TNPSC Group 4 Application Deadline Extended Notice
விண்ணப்ப கால அவகாசம் நீட்டிப்பு
தமிழ்நாடு அரசுப் பணியாளர் தேர்வாணையம் நடத்தும் குரூப் -4 தேர்வுக்கு விண்ணப்பிப்பதற்கான கடைசி தேதி வரும் நவம்பர் 8 ஆம் தேதி வரை நீட்டிக்கப்பட்டுள்ளதாக தேர்வாணையம் அதிகாரப்பூர்வமாகத் தெரிவித்துள்ளது.
முன்னதாக இன்றுடன் (05-11-2026) விண்ணப்பப் பதிவு முடிவடையும் என அறிவிக்கப்பட்டிருந்த நிலையில், தற்போது இந்த அவகாசம் மேலும் நீட்டிக்கப்பட்டுள்ளது.
தகுதியான தேர்வுகள் டிஎன்பிஎஸ்சியின் அதிகாரப்பூர்வ இணையதளமான www.tnpsc.gov.in என்ற இணையதளம் மூலம் நவம்பர் 8 ஆம் தேதி நள்ளிரவு 11.59 மணி வரையில் ஆன்லைனில் விண்ணப்பித்துக் கொள்ளலாம்.
நீட்டிப்புக்கான முக்கியக் காரணம் - வயது வரம்பு தளர்வு
அரசுப் பணிகளில் நேரடி நியமனத்துக்கான வயது உச்ச வரம்பை மேலும் 5 ஆண்டுகள் உயர்த்த தமிழக அரசின் மனிதவள மேலாண்மைத் துறை சார்பாக கடந்த அக்டோபர் 30-ஆம் தேதி அரசாணை வெளியிடப்பட்டது.
டிஎன்பிஎஸ்சி செயலரான பானோத் ம்ருகேந்தர் லாலா வெளியிட்டுள்ள செய்திக்குறிப்பில், வயது வரம்பு தளர்வு தொடர்பாக முதல்வர் விஜய் வெளியிட்ட அறிவிப்பைத் தொடர்ந்து , டிஎன்பிஎஸ்சி குரூப் - 4 கூடுதல் தேர்வர்கள் பயன் பெறும் வகையில் விண்ணப்ப அவகாசம் நீட்டிக்கப்பட்டுள்ளதாக தெரிவிக்கப்பட்டுள்ளது.
காலிப்பணியிடங்கள் மற்றும் விண்ணப்பித்தோர் விவரம்
கிராம நிர்வாக அலுவலர் (VAO), இளநிலை உதவியாளர், தட்டச்சர், சுருக்கெழுத்து தட்டச்சர், வருவாய் உதவியாளர் உள்ளிட்ட பல்வேறு துறைகளில் காலியாக உள்ள 6,574 பணியிடங்களை நிரப்புவதற்கான அறிவிப்பு கடந்த அக்டோபர் 6-ஆம் தேதி வெளியானது.
கடந்த அக்டோபர் 6 முதலே விண்ணப்பப் பதிவு தொடங்கி நடைபெற்று வரும் நிலையில், செவ்வாய்க்கிழமை நிலவரப்படி 9.80 லட்சத்திற்கும் மேற்பட்டோர் இத்தேர்வுக்கு விண்ணப்பித்துள்ளனர்.
கல்வித் தகுதியும் போட்டி சூழலும்
இத்தேர்வுக்கு விண்ணப்பிப்பதற்கான அடிப்படை கல்வித் தகுதி பத்தாம் வகுப்பு (SSLC) தேர்ச்சி என்றபோதிலும், பட்டதாரிகள், முதுகலை பட்டதாரிகள் மற்றும் பொறியியல் பட்டதாரிகளும் போட்டிபோட்டுக்கொண்டு விண்ணப்பித்து வருகின்றனர்.
எழுத்துத் தேர்வு எப்போது?
குரூப்-4 பணியிடங்களுக்கான எழுத்துத் தேர்வு ஏற்கனவே திட்டமிட்டபடி அடுத்த ஆண்டு ஜனவரி 10-ஆம் தேதி (10.01.2027) நடைபெறவுள்ளது.
எனவே, இதுவரை விண்ணப்பிக்காத நபர்கள் மற்றும் வயது தளர்வு மூலம் புதிய தகுதி பெற்றவர்கள் இந்த வாய்ப்பைப் பயன்படுத்தி உடனடியாக விண்ணப்பிக்குமாறு கேட்டுக்கொள்ளப்படுகிறார்கள்.
===========