சூர்ய வன்ஷியின் புதிய சாதனை
நடப்பு ஐபிஎல் 2026 கிரிக்கெட் தொடரில் ராஜஸ்தான் ராயல்ஸ் அணியின் 15 வயது இளம் தொடக்க ஆட்டக்காரராகக் களம் இறங்கி வரும் வைபவ் சூர்யவன்ஷி, டி20 கிரிக்கெட் வரலாற்றில் ஒரு புதிய உலக சாதனையைப் படைத்து அசத்தியுள்ளார்.
ஞாயிற்றுக்கிழமை (மே 24) நடைபெற்ற அணியின் மிக முக்கியமான கடைசி லீக் ஆட்டத்தில் இந்த வரலாற்று மைல்கல்லை அவர் எட்டினார்.
உலக சாதனையை முறியடிக்க 2 ரன்கள்
மும்பை வான்கடே மைதானத்தில் மும்பை இந்தியன்ஸ் அணிக்கு எதிராக நடைபெற்ற இந்த ஆட்டத்திற்கு முன்பாக, உலக சாதனையை முறியடிக்க வைபவ் சூர்யவன்ஷிக்கு வெறும் 2 ரன்கள் மட்டுமே தேவைப்பட்டது.
ஆட்டம் தொடங்கிய முதல் பந்திலேயே தனது ரன் கணக்கைத் தொடங்கிய அவர், வில் ஜாக்ஸ் வீசிய இரண்டாவது ஓவரின் இரண்டாவது பந்தில் தனது இரண்டாவது ரன்னை எடுத்து இந்த வரலாற்றுச் சாதனையைத் தன்வசப்படுத்தினார்.
தேவ்தத் படிக்கல்லின் சாதனை முறியடிப்பு
இதற்கு முன்னதாக, டி20 தொடர் ஒன்றில் மிக இளம் வயதில் அதிக ரன்கள் குவித்த வீரர் என்ற சாதனையை இந்திய வீரர் தேவ்தத் படிக்கல் தன்வசம் வைத்திருந்தார். அவர் கடந்த 2019/20 சையது முஷ்டாக் அலி உள்நாட்டுத் தொடரில் கர்நாடகா அணிக்காக விளையாடி 580 ரன்கள் குவித்ததே சாதனையாக இருந்தது.
581 ரன்கள் குவித்து புதிய சாதனை
தற்போது நடப்பு ஐபிஎல் தொடரில் தனது 14-வது போட்டியில் விளையாடிய 15 வயதே ஆன வைபவ் சூர்யவன்ஷி, மொத்தம் 581 ரன்கள் குவித்து படிக்கல்லின் சாதனையை ஒரு ரன் வித்தியாசத்தில் முறியடித்துப் புதிய சரித்திரம் படைத்துள்ளார்.
அடுத்த இலக்கு: 600 ரன்கள் மைல்கல்
இந்தத் தொடரில் ராஜஸ்தான் ராயல்ஸ் அணியின் முன்னணி ரன் குவிப்பாளராகத் திகழும் வைபவ், இன்னும் ஒரு சில ரன்களைக் கடந்தால் மற்றொரு இமாலய சாதனையைப் படைப்பார்.
கூடுதலாக 21 ரன்கள் எடுத்தால்?
அதாவது, வரவிருக்கும் ஆட்டங்களில் அவர் மேலும் 21 ரன்கள் எடுத்தால், உலக அளவில் ஒரு டி20 தொடரில் 600 ரன்களைக் கடந்த முதல் இளம் வீரர் என்ற பெருமையைப் பெறுவார்.
கிறிஸ் கெய்லின் சிக்ஸர் சாதனையை நெருங்கும் வைபவ்
பீகார் மாநிலம் சம்ஸ்திபூரைச் சேர்ந்த இந்த 15 வயது இடதுகை டாப் ஆர்டர் பேட்ஸ்மேன், ரன்கள் மட்டுமின்றி சிக்ஸர்களைப் பறக்கவிடுவதிலும் முதலிடத்தில் உள்ளார்.
53 சிக்ஸர்கள்: முதலிடம்
நடப்பு ஐபிஎல் தொடரில் இதுவரை 53 சிக்ஸர்களை அடித்து அதிக சிக்ஸர்கள் அடித்தவர்கள் பட்டியலில் அவர் முதலிடம் வகிக்கிறார்.
அதிக சிக்ஸர்களை வீசிய வீரர்
இதற்கு முன்னதாக லக்னோ சூப்பர் ஜெயன்ட்ஸ் அணிக்கு எதிரான போட்டியில், ஒரு டி20 தொடரில் 50 அல்லது அதற்கு மேற்பட்ட சிக்ஸர்களை விளாசிய முதல் மற்றும் ஒரே இந்திய வீரர் என்ற பெருமையை இவர் பெற்றிருந்தார்.
உலக சாதனையை முறியடிப்பாரா சூர்யவன்ஷி
இன்னும் 7 சிக்ஸர்கள் அடித்தால், ஐபிஎல் வரலாற்றில் ஒரே சீசனில் அதிக சிக்ஸர்கள் (59 சிக்ஸர்கள் - 2012 ஐபிஎல் தொடர்) அடித்த மேற்கிந்தியத் தீவுகள் அணியின் அதிரடி மன்னன் கிறிஸ் கெய்லின் உலக சாதனையை வைபவ் முறியடிப்பார் என்பது குறிப்பிடத்தக்கது.
======
