ரேகா குப்தா அறிவிப்பு :
தீபாவளி பண்டிகை நெருங்கி வரும் நிலையில், சமையல் எரிவாயு சிலிண்டர் தொடர்பாக பொதுமக்களுக்கு மகிழ்ச்சியான செய்தி வெளியாகியுள்ளது.
டெல்லி மற்றும் உத்தரப் பிரதேச மாநில அரசுகள், தகுதியுள்ள குடும்பங்களுக்கு இலவச எல்பிஜி சிலிண்டர் அல்லது அதற்கான நிதியுதவியை வழங்கும் திட்டங்களை செயல்படுத்தி வருகின்றன.
இதனால் லட்சக்கணக்கான குடும்பங்கள் இந்த தீபாவளியை கூடுதல் மகிழ்ச்சியுடன் கொண்டாட தயாராகி வருகின்றன.
டெல்லி முதல்வர் ரேகா குப்தா, ரேஷன் அட்டை வைத்திருக்கும் குடும்பங்களுக்கு ஆண்டுதோறும் இரண்டு எல்பிஜி சிலிண்டர்களின் விலைக்கு இணையான நிதியுதவி வழங்கப்படும் என்று அறிவித்துள்ளார்.
இந்த தொகை ஆண்டுக்கு இருமுறை, ஹோலி மற்றும் தீபாவளி பண்டிகைகளை முன்னிட்டு நேரடியாக பயனாளிகளின் வங்கிக் கணக்கில் செலுத்தப்படும்.
நேரடிப் பயன் பரிமாற்ற (DBT) முறையின் கீழ், குடும்பத் தலைவரின் ஆதார் இணைக்கப்பட்ட வங்கிக் கணக்கில் இந்த தொகை வரவு வைக்கப்படும்.
எல்பிஜி சிலிண்டர் பயன்படுத்துபவர்களோ அல்லது குழாய் வழி எரிவாயு (PNG) பயன்படுத்துபவர்களோ என அனைத்து ரேஷன் அட்டைதாரர்களும் இந்த திட்டத்தின் பயனை பெற முடியும் என அரசு தெரிவித்துள்ளது.
இந்த திட்டத்தின் முக்கிய அம்சம் என்னவென்றால், குறிப்பிட்ட மாதத்தில் சிலிண்டரை நிரப்பியிருக்க வேண்டும் என்ற கட்டாயம் இல்லை.
அரசு நிர்ணயித்துள்ள தொகை நேரடியாக வங்கிக் கணக்கில் வரவு வைக்கப்படும். இந்த திட்டத்திற்காக டெல்லி அரசு ஆண்டுதோறும் ரூ.242.77 கோடி செலவிடும் என மதிப்பிடப்பட்டுள்ளது.
உத்தரப் பிரதேச மாநில அரசும் தீபாவளி மற்றும் ஹோலி பண்டிகைகளை முன்னிட்டு பிரதான் மந்திரி உஜ்வாலா யோஜனா திட்டத்தின் பயனாளிகளுக்கு இலவச எல்பிஜி சிலிண்டர்களை வழங்கி வருகிறது.
மாநிலம் முழுவதும் 1.5 கோடிக்கும் அதிகமான குடும்பங்கள் இந்த திட்டத்தின் மூலம் நேரடியாக பயனடைந்து வருகின்றன.
ஏழை மற்றும் நடுத்தர குடும்பங்களின் சமையல் செலவை குறைக்கும் நோக்கில் இந்த திட்டம் செயல்படுத்தப்பட்டு வருகிறது.
டெல்லியில் 14.2 கிலோ எடை கொண்ட வீட்டு உபயோக எல்பிஜி சிலிண்டரின் விலை தற்போது ரூ.942 ஆக உள்ளது. அதே நேரத்தில், 19 கிலோ எடை கொண்ட வணிக பயன்பாட்டு சிலிண்டரின் விலை சமீபத்தில் ரூ.62.59 உயர்ந்துள்ளது.
பண்டிகை காலங்களில் குடும்பச் செலவுகள் அதிகரிக்கும் நிலையில், அரசின் இந்த நிதியுதவி பொதுமக்களுக்கு குறிப்பிடத்தக்க நிவாரணமாக இருக்கும் என்று எதிர்பார்க்கப்படுகிறது.
டெல்லியில் ரேஷன் அட்டை வைத்திருப்பவர்கள் மற்றும் உத்தரப் பிரதேசத்தில் பிரதான் மந்திரி உஜ்வாலா யோஜனா திட்டத்தின் பயனாளிகள் இந்த திட்டத்தின் கீழ் பயன் பெறலாம்.
அதற்கு வங்கிக் கணக்கு ஆதார் எண்ணுடன் இணைக்கப்பட்டிருக்க வேண்டும்.
அனைத்து தகுதி நிபந்தனைகளும் பூர்த்தி செய்யப்பட்டிருந்தால், தீபாவளியை முன்னிட்டு சிலிண்டருக்கான தொகை நேரடியாக வங்கிக் கணக்கில் வரவு வைக்கப்படும் என்று அரசு தெரிவித்துள்ளது.
=================
