27ம் தேதி விநாயகர் சதுர்த்தி :
Hindu Munnani on Vinayagar Chaturthi 2025 Idols : நாடு முழுவதும் விநாயகர் சதுர்த்தி விழா வரும் 27ம் தேதி கொண்டாடப்பட உள்ளது. இதற்காக சிலைகள் தயாரிப்பு பணி முழு வீச்சில் நடைபெற்று வருகிறது. தமிழகத்தில் விநாயகர் சிலைகளை வைத்து வழிபாடு நடத்த இடங்கள் தேர்வு செய்யப்பட்டு பணிகள் நடந்து வருகின்றன.
ஒன்றரை லட்சம் விநாயகர் சிலைகள் :
இந்தநிலையில், திருப்பூரில் செய்தியாளர்களிடம் பேசிய இந்து முன்னணி மாநிலத் தலைவர் காடேஸ்வரா சி.சுப்பிரமணியம், “ விநாயகர் சதுர்த்தி விழாவையொட்டி தமிழ்நாட்டில் ஒன்றரை லட்சம் இடங்களில் சிலைகள் வைக்க ஏற்பாடுகள் நடைபெற்று வருகின்றன. கடந்த ஆண்டு 15 லட்சம் வீடுகளில் அரை அடி முதல் ஒரு அடி வரையிலான விநாயகர் சிலைகள் வைக்கப்பட்டன. இந்த ஆண்டு அதைவிட அதிக எண்ணிக்கையில் சிலைகள் வைக்கப்படும்.
சென்னையில் 5,500 விநாயகர் சிலைகள் :
சென்னையில் மட்டும் 5,500 இடங்களி் விநாயகர் சிலைகள் வைக்கப்பட உள்ளன. திருப்பூர் மாவட்டம் முழுவதும் 6 ஆயிரம் இடங்களில் சிலைகள் வைக்க ஏற்பாடு செய்து வருகிறோம். திருப்பூரில் நடைபெற உள்ள விநாயகர் சதுர்த்தி ஊர்வலத்தில் பாஜக மாநிலத் தலைவர் நயினார் நாகேந்திரன், நடிகை கஸ்தூரி கலந்து கொள்வார்கள். கோவையில் பாஜக முன்னாள் தலைவர் அண்ணாமலை, இயக்குநர்கள் பேரரசு உள்ளிட்டோர் பங்கேற்க உள்ளனர்.
முதல்வர் ஸ்டாலினுக்கு அழைப்பு :
விநாயகர் சதுர்த்தி(Vinayagar Chaturthi 2025) விழாவில் பங்கேற்குமாறு முதல்வர் மு.க. ஸ்டாலினுக்கு(MK Stalin) அழைப்பு விடுப்போம். அவர் நேரம் கொடுத்தால், அவரை சந்தித்து அழைப்பிதழ் வழங்கத் தயாராக இருக்கிறோம். ரம்ஜான், பக்ரீத், கிறிஸ்துமஸ் போன்ற பண்டிகைகளில் அவர் பங்கேற்பதைபோல, விநாயகர் சதுர்த்தி விழாவிலும் பங்கேற்க வேண்டும் என்று அவருக்கு அனுப்பும் கடிதத்தில் வலியுறுத்துவோம்.
மேலும் படிக்க : இயற்கை பொருட்களால் விநாயகர் சிலைகள் : பொதுமக்களுக்கு அறிவுறுத்தல்
இலவசமாக விநாயகர் சிலைகள் :
ரம்ஜானுக்கு அரிசி வழங்குவதைப்போல, வீடுகளுக்கு இலவசமாக அரை அடி விநாயகர் சிலையை தமிழக அரசு இலவசமாக வழங்க வேண்டும் என்றும் முதல்வரிடம் கோரிக்கை வைப்போம்” இவ்வாறு காடேஸ்வரா சி.சுப்பிரமணியம்(Kadeswara Subramaniam) கூறினார்.
===========