Automatic Brake System Mandatory Cars 2030 India
மத்திய அரசின் புதிய பாதுகாப்பு முடிவு
நாடு முழுவதும் நடைபெறும் சாலை விபத்துகளை குறைக்கும் நோக்கில், மத்திய அரசு பல்வேறு தீவிர நடவடிக்கைகளை எடுத்து வருகிறது. இதன் முக்கியப் பகுதியாக, கார்களில் 'மேம்பட்ட ஓட்டுநர் உதவி அமைப்பு' (ADAS - Advanced Driver Assistance Systems) தொழில்நுட்பத்தின் சில பாதுகாப்பு அம்சங்களை கட்டாயமாக்க அரசு முடிவு செய்துள்ளது.
AEBS கட்டாயமாக்கப்படும் காலக்கெடு
விபத்துகளைத் தவிர்க்கும் தானியங்கி பிரேக் வசதியான 'மேம்பட்ட அவசரகால பிரேக்கிங் சிஸ்டம்' (AEBS - Advanced Emergency Braking System) பொருத்தப்படுவதற்கான காலக்கெடு விவரங்கள்.
2030 அக்டோபர் முதல் சந்தைக்கு வரும் அனைத்து புதிய கார் மாடல்களிலும் ஏஇபிஎஸ் வசதி பொருத்தப்படுவது கட்டாயமாக்கப்படுகிறது.
தற்போதைய கார் மாடல்கள்
2030-க்கு முன்னதாக உருவாக்கப்பட்டு, தற்போது உற்பத்தியில் இருந்துவரும் கார் மாடல்களுக்கு 2032 அக்டோபர் முதல் ஏஇபிஎஸ் அம்சம் கட்டாயமாக்கப்படும். ஏடிஏஎஸ் பாதுகாப்பு அம்சங்களை செயல்படுத்துவதற்கான அதிகாரப்பூர்வ காலக்கெடு அடங்கிய வரைவு அறிவிப்பு விரைவில் வெளியாகவுள்ளது.
வர்த்தக வாகனங்களுக்கும் புதிய கட்டுப்பாடுகள்
பாதுகாப்பு அம்சங்களில் பேருந்து மற்றும் லாரி போன்ற வர்த்தக வாகனங்களுக்கு அதிக முக்கியத்துவம் அளிக்கப்பட உள்ளது. அதன்படி 2027 ஜனவரி முதல் சந்தைக்கு வரும் புதிய லாரி மற்றும் பேருந்து மாடல்களில் ஏஇபிஎஸ் அமைப்பு இடம்பெறுவது கட்டாயமாக்கப்படுகிறது.
கூடுதல் பாதுகாப்பு அம்சங்கள்
வாகனங்களின் மறைவுப் பகுதி தகவல் அதாவது Blind Spot Detection, ஓட்டுநரின் தூக்கக் கலக்கத்தைக் கண்டறிந்து எச்சரிக்கும் அமைப்பு (Driver Drowsiness Detection) மற்றும் பாதை விலகல் எச்சரிக்கை அமைப்பு (Lane Departure Warning System) போன்ற அதிநவீன தொழில்நுட்பங்களும் கட்டாயமாக்கப்பட்டுள்ளன.
ADAS மற்றும் AEBS என்றால் என்ன?
ADAS: இது 100-க்கும் மேற்பட்ட மின்னணு தொழில்நுட்பங்களின் தொகுப்பாகும். சாலையில் ஏற்படக்கூடிய அபாயங்களைக் கண்டறிந்து ஓட்டுநரை எச்சரிப்பதுடன், சில நேரங்களில் மோதலைத் தவிர்க்க பிரேக்குகள் அல்லது ஸ்டீயரிங்கைத் தானாகவே கட்டுப்படுத்தி பாதுகாப்பை உறுதி செய்கிறது.
AEBS: இந்த அமைப்பு, வாகனம் வேறொரு வாகனத்தின் மீதோ அல்லது தடையின் மீதோ மோதவிருப்பதை முன்கூட்டியே கண்டறியும். அந்த சமயத்தில் ஓட்டுநர் உடனடியாக பிரேக் பிடிக்கத் தவறினால், இந்தத் தொழில்நுட்பம் தானாகவே பிரேக்குகளைப் பயன்படுத்தி விபத்து நடப்பதைத் தடுக்கிறது.
===========
