இசையமைப்பாளர் தேனிசைத் தென்றல் தேவா மறைவு : அரசு மரியாதையுடன் இறுதிச்சடங்கு : முதல்வர் விஜய் அறிவிப்பு!

Deva Demise State Honours CM Vijay Condolence

தேவாவின் மறைவால் வாடும் திரைத்துரை

தமிழ் திரையுலகின் புகழ்பெற்ற இசையமைப்பாளரும் பாடகருமான 'தேனிசைத் தென்றல்' தேவா (75), மாரடைப்பு காரணமாக சென்னையில் உள்ள தனியார் மருத்துவமனையில் அனுமதிக்கப்பட்டிருந்த நிலையில் சிகிச்சை பலனின்றி இன்று (அக்டோபர் 17) காலமானார்.

அவரது மறைவுத் செய்தி திரையுலகினரையும் ரசிகர்களையும் பெரும் அதிர்ச்சியில் ஆழ்த்தியுள்ளது. தேவாவின் மறைவுக்கு அரசியல் தலைவர்கள், திரையுலகப் பிரபலங்கள் பலர் இரங்கல் தெரிவித்து நேரில் அஞ்சலி செலுத்தி வருகின்றனர்.

அரசு மரியாதை அறிவிப்பு

இசையமைப்பாளர் தேவா இசை உலகிற்கு ஆற்றிய மாபெரும் சேவையைப் போற்றும் வகையிலும் சிறப்பிக்கும் வகையிலும், அவரது உடலுக்கு இறுதிச்சடங்கின் போது அரசு மரியாதை வழங்கப்படும் என்று தமிழக அரசு சார்பில் முதல்வர் விஜய் அறிவித்துள்ளார்.

முதல்வர் விஜய் குறித்து இணையத்தில் வைரலாகும் தேவா பேசிய வீடியோ

தேவாவின் மறைவையடுத்து, தனியார் ஊடக நிகழ்ச்சி ஒன்றில் முதல்வர் விஜய் பற்றி தேவா பேசிய பழைய வீடியோ ஒன்று இணையத்தில் வைரலாகி வருகிறது.

அந்த நிகழ்ச்சியில் தேவா பேசியதாவது:

"முதல்வர் விஜய்யின் 14 படங்களுக்கு இசையமைத்திருக்கிறேன். இந்த 14 படங்களில் நான் அவருடன் பேசியது ஒரு 10 நிமிடங்கள் கூட இருக்காது. அவர் உண்டு, அவர் வேலை உண்டு என்று அமைதியாக இருப்பார்.

முதல் படத்தில் இருந்தே அவர் நன்றாகப் பாடுவார் என்று தெரிந்து, 'ரசிகன்' திரைப்படத்தில் 'பம்பாய் சிட்டி சுல்தான் ரொட்டி...' பாட்டை அவருக்கு சொல்லிக் கொடுத்துப் பாட வைத்தேன். அது பெரிய ஹிட் ஆனது. அதன்பிறகு தனது படங்களுக்கு அவரே பாடத் தொடங்கினார். அவர் மென்மையான, பெருந்தன்மையான மனிதர்.

அவர் முதல்வராகியிருப்பது எனக்கு மிகவும் பெருமையாக இருக்கிறது. பாட்டு சொல்லிக் கொடுத்து ரெக்கார்டிங் செய்த ஒருவர் இன்று முதல்வராக இருப்பது சந்தோஷம்" என்று மனதார வாழ்த்தியிருந்தார்.

விஜய் - தேவா கூட்டணியின் வெற்றிப் படங்கள்

நடிகர் விஜய்யின் ரசிகன், விஷ்ணு, மாண்புமிகு மாணவன், ஒன்ஸ்மோர், நேருக்கு நேர், பிரியமுடன், நினைத்தேன் வந்தாய், மின்சார கண்ணா, குஷி, பகவதி உள்ளிட்ட 14 படங்களுக்குத் தேவா இசையமைத்துள்ளார்.

'தொட்டபெட்டா ரோட்டு மேல', 'ஊட்டி மலை பியூட்டி', 'வண்ண நிலவே', 'மல்லிகையே மல்லிகையே', 'பாரதிக்கு கண்ணம்மா', 'ஊதா ஊதா பூ' போன்ற பல சூப்பர் ஹிட் பாடல்களை இக்கூட்டணி வழங்கியது. இதில் பல பாடல்களை விஜய்யே பாடியுள்ளது குறிப்பிடத்தக்கது.

================