இளைஞர்களின் கவனத்தை பெற்ற கட்சி :
இளைஞர்கள் மத்தியில் கடந்த சில மாதங்களாக பெரும் கவனத்தை ஈர்த்திருந்த கரப்பான் பூச்சி ஜனதா பார்ட்டி (CJP) தற்போது உட்கட்சி பிளவை சந்தித்துள்ளது.
அமைப்பின் முக்கிய செயற்பாட்டாளர்களில் ஒருவரான மனிஷ் பிரம்மபட், 'Cockroach Janta Party-Democratic' (CJP-D) என்ற புதிய அமைப்பை தொடங்கியுள்ளதாக அறிவித்துள்ளார்.
பிரிவுக்கு காரணம் என்ன :
அசல் CJP அமைப்பில் முடிவுகள் சிலரால் மட்டுமே எடுக்கப்படுவதாகவும், அடிமட்ட தொண்டர்கள் மற்றும் போராட்டங்களில் பங்கேற்ற இளைஞர்களின் கருத்துகளுக்கு போதிய முக்கியத்துவம் வழங்கப்படவில்லை என்றும் மனிஷ் பிரம்மபட் குற்றம்சாட்டியுள்ளார்.
இதன் காரணமாகவே புதிய அமைப்பை தொடங்க வேண்டிய நிலை ஏற்பட்டதாக அவர் தெரிவித்துள்ளார்.
புதிய CJP-D என்ன சொல்கிறது?
புதிய CJP-D அமைப்பு வெளிப்படைத்தன்மை, பொறுப்புணர்வு மற்றும் ஜனநாயக அடிப்படையிலான முடிவெடுப்பை முன்னிலைப்படுத்தும் என்று மனிஷ் பிரம்மபட் கூறியுள்ளார்.
மேலும், அமைப்பின் முக்கிய முடிவுகளில் உறுப்பினர்கள் மற்றும் தொண்டர்களின் கருத்துகளுக்கு முன்னுரிமை வழங்கப்படும் என்றும் தெரிவித்துள்ளார்.
சமூக வலைதளங்களில் வைரலாகும் பிளவு :
வேலைவாய்ப்பின்மை, தேர்வு வினாத்தாள் கசிவு மற்றும் இளைஞர்களின் பிரச்சினைகளை மையமாகக் கொண்டு உருவான CJP, குறுகிய காலத்திலேயே நாடு முழுவதும் பெரும் ஆதரவை பெற்றது.
இந்நிலையில், அமைப்பு உருவான சில மாதங்களிலேயே பிளவு ஏற்பட்டிருப்பது சமூக வலைதளங்களில் விவாதப் பொருளாக மாறியுள்ளது.
அடுத்தது என்ன?
CJP மற்றும் புதிய CJP-D ஆகிய இரு அணிகளும் இனி தனித்தனியாக செயல்படவுள்ளன.
இந்த பிளவு, இளைஞர்கள் மத்தியில் உருவான இயக்கத்தின் எதிர்காலத்தை எந்த வகையில் பாதிக்கும் என்பது அரசியல் வட்டாரங்களில் எதிர்பார்ப்பை ஏற்படுத்தியுள்ளது.
===============
