1962-ஆம் ஆண்டு இந்தியாவுக்கும் சீனாவுக்கும் இடையே போர் நடைபெற்றது. 2020-ஆம் ஆண்டு கல்வான் பள்ளத்தாக்கில் இரு நாடுகளின் ராணுவ வீரர்களுக்கும் இடையே கடுமையான மோதல் ஏற்பட்டது.
2022-ஆம் ஆண்டு அருணாச்சலப் பிரதேசத்தின் தவாங் பகுதியிலும் மோதல் நிகழ்ந்தது. இந்நிலையில், தற்போது மீண்டும் அருணாச்சலப் பிரதேச எல்லையில் பதற்றம் ஏற்பட்டுள்ளதாகத் தகவல்கள் வெளியாகியுள்ளன.
இந்தியாவுக்கும் சீனாவுக்கும் இடையிலான எல்லைப் பிரச்சினை பல ஆண்டுகளாகத் தொடர்ந்து வருகிறது.
குறிப்பாக, அருணாச்சலப் பிரதேசத்தின் மீதான உரிமை தொடர்பாக இரு நாடுகளுக்கும் இடையே கருத்து வேறுபாடு நிலவுகிறது.
அருணாச்சலப் பிரதேசம் இந்தியாவின் ஒருங்கிணைந்த மாநிலமாகும்.
ஆனால், சீனா இந்தப் பகுதியைத் தனது நிலப்பரப்பின் ஒரு பகுதியாகக் கூறி வருகிறது. தெற்கு திபெத் என்றும் அப்பகுதியைக் குறிப்பிடுகிறது.
இந்தியா – சீனா இடையிலான எல்லைப் பிரச்சினை 1962-ஆம் ஆண்டு போராக வெடித்தது.
அந்த ஆண்டு அக்டோபர் 20-ஆம் தேதி தொடங்கிய போரின்போது, சீன ராணுவம் லடாக் மற்றும் அப்போதைய வடகிழக்கு எல்லைப் பகுதிகளில் முன்னேறியது.
தற்போதைய அருணாச்சலப் பிரதேசத்தின் பல பகுதிகளிலும் சீனப் படைகள் முன்னேறின.
சுமார் ஒரு மாத காலத்திற்குப் பிறகு, நவம்பர் 21-ஆம் தேதி சீனா ஒருதலைப்பட்சமாகப் போர் நிறுத்தத்தை அறிவித்தது.
2020-ஆம் ஆண்டு ஜூன் மாதம், லடாக் பகுதியில் உள்ள கல்வான் பள்ளத்தாக்கில் இந்திய மற்றும் சீன ராணுவ வீரர்களுக்கு இடையே கடுமையான மோதல் ஏற்பட்டது.
இந்த மோதலில் 20 இந்திய ராணுவ வீரர்கள் உயிரிழந்தனர். சீனத் தரப்பிலும் உயிரிழப்புகள் ஏற்பட்டன.
இந்தச் சம்பவம் இரு நாடுகளுக்கும் இடையிலான உறவில் பெரும் தாக்கத்தை ஏற்படுத்தியது.
இதனைத் தொடர்ந்து, எல்லைப் பகுதிகளில் ராணுவ நடவடிக்கைகள் மற்றும் பேச்சுவார்த்தைகள் முக்கியத்துவம் பெற்றன.
இந்தச் சூழலில், அருணாச்சல பிரதேச எல்லையில் மீண்டும் பதற்றம் ஏற்பட்டுள்ளதாகத் தகவல்கள் வெளியாகியுள்ளன.
இந்திய-திபெத் எல்லைக் காவல் படையின் தலைவர் ஷத்ருஜீத் சிங் கபூர், அக்டோபர் 22-ஆம் தேதி வெளியிட்ட தகவலின்படி, அருணாச்சலப் பிரதேசத்தின் பல்வேறு இடங்களில் இந்திய மற்றும் சீனப் படையினர் நேருக்கு நேர் சந்திக்கும் சூழல் தொடர்ந்து நிலவுகிறது.
அப்பர் சுபன்சிரி மாவட்டத்தில் உள்ள தக்சிங், அசாபிலா மற்றும் லோங்ஜு ஆகிய பகுதிகள் எல்லைப் பிரச்சினை தொடர்பாகக் கவனம் பெற்றுள்ளன.
===================
