TN School Teachers Campus Leaving Ban Order
பள்ளிக் கல்வித் துறையின் சுற்றறிக்கை
அரசு மற்றும் அரசு உதவி பெறும் பள்ளிகளில் பணியாற்றும் ஆசிரியர்கள் பணி நேரத்தில் பள்ளி வளாகத்தை விட்டு வெளியே செல்லக் கூடாது என பள்ளிக் கல்வித்துறை உத்தரவைப் பிறப்பித்துள்ளது.
இது தொடர்பாக அனைத்து மாவட்ட முதன்மைக்கல்வி அலுவலர்களுக்கும் (CEO) சுற்றறிக்கை அனுப்பப்பட்டுள்ளது.
அந்த சுற்றறிக்கையில், பள்ளி வேலை நேரங்களில், மதிய உணவு இடைவேளை உட்பட எந்த காரணத்திற்காகவும் ஆசிரியர்கள் பள்ளி வளாகத்தை விட்டு வெளியே செல்லக் கூடாது என்றும் பள்ளிச் சூழலில் ஏதேனும் அசாதாரண நிகழ்வுகள் நடந்தால், உடனடியாக உயர் அலுவலர்களுக்குத் தகவல் தெரிவித்து அவர்களின் ஆலோசனையைப் பெற வேண்டும் என்றும் குறிப்பிடப்பட்டுள்ளது.
இந்த உத்தரவிற்கான பின்னணி மற்றும் காரணங்கள்
இந்த அதிரடி உத்தரவின் பின்னணியில் பல்வேறு முக்கியக் காரணங்கள் இருப்பதாகக் கல்வித் துறை வட்டாரங்கள் தெரிவிக்கின்றன.
கண்காணிப்பு குறைபாடு
பள்ளி வேலை நேரங்களில் ஆசிரியர்கள் தங்களின் சொந்தக் காரணங்களுக்காகவோ அல்லது வெளி வேலைகளுக்காகவோ வெளியே செல்வதால், வகுப்பறைகளில் மாணவர்களைக் கண்காணிப்பதில் தொய்வு ஏற்படுவதாகப் புகார்கள் எழுந்துள்ளன.
பள்ளியில் மாணவர்களின் பாதுகாப்பு
மதிய உணவு இடைவேளையின் போது ஆசிரியர்கள் வெளியில் சென்றால், மாணவர்கள் தங்களுக்குள் சண்டையிட்டுக் கொள்வது, விபத்துகளில் சிக்குவது போன்ற அசம்பாவிதங்கள் நடப்பதைத் தடுக்கவே இந்த வளாகத் தடை விதிக்கப்பட்டுள்ளது.
சட்ட-ஒழுங்கு சிக்கல்களைத் தவிர்த்தல்
பள்ளிகளில் ஏதேனும் அசாதாரண சம்பவங்கள், சாதிய மோதல்கள் அல்லது ஒழுங்கீனப் பிரச்சனைகள் ஏற்படும்போது, தலைமை ஆசிரியர்கள் தன்னிச்சையாக எடுக்கும் சில முடிவுகள் சட்ட-ஒழுங்கு சிக்கலாக மாறுவதைத் தவிர்க்க, கல்வித் துறை உயர் அதிகாரிகளுக்கு உடனடியாகத் தகவல் தெரிவிப்பது கட்டாயமாக்கப்பட்டுள்ளது.
இதையும் படிங்க: 'Super Star' ரஜினிகாந்தின் 'ஜெயிலர் 2' : 13 நாட்களில் 750 கோடியைக் கடந்து பாக்ஸ் ஆபீஸில் சாதனை!
==========