”என் இனிய தமிழ் மக்களே” இயக்குநர் இமயம் பாரதிராஜா... காற்றோடு கலந்த காந்தக் குரல்!

இயக்குநர் இமயம் பாரதிராஜா மறைவு

தமிழ் திரையுலகை நான்கு சுவர்களுக்குள் இருந்து வெளிக் கொண்டுவந்து, தென் தமிழகத்துக் கிராமங்களின் மண்வாசனையையும், எளிய மனிதர்களின் எதார்த்த வாழ்வியலையும் உலகத் திரையரங்குகளில் பிரதிபலிக்க செய்த 'இயக்குநர் இமயம்' பாரதிராஜா (வயது 84) இன்று காலை காலமானார்.

தீவிர சிகிச்சையில் இருந்த பாரதிராஜா

கடந்த சில மாதங்களாகவே வயது முதிர்வு மற்றும் உடல்நலக் குறைபாடு காரணமாகச் சென்னையில் உள்ள அவரது இல்லத்தில் தீவிர மருத்துவக் கண்காணிப்பில் இருந்து வந்த அவர், இன்று சிகிச்சை பலனின்றி இயற்கை எய்தினார்.

மகன் மனோஜின் மறைவால் வாடிய இமயம்

கடந்த ஆண்டு அவரது மூத்த மகனும், தமிழ் சினிமா இயக்குநருமான மனோஜ் மாரடைப்பால் திடீரென மரணமடைந்தார். இந்தத் துயரம் பாரதிராஜாவை உடலாலும் மனதாலும் கடுமையாக உலுக்கியது. மகனின் இழப்பிலிருந்து மீள முடியாமல் தவித்து வந்த அவரது உடல்நிலை தொடர்ந்து மோசமடைந்தது.

கலைத்துறையினர், ரசிகர்கள் ஆழ்ந்த இரங்கல்

மருத்துவமனையில் தீவிர சிகிச்சைக்குப் பின் இல்லத்தில் தங்கி சிகிச்சை பெற்று வந்த நிலையில், இன்று அவரது மூச்சு நின்றது. கலை உலகப் பிரமுகர்கள், அரசியல் தலைவர்கள் மற்றும் லட்சக்கணக்கான ரசிகர்கள் அவரது மறைவுக்கு ஆழ்ந்த இரங்கலைத் தெரிவித்து வருகின்றனர்.

தேனியின் 'சின்னசாமி' கோலிவுட்டின் 'இமயமாக' உயர்ந்த வரலாறு

1941 ஆம் ஆண்டு ஆகஸ்ட் 17 ஆம் தேதி தேனி மாவட்டத்தின் அல்லிநகரத்தில் பிறந்தவர் பாரதிராஜா. பெற்றோர் இவருக்கு இட்ட பெயர் சின்னசாமி. ஆரம்பத்தில் அரசுத் துறையில் சுகாதார ஆய்வாளராக தன் பணியைத் தொடங்கிய போதிலும், கலை மீதும் கதைகள் மீதும் அவருக்கு இருந்த ஆர்வம் அவரைச் சும்மா இருக்கவிடவில்லை.

நாடக மேடையில் தொடங்கிய கலைப்பயணம்

நாடக மேடைகளில் தன் கலைப் பயணத்தை தொடங்கி, பின் சினிமா கனவுகளுடன் சென்னைக்கு குடிபெயர்ந்தார். திரையுலகில் நுழைந்த ஆரம்ப காலத்தில் பல்வேறு போராட்டங்களை சந்தித்த அவர், தனது அசாத்திய திறமையால் மெல்ல மெல்ல தனக்கான பாதையை உருவாக்கினார்.

'16 வயதினிலே' ஏற்படுத்திய தாக்கம்

1977 ஆம் ஆண்டு பாரதிராஜாவின் இயக்கத்தில் வெளியான '16 வயதினிலே' திரைப்படம், அதுவரை இருந்த தமிழ் சினிமாவின் இலக்கணங்களைத் தவிடுபொடியாக்கியது.

ஸ்டுடியோ முதல் மண் வாசனை வரை

ஸ்டுடியோக்களுக்குள் பிரம்மாண்ட செட் போட்டு, நாடகப் பாணியில் வசனங்கள் பேசிக் கொண்டிருந்த தமிழ் சினிமாவை, முதல் முறையாகத் தென் மாவட்டத்துக் கிராமத்து வயல்வெளிகளுக்கும், அக்மார்க் மண் வாசனைக்கும் அழைத்து சென்றார்.

என்றும் அழியாத கதாப்பாத்திரங்கள்

மயிலு, சப்பாணி, பரட்டை என அவர் செதுக்கிய கதாபாத்திரங்கள் இன்றும் தமிழ் நெஞ்சங்களில் அழியாமல் வாழ்கின்றன. முதல் படத்திலேயே கமல்ஹாசன், ரஜினிகாந்த், ஸ்ரீதேவி போன்ற உச்ச நட்சத்திரங்களை இயக்கியதோடு, சிறந்த இயக்குநருக்கான தமிழக அரசின் விருதையும் தட்டிச் சென்றார்.

பாரதிராஜாவின் பொற்காலம்

அதைத் தொடர்ந்து, தமிழ்த் திரையுலகில் பாரதிராஜாவின் பொற்காலம் தொடங்கியது. ‘கிழக்கே போகும் ரயில்’ மூலம் கிராமத்துக் காதலைப் பேசியவர், ‘சிகப்பு ரோஜாக்கள்’ மூலம் தமிழ் சினிமாவின் முதல் சைக்கோ-த்ரில்லர் அதிர்வை ஏற்படுத்தினார்.

தொடர்ந்து ‘புதிய வார்ப்புகள்’, ‘அலைகள் ஓய்வதில்லை’, ‘முதல் மரியாதை’, ‘கருத்தம்மா’ என அவர் தொட்ட தலைப்புகள் அனைத்தும் மைல்கற்களாயின.

சாதி ஒழிப்பு, பெண் சிசுக்கொலை, கிராமத்துப் பண்பாடு எனப் பல சமூகப் பிரச்சினைகளைத் தனது கூர்மையான திரைக்கதை மூலம் வெளிச்சம் போட்டுக் காட்டினார். 44 திரைப்படங்களை இவர் இயக்கியுள்ளார்.

நாற்பது ஆண்டுகளுக்கு முன்பே பான்-இந்தியா இயக்குநர்

இன்று 'பான்-இந்தியா' படங்கள் பற்றிப் பேசும் சூழலில், 40 ஆண்டுகளுக்கு முன்பே தமிழ் மட்டுமன்றி தெலுங்கு மற்றும் இந்தித் திரையுலகிலும் முத்திரை பதித்தவர் பாரதிராஜா.

தனது அலைகள் ஓய்வதில்லை திரைப்படத்தை இந்தியில் 'லவர்ஸ்' (Lovers) என்ற பெயரிலும், '16 வயதினிலே' படத்தை 'சோல்வா சாவன்' (Solva Sawan) என்ற பெயரிலும் மறுஆக்கம் செய்தார்.

மேலும் 'சிகப்பு ரோஜாக்கள்' படத்தை 'ரெட் ரோஸ்' (Red Rose) என்றும், 'கிழக்கே போகும் ரயில்' படத்தை 'சவேரே வாலி காடி' (Savere Wali Gaadi) என்றும் இந்தியில் இயக்கி வட இந்திய ரசிகர்களையும் வியக்க வைத்தார்.

அவரது 'முதல் மரியாதை' திரைப்படம் தாஷ்கண்ட் சர்வதேச திரைப்பட விழாவில் திரையிடப்பட்டு உலகளாவிய அங்கீகாரத்தைப் பெற்றது.

புதிய திறமைகளை உருவாக்கிய கலை பல்கலைக்கழகம்

பாரதிராஜா வெறும் இயக்குநர் மட்டுமல்ல, அவர் ஒரு கலைப் பல்கலைக்கழகம். தமிழ்த் திரையுலகிற்கு நடிகர் கார்த்திக், நிழல்கள் ரவி, நடிகைகள் ராதிகா, ரேவதி, ராதா எனப் பிற்காலத்தில் கோலிவுட்டை ஆண்ட பல நட்சத்திரங்களை அறிமுகப்படுத்திய பெருமை இவருக்கு உண்டு.

இயக்குநர்கள் பாக்கியராஜ், மணிவண்ணன் உள்ளிட்ட பல ஆளுமைகளைத் தனது பாசறையில் இருந்து உருவாக்கியவர்.

'கல்லுக்குள் ஈரம்' திரைப்படத்தில் இயக்குநராகவும் நடிகராகவும் கேமரா முன்னால் நின்ற பாரதிராஜா, 2000 ஆம் ஆண்டிற்குப் பிறகு மிகச்சிறந்த குணச்சித்திர நடிகராகப் பரிணமித்தார்.

குணச்சித்திர வேடங்களுக்கு உயிர்க்கொடுத்த இமயம்

மணிரத்னத்தின் 'ஆயுத எழுத்து', 'ரெட்டை சுழி', 'பாண்டியநாடு', 'கென்னடி கிளப்', 'நம்ம வீட்டுப் பிள்ளை', 'திருச்சிற்றம்பலம்' மற்றும் தனுஷுடன் நடித்த 'வாத்தி' வரை அவரது நடிப்புப் பசி அடங்கவில்லை.

இறுதியாக, மலையாளத் திரையுலகின் சூப்பர் ஸ்டார் மோகன்லாலுடன் இணைந்து 'துடரும்' (Thudarum) என்ற திரைப்படத்தில் நடித்திருந்தார். 2020 ஆம் ஆண்டில் 'மீண்டும் ஒரு மரியாதை' என்ற திரைப்படத்தை அவரே தயாரித்து, இயக்கி, ஒளிப்பதிவும் செய்திருந்தார் என்பது அவரது அயராத உழைப்பிற்குச் சான்று.

விருதுகளும் காலத்தால் அழியாத காந்தக் குரலும்

இவரது அசாத்திய கலை சேவையைப் பாராட்டி, 2004 ஆம் ஆண்டு இந்திய அரசு நாட்டின் நான்காவது உயரிய விருதான 'பத்மஸ்ரீ' வழங்கி கௌரவித்தது.

இதுதவிர, சிறந்த இயக்குநருக்காகவும் சிறந்த படங்களுக்காகவும் 6 முறை தேசிய விருதுகளையும், 6 முறை தமிழக அரசின் மாநில விருதுகளையும் பெற்றுள்ளார்.

சின்னத்திரையில் தெக்கத்திப் பொண்ணு

மேலும் சர்வதேச அளவிலும், உள்நாட்டிலும் நூற்றுக்கணக்கான விருதுகளை வென்று குவித்துள்ளார். சின்னத்திரை உலகிலும் தடம் பதித்த அவர், 'தெக்கத்திப் பொண்ணு' போன்ற வெற்றிகரமான தொலைக்காட்சித் தொடர்களையும் இயக்கியுள்ளார்.

என்றென்றும் இதயங்களில் ஒலிக்கும் இமயம்

"கலைஞனுக்கு என்றும் மரணமில்லை. தமிழ் மொழி மற்றும் தமிழ் சினிமா உள்ளவரை, திரையின் முன்னால் தோன்றி, 'என் இனிய தமிழ் மக்களே, உங்கள் பாசத்திற்குரிய பாரதிராஜா பேசுகிறேன்...' என்று அவர் விதைத்த அந்த காந்தக் குரல், தலைமுறைகள் தாண்டியும் தமிழர்களின் இதயங்களில் ஒலித்துக் கொண்டே இருக்கும்!"