக அரசியலில் பெரும் பரபரப்பை ஏற்படுத்தியுள்ளது.
=====
