பொருளாதார நோபல் பரிசை தட்டி சென்ற இரண்டு அமெரிக்கர்கள் :
2026-ம் ஆண்டுக்கான பொருளாதாரத்துக்கான நோபல் பரிசு அமெரிக்காவைச் சேர்ந்த ராபர்ட் இ. ஹால் மற்றும் மைக்கேல் வுட்ஃபோர்டு ஆகிய இருவருக்கும் அறிவிக்கப்பட்டுள்ளது.
பொருளாதாரத்தில் ஏற்படும் ஏற்ற இறக்கங்களைக் கட்டுப்படுத்தி, நிலையான பொருளாதார வளர்ச்சியை உருவாக்குவதற்கான ஆய்வுகளுக்காக இவர்களுக்கு இந்த விருது வழங்கப்படுகிறது.
ஒரு நாட்டின் பொருளாதாரம் சில நேரங்களில் வேகமாக வளர்ச்சியடையும்; மற்ற நேரங்களில் மந்தநிலையைச் சந்திக்கும்.
இதுபோன்ற ஏற்ற இறக்கங்களைக் கட்டுப்படுத்துவதற்கான பொருளாதாரக் கொள்கைகளை உருவாக்குவதில் ராபர்ட் இ. ஹால் மற்றும் மைக்கேல் வுட்ஃபோர்டு ஆகியோரின் ஆய்வுகள் முக்கியப் பங்கு வகிக்கின்றன.
குறிப்பாக, குடும்பங்கள் மற்றும் நிறுவனங்கள் எடுக்கும் பொருளாதார முடிவுகள் ஒட்டுமொத்த நாட்டின் பொருளாதாரத்தில் எவ்வாறு தாக்கத்தை ஏற்படுத்துகின்றன என்பதை அடிப்படையாகக் கொண்டு இவர்கள் புதிய பொருளாதார மாதிரிகளை உருவாக்கியுள்ளனர்.
பொருளாதார மந்தநிலை ஏற்படும்போது வட்டி விகிதங்களைக் குறைப்பது, அரசின் செலவினங்களை அதிகரிப்பது போன்ற நடவடிக்கைகள் மேற்கொள்ளப்படலாம்.
அதேபோல், பொருளாதாரம் வேகமாக வளரும்போது பணவீக்கத்தைக் கட்டுப்படுத்துவதற்கான நடவடிக்கைகளும் தேவைப்படலாம்.
இத்தகைய சூழல்களில் அரசுகளும் மத்திய வங்கிகளும் எப்போது, எவ்வாறு நிதிக் கொள்கைகள் மற்றும் பணவியல் கொள்கைகளைச் செயல்படுத்த வேண்டும் என்பதைப் புரிந்துகொள்ள இவர்களின் ஆய்வுகள் உதவுகின்றன.
எரிசக்தி நெருக்கடி போன்ற எதிர்பாராத பொருளாதாரச் சவால்களைச் சமாளிப்பதற்கும் இந்த மாதிரிகள் பயன்படுகின்றன.
இந்த ஆண்டுக்கான பொருளாதார அறிவியல் பரிசின் மொத்தப் பரிசுத்தொகை 12 மில்லியன் ஸ்வீடிஷ் குரோனர்.
இந்தத் தொகை இருவருக்கும் சமமாகப் பகிர்ந்து வழங்கப்படும். டிசம்பர் 10-ம் தேதி நடைபெறும் விழாவில் விருதுகள் வழங்கப்பட உள்ளன.
பொருளாதார அறிவியலுக்கான இந்த விருது, ஆல்ஃபிரட் நோபலின் அசல் உயிலில் இடம்பெற்ற ஐந்து நோபல் பரிசுகளில் ஒன்று அல்ல.
ஸ்வீடன் மத்திய வங்கியால் 1968-ம் ஆண்டு நிறுவப்பட்ட இந்த விருது, 1969 முதல் வழங்கப்பட்டு வருகிறது.
====================
